Daniel 5

Belshazar tsɛ ma nimeli ní yemi

1 Ligbi ko ɔ, Matsɛ Belshazar tsɛ e ma nimeli akpe ní yemi, nɛ e kɛ mɛ nu dã. Nɔ́ nɛ ɔ sɔ wawɛɛ nitsɛ.

2 Benɛ dã a tsɛ̃ Belshazar nya a, e fa ke a ya ngɔ sika tsu, kɛ sika hiɔ kplu ɔmɛ nɛ e tsɛ Nebukadnezar ya muɔ ngɛ Yawɛ we ɔ mi ngɛ Yerusalem ɔ kɛ ba. E tsɔ ke a ya ngɔ kplu ɔmɛ kɛ ba, konɛ e kɛ e ma nimeli ɔmɛ, e yi ɔmɛ, kɛ e plã amɛ nɛ a nu dã ngɛ a mi.

3 Kɛkɛ nɛ a ya ngɔ sika tsu kplu ɔmɛ nɛ a ya muɔ ngɛ Mawu we ɔ ngɛ Yerusalem ɔ kɛ ba. Matsɛ ɔ, ma nimeli ɔmɛ, e yi ɔmɛ, kɛ e plã amɛ tsuo nu dã ngɛ a mi,

4 nɛ a je mawuhi nɛ a kɛ sika tsu, sika hiɔ, akɔblee, dade, tso, kɛ tɛ pee ɔ a yi.

5 Tlukaa a, nɔmlɔ nine ko je kpo, nɛ e bɔni ní ngmami ngɛ gbogbo nɛ a sa he ɔ he ngɛ matsɛ we ɔ mi. Matsɛ ɔ na nine ɔ nɛ ngɛ ní ɔ ngmae, ejakaa kane la a ngɛ kpɛe saminya ngɛ lejɛ ɔ.

6 Matsɛ ɔ hɛ mi tsake amlɔ, nɛ sawale nu lɛ. E kpɔhi a nya tsuo gbɔjɔ, nɛ e nakutsohi bɔni domi ngɛ e sisi.

7 Kɛkɛ nɛ e kpa ngmlaa wawɛɛ nɛ e de ke nɔ ko nɛ ya ngɔ kunya yeli ɔmɛ, klaali ɔmɛ, kɛ nyɔhiɔ mi hyɛli ɔmɛ kɛ ba. Benɛ a ba a, matsɛ ɔ de mɛ ke, “Nɔ tsuaa nɔ nɛ ma nyɛ maa kane nɔ́ nɛ a ngma nɛ ɔ, nɛ e ma nyɛ maa tsɔɔ mi sisi ɔ, a maa wo lɛ matsɛ tade klɔii nɛ hɛɛ alamua tu su nɛ he jua wa saminya. A kɛ sika tsu kuɛ ní maa wo jamɛatsɛ ɔ kuɛ, nɛ a maa pee lɛ matsɛ se yelɔ ɔ setsɔ.”

8 Matsɛ ga woli ɔmɛ tsuo ba, se a ti nɔ ko nyɛ we nɛ e kane nɔ́ nɛ a ngma a; nɔ ko hu nyɛ we nɛ e tsɔɔ sisi.

9 Matsɛ Belshazar hao wawɛɛ nitsɛ, nɛ e hɛ mi tsake; e ma nimeli ɔmɛ hu pee yaa.

10 Benɛ manyɛ ɔ nu matsɛ ɔ, kɛ ma nimeli ɔmɛ la he ɔ, e ba asa a nɔ he nɛ a ngɛ ní ɔ yee ngɛ ɔ. E de ke, “Nɛnɛ, o yi nɛ na wami kɛ ya neneene! I kpa mo pɛɛ, koo hao, nɛ o tsui ko po.

