Daniel 8

Agbosu ɔ kɛ to akpakpo ɔ

1 Matsɛ Belshazar yi nɔ jeha etɛne ɔ mi ɔ, i na nina nɔ́ nɛ ji enyɔ.

2 I na nɛ i ya je ma a nɛ a fia gbogbo ngɔ wo he nɛ a tsɛɛ lɛ Susa a tlukaa. Ma nɛ ɔ ngɛ Elam kpokpa a nɔ. I daa si ngɛ Ulai pa a nya.

3 Benɛ ma hyɛ ɔ, agbosu ko kɛ e yi mi koli enyɔ ji nɛ ɔ nɛ daa si ngɛ pa a tue. Koli ɔmɛ ka gagaaga, se kake ka pe kake, nɛ nɔ́ nɛ ka a kpɛ se kɛ ba.

4 I na nɛ agbosu ɔ ngɔ e koli ɔmɛ kɛ ngɛ lohwehi hɛɛe ngɛ e blɔ mi, kɛ je bonyoku, omleyi, kɛ leneyi je. Lohwe ko lohwe ko nyɛ we lɛ, loo e kpɔ e he kɛ je e dɛ mi. Agbosu ɔ bui nɔ́ ko nɔ́ ko; nɔ́ nɛ e suɔ nɛ e peeɔ.

5 Benɛ i ngɛ nɔ́ nɛ ɔ he susue ɔ, tlukaa a, to akpakpo ko ji nɛ ɔ nɛ je bonyoku je kɛ ma kɛ fo nɛ mi wa wawɛɛ nitsɛ. To ɔ ngɛ fo tue wawɛɛ mohu, se e nane mɛ zugba. Jehanɛ hu, koli agbo ko ngɛ e hɛngmɛ enyɔ ɔmɛ a kpɛti.

6 To akpakpo ɔ ba su agbosu kɛ e koli enyɔ ɔ he, nɛ e kɛ e he wami tsuo ba hɛ lɛ. Agbosu nɛ ɔ lɛ i na nɛ daa si ngɛ pa a tue ɔ nɛ.

7 I na nɛ to akpakpo ɔ ba tua agbosu ɔ. Akpakpo ɔ mi mi fu wawɛɛ nitsɛ, nɛ benɛ e hɛ agbosu ɔ, e ku e koli enyɔ ɔmɛ. Agbosu ɔ he wami ba ta, nɛ e nyɛ we akpakpo ɔ. Akpakpo ɔ tsɛ̃ lɛ ngɔ fɔ zugba, nɛ e naa e nɔ, nɛ nɔ ko nɔ ko nyɛ we nɛ e kpɔ agbosu ɔ ngɛ e dɛ.

8 Enɛ ɔ se ɔ, to akpakpo ɔ ba wo e he nɔ wawɛɛ nitsɛ, nɛ e bui nɔ́ ko nɔ́ ko. Se benɛ e he wami ɔ ba he si ɔ, e koli ɔ ku. Kɛkɛ nɛ koli agboagbo eywiɛ ba puɛ ngɛ lɔ ɔ nane mi; koli ɔmɛ plɛ a nyahi ngɔ kpee he munomunohi.

9 Koli nyafii ko puɛ kɛ je koli eywiɛ ɔmɛ a ti kake mi. E he wami ɔ ya su leneyi je, kɛ beleku je, kɛ zugba a nɛ a wo he si ɔ nɔ.

10 ⓢ E he wami ɔ ba pue nɔ; e kɛ hiɔwe tabo nɛ ji dodoe ɔmɛ nitsɛnitsɛ hwu ta, nɛ e hɛ ekomɛ ngɔ pue zugba, nɛ e naa a nɔ.

11 Hiɔwe tabo ɔ ganɔ ɔ nitsɛ po, koli nɛ ɔ bui lɛ fɛɛ. Daa ligbi bɔ nɛ a sãã ngɔ haa lɛ ɔ, koli nɛ ɔ tsi nya. Yawɛ we ɔ hu, koli ɔ ble lejɛ ɔ.

12 A pee yayamihi babauu ngɛ Yawɛ we ɔ. A kpa daa ligbi bɔ sami ɔ, nɛ a sake anɔkuale jami ɔ kɛ fɔ he. Koli ɔ ye manye ngɛ nɔ́ tsuaa nɔ́ mi.

13 Kɛkɛ nɛ i nu nɛ bɔfohi enyɔ ngɛ ní sɛɛe. Bɔfo ɔ kake bi e nyɛmi ɔ ke, “Nina nɛ ɔ, mɛni be e maa hi si kɛ yaa si? Hiɔwe tabo ɔ, kɛ Yawɛ we ɔ, mɛni be a maa naa a nɔ kɛ yaa si?”

