Amos 8

Tso yibliihi nɛ ngɛ kusii mi ɔ a he nina

1 Nɔ́ ko hu nɛ Nyɔmtsɛ Yawɛ je ngɔ tsɔɔ mi be ko ngɛ nina kpa mi ji kusii kɛ e mi tso yiblii nɛ fu.

2 Yawɛ tsɛ ye biɛ, nɛ e bi ke, “Amos, mɛni o na?” I he nɔ ke, “Kusii kɛ e mi tso yiblii nɛ fu.” Kɛkɛ nɛ Yawɛ de mi ke, “Tso yiblii ɔ daa si ha ye ma Israel. Bɔ nɛ tso yiblii ɔ fu ɔ tsɔɔ kaa be ɔ su jehanɛ, nɛ ma gbla a tue; i be ye yi mi tomi ɔ tsakee hu.

3 Jamɛ a ligbi ɔ, yi ɔmɛ nɛ a hii lae ngɛ matsɛ we ɔ mi ɔ ma nya awe mohu. A ma sake ni gbogboehi babauu kɛ fɔ he tsuaa he dii, nɛ a be nɔ́ ko nɔ́ ko he nue.”

Mawu maa gbla Israel ma a tue

4 Nyɛ jua yeli nɛ nyɛ kpɔɔ níhi ngɛ dɛgutsɛmɛ a dɛ, nɛ nyɛ hlaa kaa nyɛ ma kpata ohiatsɛmɛ nɛ ngɛ zugba a nɔ ɔ a hɛ mi, nyɛɛ bu tue!

5 Nyɛ biɔ nyɛ sibi ke, “Mɛni be Nyɔhiɔhe nyami be ɔ maa ta nɛ waa jua blɛfo? Mɛni be Hejɔɔmi ligbi ɔ maa be, nɛ wa bɔni ngma juami ekohu?” Nyɛ yaa nɔ nɛ nyɛ deɔ ke, “Wa ma tsake wa sɛni tɛ ɔmɛ, kɛ ní juami ní kpa amɛ, nɛ wa maa sisi ni nɛmɛ nɛ waa kɛ mɛ yeɔ jua a.

6 Wa maa jua ngma bibliwi po kɛ he jua wawɛ. Wa ma he ohiatsɛmɛ kɛ pee wa nyɔguɛhi, ejakaa a be nyɛe maa wo a hiɔ ɔmɛ. Ke ohiatsɛ ko hɛɛ hiɔ nɛ e nya maa su kaa tokota nane hiɛ kɛ hiɛ po, e be nyɛe maa wo.”

Tue gblami slɔɔtohi

7 Yawɛ, nɔ nɛ Israel woɔ e hɛ mi nyami ɔ ka kita ke, “Ye hɛ be a ní yayami ɔmɛ a nɔ jee gblegbleegble.

8 A ní yayami ɔmɛ a he je ɔ, ma ha nɛ zugba ma mimiɛ, nɛ nɔ tsuaa nɔ nɛ ngɛ zugba a nɔ ɔ maa hao. Zugba a tsuo ma mimiɛ; e maa ya hiɔwe, nɛ e maa ba si kaa bɔ nɛ Nilo pa a nɛ ngɛ Egipt ɔ, hyiɔ nɛ e faa daa jeha a.

9 Jamɛ a ligbi ɔ, ma ha nɛ pu maa nɔ si piani katakata, nɛ je ɔ mi maa wo diblii. Imi, Nyɔmtsɛ Yawɛ lɛ i de.

10 Jehanɛ se hu, be mi nɛ nyɛ ngɛ ní yee, nɛ nyɛ ngɛ nyae ɔ, ma ha nɛ nyɛ ma bɔni kɔmɔ yemi jamɛ a be ɔ mi nɔuu; ma tsake nyɛ bua jɔmi la amɛ kɛ pee kɔmɔ yemi lahi. Ma ha nɛ nyɛ ma sã nyɛ yi nɔ, nɛ nyɛ ma bu kpekpe ya bo. Ma ha nɛ nyɛ maa ye kɔmɔ kaa nɔ ko nɛ e bi kake too pɛ ɔ gbo; nɔ tsuaa nɔ maa pee mɔbɔmɔbɔ jamɛ a ligbi ɔ.

11 “Be ma, nɛ ma ha nɛ hwɔ maa ba zugba a nɔ; pi mi mi hwɔ, loo kuma. Se sɛ gbi nɛ maa je imi Yawɛ, ye ngɔ ɔ, ma bɔ nyɛ. Imi, Nyɔmtsɛ Yawɛ lɛ i de.

12 Nihi maa wo lalaalo kɛ maa je Mediterenia wo ɔ nya kɛ maa ya Wo Ngua a nya; a ma tsa nɔ kɛ maa je omleyi je kɛ maa ya beleku je kaa a maa nu ye sɛ gbi ko lo. Se a be ye nya mi munyu ko nue.

13 Pi enɛ ɔ kɛkɛ. Jamɛ a ligbi ɔ, nihewi kɛ yihewi tsuãã po, kuma maa ye mɛ nɛ a ma tsɔ fia si!

14 Nimli nɛ ɔmɛ maa nɔ si, nɛ a be si tee hu gblegbleegble. Ejakaa a jaa mawuhi nɛ ngɛ Samaria, Dan, kɛ Beersheba a, nɛ a kɛ a biɛhi kaa kita.”