11 Nyumu ko ngɛ o matsɛ yemi he ɔ nɛ Mawu klɔuklɔu ɔ mumi ɔ ngɛ e mi. Benɛ o tsɛ ngɛ matsɛ yee ɔ, a na kaa nyumu nɛ ɔ ngɛ juɛmi kɛ nile, nɛ e hɛ mi hu ka si kaa mawu ɔmɛ pɛ. Enɛ ɔ he je ɔ, o tsɛ Nebukadnezar wo lɛ nɔkɔtɔma ngɛ womi leli ɔmɛ, klaali ɔmɛ, kunya yeli ɔmɛ, kɛ nyɔhiɔ mi hyɛli ɔmɛ tsuo a nɔ.

12 Nyumu nɛ ɔ nɛ a tsɛɛ lɛ Daniel ɔ, a dloo lɛ nike níhi babauu nɛ a pɔɛ nami. E ngɛ juɛmi saminya. E le ní, nɛ e nyɛɔ nɛ e tsɔɔ nlamihi, munyuhi nɛ a he wa, kɛ laami munyuhi a sisi. Lɔ ɔ he ɔ, tsɔ nɛ a ya ngɔ Daniel, nɛ matsɛ ɔ wo lɛ Belteshazar a kɛ ba, konɛ e ba tsɔɔ mo nɔ́ nɛ a ngma nɛ ɔ sisi.”

Daniel tsɔɔ nɔ́ nɛ a ngma a sisi

13 A ya ngɔ Daniel kɛ ba matsɛ ɔ ngɔ amlɔ nɔuu, nɛ matsɛ ɔ bi lɛ ke, “Anɛ mo ji Daniel ɔ lo? Yuda bi ɔmɛ nɛ tsaatsɛ ya nuu kɛ je Yuda kɛ ba a, a ti nɔ kake ji mo lo?

14 I nu kaa Mawu klɔuklɔu ɔ mumi ɔ ngɛ o mi. I nu kaa o ngɛ juɛmi, nɛ o le ní, nɛ o hɛ mi ka si hulɔ.

15 A ya ngɔ ní leli kɛ kunya yeli nɛ ɔmɛ kɛ ba hiɛ ɔ, konɛ a ba kane nɔ́ nɛ a ngma nɛ ɔ, nɛ a tsɔɔ mi sisi. Se a nyɛ we nɛ a pee.

16 I nu kaa moo lɛɛ o nyɛɔ nɛ o tsɔɔ laami sanehi, kɛ munyuhi nɛ a he wa a sisi. Ke o nyɛ nɛ o kane nɔ́ nɛ a ngma nɛ ɔ, nɛ o nyɛ tsɔɔ mi sisi ɔ, a maa wo mo matsɛ tade klɔii nɛ hɛɛ alamua tu su nɛ he jua wa saminya. A kɛ sika tsu kuɛ ní maa wo o kuɛ, nɛ a maa pee mo matsɛ se yelɔ ɔ setsɔ.”

17 Daniel he nɔ ke, “O nike ní ɔmɛ nɛ a hi si. Ke o suɔ ɔ, kɛ ke nɔ kpa. Nɛnɛ, ma kane nɔ́ nɛ a ngma a ha mo, nɛ ma tsɔɔ mo e sisi.

18 “Nɛnɛ, Mawu nɛ ngɛ hiɔwe lokoo ɔ pee o tsɛ Nebukadnezar matsɛ ngua, nɛ e ha lɛ he wami kɛ hɛ mi nyami.

19 Bɔ nɛ e he wami ɔ kle ha a, je ma amɛ, kɛ nihi nɛ tuɔ gbi slɔɔtoslɔɔto ɔmɛ yeɔ lɛ gbeye; ke a nu e biɛ kɛkɛ sawale nu mɛ. Nɔ́ nɛ e suɔ ɔ, lɔ ɔ e peeɔ. Ke e to kaa e maa gbe nɔ ko ɔ, kɛkɛ e gbe lɛ; ke e to kaa e maa baa nɔ ko yi ɔ, e baa e yi. Ke e to kaa e ma wo nɔ ko nɔ ɔ, kɛkɛ e wo e nɔ; ke e de ke e maa ba nɔ ko si ɔ, kɛkɛ e pee ja.

