Amos 5

A de Israel ma a ke a tsake a tsui

1 Israel ma, nyɛɛ bu kɔmɔ yemi la nɛ ɔ nɛ imi Amos, i ngɛ lae ha nyɛ ɔ tue:

2 Israel bi nɛ nyɛ ngɛ kaa zangmawi! Nyɛ nɔ ta, nɛ nyɛ be si tee hu. A gbe nyɛ ngɔ pue nyɛ nitsɛmɛ nyɛ zugba nɔ; Nɛ nɔ ko bɛ nɛ e ba wo nyɛ nɔ.

3 Nyɔmtsɛ Mawu ke, “Ta buli akpe maa je Israel ma ko mi kɛ ya ta, se nihi lafa pɛ ji ni nɛmɛ nɛ maa kpale kɛ ba; ta buli lafa maa je ma kpa ko mi kɛ ya, se nihi nyɔngma pɛ lɛ maa kpale kɛ ba.”

4 Bɔ nɛ Yawɛ ngɛ Israel ma a dee ji nɛ ɔ nɛ: “Nyɛɛ kpale kɛ ba nɛ nyɛ ba pee ye ma ekohu, konɛ nyɛ yi nɛ na wami.

5 Nyɛ ko ya ja mi ngɛ Beersheba hu. Nyɛ ko ya hla mi ngɛ Betel hu, ejakaa Betel maa pee ma doku, kɛ mumi yayamihi a hi he. Nyɛ ko ya Gilgal, ejakaa a maa nuu Gilgal ma mi bi ɔmɛ nyɔguɛ kɛ je.

6 “Ke nyɛ kpale we kɛ bɛ ye ngɔ ɔ, ma ba nyɛ Israel bi ɔmɛ nyɛ kpɛti kaa la nɛ ngɛ tsoe gegeege. La nɛ ɔ maa sã Betel ma mi bi ɔmɛ, nɛ nɔ ko nɔ ko be nyɛe nɛ e gbe.” Nɔ́ nɛ Yawɛ de Israel bi ɔmɛ ke a pee, konɛ a yi nɛ na wami ji nɛ ɔ nɛ.

7 “Nyɛ ni nɛmɛ nɛ nyɛ plɛɔ dami sane hɛ mi ngɔ buɔ si, nɛ nyɛ sisiɔ nihi, musu tloo nyɛ!”

8 ⓜ Mawu lɛ bɔ dodoehi nɛ́ jeɔ gbo kɛ gbiɛ. E haa nɛ nyɔ mi peeɔ piani, nɛ piani peeɔ nyɔ mi. E yɛɔ nyu kɛ jeɔ wo mi, nɛ e plɛɔ kɛ pueɔ zugba. Lɛ ji Yawɛ ɔ nɛ.

9 Mawu he sɔɔ kɛ kpataa matsɛmɛ kɛ a mɔ nguanguahi a hɛ mi kaa bɔ nɛ oslabai gbaa tlukaa a.

10 Nihi nɛ kaa nihi a hɛ mi ngɛ kojomi he, kɛ nihi nɛ tuɔ anɔkuale sisiisi ɔ, nyɛ nyɛɛ mɛ, nɛ nyɛ sume mɛ.

11 I le kaa nyɛ peeɔ yayami agboagbohi babauu. Nyɛ waa nimli kpakpahi yi mi. Nyɛ heɔ nyɔ mi ní. Nyɛ sisiɔ ohiatsɛmɛ, nɛ nyɛ plɛɔ dami sane hɛ mi ngɔ buɔ si. Enɛ ɔmɛ a he je ɔ, mɔ kpakpahi nɛ nyɛɛ kɛ tɛ ma a, nyɛ be a mi hie. Jehanɛ se hu, wai ngmɔ saminyawiiwi nɛ nyɛ pee ɔ, nyɛ be a mi dã nue.

12

13 Lɔ ɔ he ɔ, ní lelɔ ɔ, nɔ́ nɛ sa nɛ e pee ngɛ kikɛmɛ a be yaya nɛ ɔmɛ a mi ji, e ma e nya nɛ e ko tu munyu.

14 Nyɛɛ pee nɔ́ kpakpa, se pi nɔ́ yayami, konɛ nyɛ yi nɛ na wami. Ke nyɛ pee ja a, Yawɛ Tabohiatsɛ Mawu ɔ kɛ nyɛ maa hi si saminya kaa bɔ nɛ nyɛ deɔ daa ke e kɛ nyɛ ngɛ ɔ.

