Yona 1

A tsɔ gbalɔ Yona

1 ⓐ Ligbi ko ɔ, Yawɛ kɛ Yona, Amitai bi ɔ tu munyu, nɛ e de lɛ ke,

2 “Yaa Nineve ma nguaa a mi nɛ o ya kuɛ wo ma mi bi ɔmɛ, nɛ o de mɛ ke, i na paa kaa a yi mi wami ɔ su he ko jehanɛ.”

Yona gbo tue

3 Se Yona pue he kpa blɔ mohu, konɛ e tu fo kɛ je Yawɛ hɛ mi. E ho Yopa ya nɛ e ya na lɛ ko nɛ yaa Spania. E wo hiɔ, nɛ e sɛ lɛ ɔ mi konɛ e kɛ ni ɔmɛ nɛ ya Spania, nɛ e laa Yawɛ.

4 Se Yawɛ ha kɔɔhiɔ nɛ nya wa ko hia ngɛ wo ɔ nɔ, nɛ wo kɔɔhiɔ nɛ ɔ he wami ɔ miɔ nɛ e maa ywia lɛ ɔ.

5 Lɛ hluili ɔmɛ ye gbeye, nɛ nɔ tsuaa nɔ kpa ngmlaa kɛ tsɛ e mawu. A je tlomi ɔmɛ kɛ wo wo ɔ mi konɛ lɛ ɔ nɛ pee huyɛhuyɛ ha mɛ. Se Yona lɛɛ e kple si kɛ ho lɛ ɔ sisi ya tɔɔ, nɛ e ya hwɔ si nɛ e hwɔ mahe vii.

6 Lɛtsɛ ɔ ba e ngɔ nɛ e ba de lɛ ke, “Kɛ o ngɛ tsɔɔe kɛɛ; mahe lɛ o ngɛ hwɔe? Tee si nɛ o tsɛ o mawu ɔ, kaa alini wa ní maa pee lɛ mɔbɔ nɛ e ma he wa yi wami lo.”

7 Lɛ mi bi ɔmɛ de a he ke, “Nyɛ ha nɛ waa fɔ sɔ, nɛ wa kɛ hla nɔ nɛ kɛ amanehlu nɛ ɔ ba wa nɔ.” A pee ja, nɛ sɔ ɔ ya nɔ Yona nɔ.

8 Lɔ ɔ he ɔ, a bi lɛ ke, “Jehanɛ mo de wɔ! Mɛni kɛ amanehlu nɛ ɔ ba wa nɔ ɔ? Mɛni o ngɛ pee ngɛ hiɛ ɔ? Jije zugba nɔ o je? Nɛ jije no ji mo?”

9 Yona ha mɛ heto ke, “Hebri no ji mi, nɛ i jaa Yawɛ, hiɔwe Mawu ɔ, nɔ nɛ pee wo kɛ zugba a.”

10 Nɔ́ nɛ ɔ ha lɛ mi bi ɔmɛ ye gbeye wawɛɛ nitsɛ, nɛ a bi lɛ ke, “Mɛni o pee nɛ ɔ?” Ejakaa a le kaa e tu fo kɛ je Yawɛ hɛ mi.

11 Se wo kɔɔhiɔ ɔ nya ngɛ wae pe kekle ɔ. Lɔ ɔ he ɔ, a bi lɛ ke, “Kɛ wa maa pee mo kɛɛ nɛ wo ɔ he nɛ jɔ ha wɔ?”

12 Yona he nɔ ke, “Nyɛ sake mi ngɔ fɔ wo ɔ mi, kɛkɛ wo ɔ he maa jɔ ha nyɛ; ejakaa i le kaa ye tɔmi he nɛ wo kɔɔhiɔ nɛ nya wa nɛ ɔ ngɛ nyɛ haoe ɔ nɛ.”

13 Se kɛ̃ ɔ, lɛ mi bi ɔmɛ bɔ mɔde hlui lɛ ɔ wawɛɛ kɛ a he wami tsuo kaa a maa su kpo he lo; se a nyɛ we; ejakaa si abɔ nɛ a ngɛ hluie ɔ, si abɔ nɛ wo kɔɔhiɔ ɔ nya ngɛ wae kɛ ngɛ mɛ kpee.

14 Lɔ ɔ he ɔ, a kpa huhui nɛ a de Yawɛ ke, “Yawɛ lee, wa ngɛ mo pɛɛ kpae, ko ha wa hɛ mi nɛ kpata ngɛ nyumu nɛ ɔ wami he, nɛ ko ha waa gbe nɔ ko nɛ yi fɔ, ejakaa wɔɔ lɛɛ wa li he nɔ́ ko! Ejakaa mo Yawɛ lɛɛ nɔ́ nɛ sa o hɛ mi nɛ o peeɔ.”

15 Kɛkɛ nɛ a nu Yona nɛ a sake lɛ ngɔ fɔ wo ɔ mi; nɛ wo ɔ ngmɛ dii.

16 Nɔ́ nɛ ɔ ha lɛ mi bi ɔmɛ ye Yawɛ gbeye wawɛɛ; lɔ ɔ he ɔ, a sã bɔ ha lɛ, nɛ a wo si kaa a ma sɔmɔ lɛ.

17 ⓑ Ngɛ Yawɛ fami nya a, lo agbo ko ba mi Yona, nɛ e hi lo ɔ muklii mi nyɔ kɛ pia nyɔ kɛ pia ligbi etɛ.