20 Se akɛnɛ e wo e he nɔ, nɛ e wa tue, nɛ e pee yi wu tso níhi he je ɔ, a je lɛ kɛ je e matsɛ sɛ ɔ nɔ, nɛ e hɛ mi nyami ɔ bɔ lɛ.

21 A fie lɛ kɛ je nimlihi a kpɛti, nɛ e juɛmi pee kaa pu mi lohwe juɛmi. E ya hi nga mi tejihi a kpɛti. E kpe nga kaa na; e hwɔ pu mi, nɛ bɔ́ nɛɛ lɛ hluu. Nyagbe ɔ, e ba kplɛɛ kaa Hiɔwe No Mawu ɔ ngɛ he wami ngɛ nimli adesahi a matsɛ yemi nɔ, nɛ e ngɔɔ kɛ haa nɔ tsuaa nɔ nɛ e suɔ.

22 “Nɛ mo Belshazar, Nebukadnezar bi, o le ní nɛ ɔmɛ tsuo; se kɛ̃ ɔ, o bɛ o he si.

23 O bui Nyɔmtsɛ ɔ nɛ ngɛ hiɔwe ɔ fɛɛ. Kplu ɔmɛ nɛ a ya muɔ ngɛ e we ɔ, o ya ngɔ kɛ ba hiɛ ɔ. O ma nimeli ɔmɛ, o yi ɔmɛ, kɛ o plã amɛ nu dã ngɛ kplu ɔmɛ a mi, nɛ nyɛ je mawuhi nɛ a kɛ sika tsu, sika hiɔ, akɔblee, dade, tso, kɛ tɛ pee ɔ a yi. Mawuhi nɛ a hyɛ we nɔ́, nɛ a nui nɔ́, nɛ a li nɔ́ ko nɔ́ ko ɔ, nyɛ je a yi. Se Mawu ɔ nɛ ngɛ he wami ngɛ o nɔ́ tsuaa nɔ́ nɔ, nɔ nɛ ke e de ke o gbo, kɛkɛ nɛ o ma gbo, aloo ke e ke o hi je mi, nɛ o yi ma na wami ɔ, jamɛ a Mawu ɔ lɛɛ nyɛ wui e hɛ mi nyami.

24 Enɛ ɔ he je nɛ Mawu tsɔ nine nɛ ɔ kɛ ba o ngɔ, konɛ e ba ngma munyu nɛ ɔmɛ ɔ nɛ.

25 “Nɔ́ nɛ a ngma a ji, ‘MENE, MENE, TEKEL, kɛ PARSIN’.

26 E sisi ji nɛ ɔ nɛ: MENE: Mawu kane o matsɛ yemi ligbi ɔmɛ, nɛ e kɛ o matsɛ yemi ɔ ba nyagbe.

27 TEKEL: a ngmɛ mo ngɛ sɛni nɔ, nɛ a na kaa o jiɔ we kulaa.

28 PARSIN: a dla o matsɛ yemi ɔ mi; a ngɔ fa kɛ ha Media bi, nɛ a kɛ fa hu ha Persia bi.”

29 ⓓ Kɛkɛ nɛ Belshazar fa e tsɔli ɔmɛ ke a wo Daniel matsɛ tade klɔii nɛ hɛɛ alamua tu su nɛ he jua wa saminya, nɛ a kɛ sika tsu kuɛ ní nɛ wo e kuɛ. Matsɛ ɔ pee Daniel matsɛ se yelɔ ɔ setsɔ.

30 Jamɛ a nyɔ ɔ mi nɔuu ɔ, a gbe Belshazar, Babilonia matsɛ ɔ;

31 nɛ Media no ɔ nɛ a tsɛɛ Darius ɔ ba ngɔ matsɛ yemi ɔ pani nya. Darius ye jeha nyingmi ekpa kɛ enyɔ jamɛ a be ɔ mi.