15 Nyɛɛ hie nɔ́ nɛ dɛ blɔ. Nyɛɛ suɔ nɔ́ kpakpa, nɛ nyɛɛ hyɛ nɛ a ye dami sane ngɛ kojomi he ɔmɛ. Alini, Yawɛ Tabohiatsɛ Mawu ɔ maa na Yosef nina nɛ piɛɔ mɔbɔ.

16 Nyɛ yayami ɔmɛ a he je ɔ, bɔ nɛ Nyɔmtsɛ Yawɛ Tabohiatsɛ Mawu ɔ ngɛ dee ji nɛ ɔ nɛ: “A maa wo yana ngɛ kpe he ɔmɛ, kɛ gbɛjegbɛ ɔmɛ a nɔ, nɛ nihi maa hi dee ke, ‘Ao! Ao!’ A ma tsɛ ngmɔ huli po kɛ ba, nɛ a ma ba ye kɔmɔ ha nyɛ; a ma tsɛ nihi nɛ laa kɔmɔ yemi la kɛ ba, nɛ a ba nya awe.

17 Nihi maa wo yana ngɛ wai ngmɔ ɔmɛ tsuo a mi, se pi kaa a maa muɔ. Ke i ba nɛ ma ba gbla nyɛ tue ɔ, ní nɛ ɔmɛ tsuo maa ba mi.” Yawɛ lɛ de.

18 Nyɛ nihi tsuo nɛ nyɛ ngɛ Yawɛ tue gblami ligbi ɔ blɔ hyɛe, nɛ e peeɔ nyɛ kaa be ɔ su ta, musu tloo nyɛ! Jamɛ a ligbi ɔ, haomi ji nɔ́ nɛ maa ba nyɛ nɔ kaa bɔ nɛ ahumi haa nɛ diblii woɔ piani katakata a, se pi manye.

19 Jamɛ a ligbi ɔ, nyɛ sane maa pee kaa nyumu ko nɛ tu fo kɛ je jata nya mi, nɛ e kɛ osisiblisi ya kpe! Aloo nyumu ko nɛ je pu mi kɛ ba we mi kɛ pɔtɔ. Benɛ e kpasa gbogbo nɛ́ e jɔɔ e he ɔ, kɛkɛ sinɔ kɔ lɛ.

20 Ligbi ɔ nɛ Yawɛ maa gbla Israel tue ɔ, bɔ nɛ níhi ma ya ba pɛpɛɛpɛ ji nɛ ɔ nɛ. Diblii nɛ́ maa wo jamɛ a ligbi ɔ, e mi ma ti bɔ nɛ nɔ ko nɔ ko be nyɛe maa hyɛ nɔ́ saminya.

21 ⓝ Yawɛ ke, “Kusumihi nɛ nyɛ peeɔ, kɛ gua pɔtɛɛhi nɛ nyɛ bɔɔ ngɛ nyɛ nyami ligbi ɔmɛ a nɔ, nɛ nyɛɛ kɛ woɔ ye hɛ mi nyami ɔ, i hiee, nɛ i na we a he bua jɔmi.

22 Nyɛ sami bɔ ɔmɛ, kɛ niye ní bɔ ɔmɛ ɔ, i be ngɔe. Lohwehi nɛ nyɛ je blɔ lɛ mɛ nɛ a wo zɔ nɛ nyɛ maa ngɔ kɛ ba sã tue mi jɔmi bɔ ha mi ɔ, i be hee.

23 Nyɛɛ jɔɔ mi haomi kɛ la nɛ nyɛ laa kɛ ngmlaa boboobo ɔ; nyɛ kpa saku ɔmɛ hu, i hla we nɛ ma nu a gbi.

24 Se mohu ɔ, nyɛɛ ye dami sane daa nɛ nyɛ ko kpa kaa bɔ nɛ pa nguaa ko hii bee nɛ e se pui gblee ɔ; nyɛɛ pee nɔ́ nɛ da be tsuaa be, nɛ nyɛɛ hi kaa pa nɛ nyu tɛ mi gblee.

25 ⓞ “Nyɛ Israel bi, jeha nyingmi eywiɛ sɔuu nɛ́ i kpaka nyɛ kɛ gu nga a nɔ ɔ, anɛ i bi nyɛ hyɛ ke nyɛ ba ke mi ní, aloo nyɛ ba sã bɔ ha mi lo?

26 Se jehanɛ lɛɛ, akɛnɛ nyɛ ya ja amagahi, nɛ nyɛ wo mɛ biɛ ke Sakut kɛ Kaiwan he je ɔ, nyɛ maa tloo jamɛ a amaga amɛ,

27 nɛ ma ngɔ nyɛ kaa nyɔguɛhi kɛ maa ya Damasko se tsitsaa a.” Yawɛ Tabohiatsɛ Mawu ɔ lɛ de.