14 I nu nɛ kaketsɛ ɔ ha lɛ heto ke, “Nɔ́ nɛ ɔ maa ya nɔ ligbi akpe kɛ e nya lafa etɛ sɔuu. Jamɛ a be ɔ mi ɔ, a be mɔtu kɛ gbɔkuɛ bɔhi sãe. Lɔ ɔ se loko a ma bɔni ní tsumi ngɛ Yawɛ we ɔ ekohu kaa sa a.”

Bɔfo Gabriel tsɔɔ nina a sisi

15 Benɛ i ngɛ mɔde bɔe kaa ma hla nina a sisi ɔ, tlukaa a, nɔ ko ji nɛ ɔ nɛ ba daa si ngɛ ye hɛ mi.

16 ⓣ I nu nɛ nɔ ko tu munyu ngɛ Ulai pa a mi ke, “Gabriel, tsɔɔ nyumu ɔ nina a sisi.”

17 Kɛkɛ nɛ Gabriel ba da si ngɛ ye kasa nya. Benɛ e ba a, ye tsui po, nɛ i kɛ ye hɛ mi bu si. Gabriel de mi ke, “Nɔmlɔ adesa, na nɛ o le kaa nina a kɔɔ je mi nyagbe he.”

18 Benɛ e kɛ mi ngɛ munyu ɔ tue ɔ, i sɛ diblii mi, nɛ i kɛ ye hɛ mi bu si. Se e fua mi, nɛ e wo ye nɔ kɛ da si ngɛ he nɛ i ngɛ ɔ.

19 E de mi ke, “Ke Mawu mi mi fu ɔ, nɔ́ nɛ maa nyɛɛ se ɔ, lɔ ɔ ma tsɔɔ mo nɛ ɔ nɛ. Nina a kɔɔ nyagbe be ɔ he.

20 “Agbosu koli enyɔtsɛ ɔ nɛ o na a daa si ha Media kɛ Persia matsɛmɛ ɔmɛ.

21 To akpakpo ɔ daa si ha Hela matsɛ ɔ, nɛ koli agbo ɔ nɛ ngɛ e hɛngmɛ enyɔ ɔmɛ a kpɛti ɔ ji kekleekle matsɛ ɔ nɛ.

22 Jehanɛ, koli eywiɛ ɔmɛ nɛ ba benɛ kaketsɛ ɔ ku ɔ daa si ha matsɛmɛ eywiɛ komɛ nɛ maa je Hela nɔ yemi ɔ mi kɛ ba. Se a ti nɔ ko nɔ ko kɛ kekleekle nɔ ɔ be sɔe.

23 “Ke matsɛ yemi nɛ ɔmɛ a nyagbe be ɔ su ta, nɛ a yayami ɔ mi ba wa bɔ nɛ e sa kaa a gbla a tue ɔ, matsɛ ko ma ba te si. Matsɛ nɛ ɔ maa pee yiwutsotsɛ kɛ nɔ sisilɔ nɛ maa wa tue.

24 E ma kpata níhi a hɛ mi basabasa, nɛ e maa ye manye ngɛ nɔ́ tsuaa nɔ́ peemi mi. Je ma nguanguahi, kɛ ni klɔuklɔu ɔmɛ a nitsɛ e ma a hu, e ma kpata a hɛ mi. He wami nɛ e kɛ ma tsu ní nɛ ɔmɛ ɔ, pi lɛ nitsɛ e he wami.

25 E maa to ga kɛ sisi nihi babauu. E ma wo e he nɔ, nɛ e ma kpata nihi babauu a hɛ mi be mi nɛ a hɛ be a he nɔ. Ganɔhi a ganɔ ɔ nitsɛ po, e maa te si ngɔ wo lɛ. Se a ma kpata e hɛ mi; nɛ tsa pi nɔmlɔ adesa he wami nɛ ma tsu nɔ́ nɛ ɔ.

26 Nina a nɛ kɔɔ gbɔkuɛ kɛ mɔtu bɔ sami ɔmɛ a he nɛ a tsɔɔ mo sisi ɔ maa ba mi. Se amlɔ nɛ ɔ, ngɔɔ kɛ to o yi mi; ejakaa e maa ye be saii loko e maa ba mi.”

27 Imi Daniel ɔ, ye he mi po, nɛ i nu hiɔ ligbi babauu. Pee se ɔ, i te si nɛ i ho ya tsu ní tsumi nɛ matsɛ ɔ ha mi ke ma tsu ɔ. Se kɛ̃ ɔ, nina a gba ye juɛmi nya, nɛ i nui sisi.