Mose IV, 26

Nihi a kanemi enyɔne ɔ

1 ⓞ Gbenɔ hiɔ ɔ se ɔ, Yawɛ de Mose kɛ osɔfo Aaron bi Eleazar ke,

2 “Nyɛɛ kane Israel ma kpekpemi ɔ tsuo we puɔ nya we puɔ nya, kɛ je ni nɛmɛ nɛ ye jeha nyingmi enyɔ kɛ yaa, nɛ a ma nyɛ ya ta a nɔ.”

3 Mose kɛ osɔfo Eleazar ya nɛ a kɛ ma a ya tu munyu ngɛ Moab nga kplanaa a nɔ, ngɛ Yordan pa a nya, ngɛ Yeriko hanɔ;

4 nɛ a ngma ni nɛmɛ nɛ a ye kɛ je jeha nyingmi enyɔ kɛ yaa a a biɛ kaa bɔ nɛ Yawɛ fa Mose ɔ. Israel ma a nɛ je Egipt kɛ ba a ji nɛ ɔ nɛ.

5 Ruben wɛtso ɔ (Ruben ji Yakob kekleekle binyumu): wekuhi nɛ ngɛ Ruben wɛtso ɔ mi ji Hanok weku ɔ, kɛ a nyatsɛ Hanok; Palu weku ɔ, kɛ a nyatsɛ Palu;

6 Hezron weku ɔ, kɛ a nyatsɛ Hezron; Karmi weku ɔ, kɛ a nyatsɛ Karmi.

7 A hiɛmi ji 43,730.

8 Palu bi ji Eliab,

9 nɛ Eliab bimɛ ji Nemuel, Datan, kɛ Abiram. (Datan kɛ Abiram nɛ ɔ ji gua mi bimɛ nɛ ma kpekpemi ɔ hla. Mɛ ji ni nɛmɛ nɛ hyɛ Mose kɛ Aaron hɛ mi, nɛ pee se ɔ, a ya piɛ Kora kɛ e we bi ɔmɛ a he kɛ tsɔ Yawɛ hɛ mi atuã a nɛ.

10 Zugba mi gba enyɔ ngɛ a sisi, nɛ e mii a kɛ Kora tsuo; nɛ a gbo. Nyumuhi lafa enyɔ kɛ nyingmi enuɔ ɔmɛ lɛɛ la sã mɛ, nɛ a plɛ pee kɔkɔ bɔmi okadi kɛ ha ma a.

11 Se Kora bimɛ ɔmɛ lɛɛ a gbo we.)

12 Simeon wɛtso ɔ: wekuhi nɛ ngɛ mi ji Nemuel weku ɔ, kɛ a nyatsɛ Nemuel; Yamin weku ɔ, kɛ a nyatsɛ Yamin; Yakin weku ɔ, kɛ a nyatsɛ Yakin;

13 Zera weku ɔ, kɛ a nyatsɛ Zera; Shaul weku ɔ, kɛ a nyatsɛ Shaul.

14 A hiɛmi ji 22,200.

15 Gad wɛtso ɔ: wekuhi nɛ ngɛ mi ji Zefon weku ɔ, kɛ a nyatsɛ Zefon; Hagi weku ɔ, kɛ a nyatsɛ Hagi, Shuni weku ɔ, kɛ a nyatsɛ Shuni;

16 Ozni weku ɔ, kɛ a nyatsɛ Ozni; Eri weku ɔ, kɛ a nyatsɛ Eri;

17 Arod weku ɔ, kɛ a nyatsɛ Arod; Areli weku ɔ, kɛ a nyatsɛ Areli.

18 A hiɛmi ji 40,500.

19 Yuda wɛtso ɔ: wekuhi nɛ ngɛ mi ji Shela weku ɔ, kɛ a nyatsɛ Shela; Perez weku ɔ, kɛ a nyatsɛ Perez; Zera weku ɔ, kɛ a nyatsɛ Zera; Hezron weku ɔ, kɛ a nyatsɛ Hezron; Hamul weku ɔ, kɛ a nyatsɛ Hamul (Yuda binyumuhi ji Er kɛ Onan, se mɛɛ a gbo ngɛ Kanaan zugba a nɔ.)

