Yoel - Introduction

NYA TSƆƆMI

A li gbalɔ Yoel he sane tsɔ ko; nɛ a li be tutuutu nɛ e hi si hulɔ. Se e peeɔ kaa womi nɛ ɔ mi sane je blema lokoo ngɛ Persia nɔ yemi be ɔ mi, maa pee jeha lafa enuɔ, loo lafa eywiɛ loko a fɔ Kristo.

Yoel womi ɔ gbaa bɔ nɛ baalɛ babauu kaa ta buli ma ba tua Palestina zugba a, nɛ e maa pee gbeye, kɛ bɔ nɛ sapu nɛ nya wa ma ba ha níhi a hɛ mi ma kpata ngɛ zugba a nɔ. Gbalɔ ɔ na kaa níhi nɛ maa ba nɛ ɔ tsɔɔ kaa Nyɔmtsɛ ɔ ligbi ɔ ma; nɛ jamɛ a be ɔ mi ɔ, Nyɔmtsɛ ɔ maa gbla nihi nɛ tee si kɛ siɔ e suɔmi nya ní ɔ a tue. Gbalɔ ɔ de ma a ke, Nyɔmtsɛ ɔ ke a tsake a tsui. Nyɔmtsɛ ɔ ngɛ mɛ si woe kaa ke a pee ja a, e maa kpale ma a kɛ ba ma e glɛ nɔ ekohu, nɛ e maa gbaa mɛ.

Womi nɛ ɔ mi munyu nɛ he hia saminya ji kaa Mawu wo si ke e ma ha e mumi ɔ maa ba nimli adesahi tsuo a nɔ: nyumuhi, yihi, jokuɛwi, kɛ nikɔtɔmahi.

Bɔ nɛ a dla womi ɔ mi ha

• Haomi nɛ baalɛ ɔmɛ kɛ maa ba 1.1—2.17
• Mawu wo si ke e maa kpale e ma a kɛ ba ma e glɛ nɔ ekohu 2.18-27
• Nyɔmtsɛ ɔ ligbi ɔ 2.28—3.21