Daniel 11

1 “Lɛ ji nɔ nɛ piɛɔ ye he, nɛ lɛ nɛ e faa ye he.

2 Jehanɛ, nɔ́ nɛ ma de mo nɛ ɔ, e ji anɔkuale.” Bɔfo ɔ de ke, “Matsɛmɛ kpahi etɛ ma ba ye Persia nɔ. A se ɔ, matsɛ eywiɛne maa ba, nɛ lɛɛ e ma na ní babauu pe mɛ tsuo kulaa. Nɛ ke be nɛ e ní nami ɔ ba ha nɛ e he wami ba he si ɔ, e maa te si kɛ wo Hela matsɛ yemi ɔ.

Egipt kɛ Siria matsɛ yemi ɔmɛ

3 “Kɛkɛ ɔ, matsɛ katsɛ ko maa ba. E kɛ he wami nɛ nya wa maa ye tsɛ, nɛ nɔ́ nɛ e suɔ ɔ, lɔ ɔ e maa pee.

4 Se ke be nɛ e he wami ɔ ba he si ɔ, e matsɛ yemi ɔ maa gbɛ. A maa dla matsɛ yemi ɔ mi eywiɛ, nɛ ni kpahi nɛ pi e weku li ma ba ye tsɛ ngɛ e nane mi. Se a he wami ɔ, kɛ e nɔ́ ɔ be sɔe.

5 “Egipt matsɛ ɔ he maa wa. Se e ganɔ ɔmɛ a ti nɔ kake he maa wa kulaa pe lɛ, nɛ e matsɛ yemi ɔ hu ma blɛke pe e nɔ́ ɔ.

6 Jeha komɛ a se ɔ, Egipt matsɛ ɔ, kɛ Siria matsɛ ɔ maa pee huɛ, nɛ e kɛ e biyo ma ha Siria matsɛ ɔ. Se huɛ bɔmi nɛ ɔ se be kɛe; nɛ a maa gbe yo ɔ, e huno ɔ, e bi ɔ, kɛ e tsɔli ɔmɛ tsuo nɛ a kɛ lɛ ya a.

7 Pee se ɔ, yo ɔ weku no ko ma ba ye matsɛ. E ma tua Siria matsɛ ɔ tabo ɔ, nɛ e maa sɛ a mɔ ɔ mi, nɛ e maa ye a nɔ.

8 E maa muɔ a mawu ɔmɛ, amaga amɛ, kɛ sika hiɔ kɛ sika tsu ní kpakpa amɛ kɛ ya Egipt. Nɛ e kɛ Siria matsɛ ɔ be ta hwue hu jeha babauu.

9 Lɔ ɔ se ɔ, Siria matsɛ ɔ ma ba tua Egipt. Se e be kɛe nɛ e maa kpale kɛ ho lɛ nitsɛ e zugba nɔ ya ekohu.

10 “Siria matsɛ ɔ bimɛ ma dla kɛ ha ta, nɛ a ma bua tabohi babauu a nya. A maa hia kɛ ya tua a he nyɛli ɔmɛ a mɔ ɔ kaa pa nɛ hia kɛ bee.

11 Egipt matsɛ ɔ mi mi ma fu. E kɛ Siria matsɛ ɔ ma ya hwu ta, nɛ e maa nuu Siria ta buli babauu nyɔguɛ.

12 Nɔ́ nɛ ɔ ma ha nɛ e ma wo e he nɔ, nɛ e maa gbe nimli babauu nitsɛ. Se kɛ̃ ɔ, e kunimi yemi ɔ se be kɛe.

13 “Siria matsɛ ɔ maa kpale e se; nɛ e ma ya bua tabohi babauu nɛ a hiɛ pe kekle ni ɔmɛ a nya. Jeha komɛ a se ɔ, Siria matsɛ ɔ maa kpale ba kɛ ta buli babauu nɛ a he hiɛ pe kekle ni ɔmɛ po. A kɛ ta níhi babauu hu maa ba.

14 Jamɛ a be ɔ mi ɔ, nihi babauu maa te si kɛ wo Egipt matsɛ ɔ. Mo nitsɛ o ma mi bi atuã tsɔli komɛ hu ma tsɔ atuã ngɛ nina ko nɛ a na a he. Se a maa ye a nɔ.

15 Jehanɛ, Siria matsɛ ɔ ma ba sa ma ko nɛ a fia gbogbo ngɔ wo he ɔ yi, nɛ e maa ngɔ ma a. Egipt tabo ɔmɛ be nya nyɛe maa da; a ta buli kpakpa amɛ po a he wami maa ta.

16 Siria matsɛ ɔ maa pee mɛ nɔ́ nɛ e suɔ, nɛ nɔ ko be nyɛe maa te si kɛ wo lɛ. E ma ya da si ngɛ zugba a nɛ a wo he si ɔ nɔ, nɛ zugba a tsuo maa pee e nɔ.

17 “Siria matsɛ ɔ maa to ga bɔ nɛ pee nɛ e nine nɛ su Egipt tsuo nɔ. Lɛ hu e kɛ Egipt matsɛ ɔ maa pee huɛ, nɛ e kɛ e biyo ma ha lɛ. Nɛ yi mi yaya nɛ e to ngɔ wo Egipt matsɛ ɔ he ɔ, e maa gu e biyo nɛ ɔ nɔ kɛ tsu he ní. Se e yi mi tomi ɔ maa pee yaka.

18 Enɛ ɔ se ɔ, e ma ba tua wo nya ma amɛ, nɛ e maa ngɔ mahi babauu. Se tatsɛ ko maa je ma se kɛ ba nɛ e kɛ Siria matsɛ ɔ ma ba kpe. E maa ye Siria matsɛ ɔ nɔ, nɛ Siria matsɛ ɔ kɛ zo maa kpale e se kɛ ho.