20

21

22 A hiɛmi ji 76,500.

23 Isakar wɛtso ɔ: wekuhi nɛ ngɛ mi ji Tola weku ɔ, kɛ a nyatsɛ Tola; Puva weku ɔ, kɛ a nyatsɛ Puva.

24 Yashub weku ɔ, kɛ a nyatsɛ Yashub; Shimron weku ɔ, kɛ a nyatsɛ Shimron.

25 A hiɛmi ji 64,300.

26 Zebulun wɛtso ɔ: wekuhi nɛ ngɛ mi ji Sered weku ɔ, kɛ a nyatsɛ Sered; Elon weku ɔ, kɛ a nyatsɛ Elon; Yahleel weku ɔ, kɛ a nyatsɛ Yahleel.

27 A hiɛmi ji 60,500.

28 Yosef ngɛ binyumuhi enyɔ: Manase kɛ Efraim.

29 Manase wɛtso ɔ: Manase binyumu Makir ɔ, e bi ji Gilead, nɛ weku nɛ ɔmɛ je Gilead mi:

30 Yazer weku ɔ, kɛ a nyatsɛ Yazer; Helek weku ɔ, kɛ a nyatsɛ Helek;

31 Asriel weku ɔ, kɛ a nyatsɛ Asriel; Shekem weku ɔ, kɛ a nyatsɛ Shekem;

32 Shemida weku ɔ, kɛ a nyatsɛ Shemida; Hefer weku ɔ, kɛ a nyatsɛ Hefer.

33 Hefer binyumu Zelofehad lɛɛ e be binyumu; biyihi pɛ lɛ a fɔ ha lɛ. Zelofehad biyi ɔmɛ a biɛhi ji Mahla, Noa, Hogla, Milka, kɛ Tirza.

34 Manase wɛtso ɔ mi bimɛ tsuo a hiɛmi ji 52,700.

35 Efraim wɛtso ɔ: wekuhi nɛ ngɛ mi ji Shutela weku ɔ, kɛ a nyatsɛ Shutela; Beker weku ɔ, kɛ a nyatsɛ Beker; Tahan weku ɔ, kɛ a nyatsɛ Tahan.

36 Shutela bimɛ ji Eran weku ɔ, kɛ a nyatsɛ Eran.

37 Efraim wɛtso ɔ mi bi tsuo a hiɛmi ji 32,500. Wekuhi nɛ je Yosef mi ji lɔ ɔmɛ nɛ.

38 Benyamin wɛtso ɔ: wekuhi nɛ ngɛ mi ji Bela weku ɔ, kɛ a nyatsɛ Bela; Ashbel weku ɔ, kɛ a nyatsɛ Ashbel; Ahiram weku ɔ, kɛ a nyatsɛ Ahiram;

39 Shefufam weku ɔ, kɛ a nyatsɛ Shefufam; Hufam weku ɔ, kɛ a nyatsɛ Hufam.

40 Ard kɛ Naaman weku ɔmɛ je Bela weku ɔ mi.

41 Benyamin wɛtso ɔ mi bi tsuo a hiɛmi ji 45,600.

42 Dan wɛtso ɔ: weku nɛ ngɛ Dan wɛtso ɔ mi ji Shuham weku ɔ, kɛ a nyatsɛ Shuham,

43 nɛ a hiɛmi ji 64,400.

44 Asher wɛtso ɔ: wekuhi nɛ ngɛ mi ji Imna weku ɔ, kɛ a nyatsɛ Imna; Ishvi weku ɔ, kɛ a nyatsɛ Ishvi; Beria weku ɔ, kɛ a nyatsɛ Beria;

45 Heber weku ɔ, kɛ a nyatsɛ Heber; Malkiel weku ɔ, kɛ a nyatsɛ Malkiel.

46 Asher ngɛ biyo ko nɛ a tsɛɛ lɛ Sera.

47 Asher wɛtso ɔ mi bi a hiɛmi ji 53,400.

48 Naftali wɛtso ɔ: wekuhi nɛ ngɛ mi ji Yazeel weku ɔ, kɛ a nyatsɛ Yazeel; Guni weku ɔ, kɛ a nyatsɛ Guni;

49 Yezer weku ɔ, kɛ a nyatsɛ Yezer; Shilem weku ɔ kɛ a nyatsɛ Shilem.

50 Naftali wɛtso ɔ mi bi ahiɛmi ji 45,400.

51 Israel bi ɔmɛ a kpɛti nyumuhi nɛ a ngma a biɛ ɔ, mɛ tsuo pɛpɛɛpɛ a hiɛmi ji 601,730.

Zugba a dlami

52 ⓟ Yawɛ de Mose ke,

53 “Dla zugba a kɛ ha wɛtso ɔmɛ ngɛ a hiɛmi nya, konɛ e pee a nɔ.

54 Wɛtso nya dali ɔmɛ nɛ a fɔ sɔ kɛ dla zugba a. Wɛtso nɛ mi bimɛ hiɛ ɔ, a na zugba agbo; se wɛtso nɛ mi bimɛ a he pi lɛɛ a na zugba bɔbɔyoo.”

55

56

57 Levi wɛtso ɔ, wekuhi nɛ ngɛ mi ji Gershon weku ɔ, kɛ a nyatsɛ Gershon; Kohat weku ɔ, kɛ a nyatsɛ Kohat; Merari weku ɔ, kɛ a nyatsɛ Merari.

58 Levi wɛtso ɔ mi weku komɛ hu ji Libni, Hebron, Mahli, Mushi, kɛ Kora. Kohat bi ji Amram.

59 Amram yo ji Yokebed, Levi biyo ɔ nɛ e fɔ ngɛ Egipt ɔ. Amram kɛ lɛ fɔ Aaron, Mose, kɛ a nyɛmiyo Miriam.

60 ⓠ Aaron bimɛ ji Nadab, Abihu, Eleazar, kɛ Itamar.

61 ⓡ Se Nadab, kɛ Abihu gbo benɛ a ngɔ la nɛ he tsɔ we kɛ sã bɔ ha Yawɛ ɔ.

62 Nyumuhi nɛ ngɛ Levi wɛtso ɔ mi, nɛ a ye kɛ je nyɔhiɔ kake kɛ yaa, nɛ a ngma a biɛ ɔ, a hiɛmi ji 23,000. A kane we mɛ kɛ piɛ we Israel bi kpa amɛ a he; ejakaa mɛɛ lɛɛ a ha we mɛ weto ní ko ngɛ Israel bi ɔmɛ a kpɛti.

63 Ni nɛ ɔmɛ tsuo ji nihi nɛ Mose kɛ osɔfo Eleazar ngma a biɛ, benɛ a kane Israel ma a ngɛ Moab nga kplanaa a nɔ, ngɛ Yordan pa a se, ngɛ Yeriko hanɔ ɔ.

64 Se nihi nɛ Mose kɛ osɔfo Aaron ngma a biɛ, benɛ a kane Israel ma a ngɛ Sinai nga a nɔ ɔ, jamɛatsɛmɛ ɔmɛ a ti nɔ kake ngmelu be ni nɛ ɔmɛ a kpɛti.

65 ⓢ Yawɛ de to kaa mɛ tsuo kulaa a ma gbo ngɛ nga a nɔ. Nɛ niinɛ, Yefune binyumu Kaleb, kɛ Nun binyumu Yoshua pɛ ji a ti ni nɛmɛ nɛ piɛ.