19 E ma pue blɔ kɛ ya e mɔ ɔ mi ngɛ lɛ nitsɛ e zugba nɔ. Se haomi maa ba e nɔ ngɛ lejɛ ɔ, nɛ a be lɛ nae hu.

20 “Matsɛ kpa maa ba ngɛ e se. Matsɛ nɛ ɔ maa tsɔ kɛ ba tsu tó pani nya ngɛ ma a dɛ. E maa pee nɔ́ nɛ ɔ, konɛ e na ní babauu. Se be bɔɔ se ɔ, matsɛ nɛ ɔ ma gbo tlukaa nɛ a be lee nɔ́ nɛ gbe lɛ; nɛ pohu pi ta nga nɔ nɛ e ma gbo ngɛ.”

Siria matsɛ yaya a

21 Bɔfo ɔ ya nɔ nɛ e de ke, “Nɔ nɛ ma ba ye tsɛ ngɛ e se ɔ maa pee nɔ ko nɛ bu be e he, nɛ́ e sɛ́ kaa e yeɔ matsɛ. Nɔmlɔ nɛ ɔ maa ba tlukaa, nɛ e kɛ sisimi, kɛ nya mi ngɔngɔɛ munyu tumi ma kpɔ matsɛ yemi ɔ.

22 Nihi nɛ maa te si ngɔ wo lɛ ɔ, e ma kpata a hɛ mi, kɛ Mawu nitsɛ ganɔ nɔkɔtɔma pe kulaa a tsuo.

23 E kɛ je ma kpahi maa pee huɛ, nɛ e maa sisi mɛ. Nihi bɔɔ pɛ ji ni nɛmɛ nɛ maa nyɛɛ e se; se e he wami maa hiɛ babauu.

24 E ma tua zugba ko nɛ ngɛ ní babauu be mi nɛ a hɛ be a he nɔ; nɛ nɔ́ nɛ e tsɛmɛ, kɛ e nɛmɛ po pee we hyɛ ɔ, lɛɛ e maa pee. Lɔ ɔ se ɔ, e maa dla ta yibu ní, kɛ weto ní nɛ e na ngɛ ta mi ɔ kɛ ha e we bi ɔmɛ. E maa to ga, nɛ e ma ya tua mɔhi, se nɔ́ nɛ ɔ se be kɛe.

25 “E maa pee nyumu, nɛ e kɛ tabo babauu ma ya tua Egipt. Egipt matsɛ ɔ hu ma bua tabo babauu nitsɛ a nya, nɛ e kɛ lɛ maa hwu. Se, nɔ se blɔ tsɔɔli komɛ maa so ngɔ wo Egipt matsɛ ɔ he, nɛ e be kunimi yee.

26 E ga woli kpakpahi tete ma ha nɛ e nane ma kpata. A maa gbe e ta buli ɔmɛ babauu, nɛ e tabo ɔ maa gbɛ fĩa.

27 Lɔ ɔ se ɔ, matsɛmɛ enyɔ nɛ ɔmɛ maa hi si ngɛ okplɔɔ kake he, nɛ a maa ye ní. A ma susu ní yayahi a he, nɛ a maa ye a sibi lakpa. Se nɔ́ nɛ a ngɛ hlae ɔ, a nine be nɔ sue; ejakaa be nɛ a to ɔ, be ɔ sui lolo.

28 Siria matsɛ ɔ maa kpale kɛ ho lɛ nitsɛ e zugba nɔ ya kɛ ta yibu ní babauu ɔ nɛ e na a. E ma hla kaa e gu Mawu ma a a jami ɔ. E maa pee e suɔmi nya ní, nɛ lɔ ɔ se ɔ, e maa kpale kɛ ho lɛ nitsɛ e zugba nɔ ya.

29 “Pee se ɔ, e maa kpale ba tua Egipt ekohu. Se jehanɛ lɛɛ e be kunimi yee kaa kekle ɔ.

30 Roma ta lɛhi ma ba tua lɛ, nɛ e tsui maa po. “E kɛ mi mi la maa kpale e se, nɛ e ma hla kaa e gu Mawu ma a a jami ɔ. E maa bu nihi nɛ kua kikɛmɛ a jami ɔ a ga womi tue.

31 ⓩ Ta buli nɛ e wo blɔ ɔ ma ya sɛ Yawɛ we ɔ, kɛ mɔ ɔ mi, nɛ a ma ble lejɛ ɔ. A maa jɔɔ daa ligbi bɔ ɔmɛ sami, nɛ a maa ngɔ amaga ko nɛ he ngɛ gbeye kɛ ya ma Yawɛ we ɔ.

32 Matsɛ ɔ kɛ nya mi ngɔngɔɛ munyu tumi ma puɛ nihi nɛ kua a jami ɔ a juɛmi, nɛ a ma ba nyɛɛ e se. Se ni nɛmɛ nɛ nyɛɛ Mawu se anɔkuale mi ɔ maa da si kpɛii, nɛ a kɛ mɛ maa to ní.

33 Ní leli nɛ ngɛ ma hɛ mi nyɛɛli ɔmɛ a kpɛti ɔ maa tsɔɔ ma mi bi ɔmɛ babauu ní. Se pee se ɔ, a maa gbe a ti ni komɛ ngɛ ta nga nɔ, nɛ a maa sã ni komɛ. A maa ha ní ngɛ ni komɛ hu a dɛ, nɛ a maa nuu mɛ nyɔguɛ.

34 Be mi nɛ a ngɛ Mawu ma mi bi ɔmɛ gbee ɔ, ni komɛ ma ba je ngmlaa ha mɛ kɛ̃. Se ngmlaa jeli nɛ ɔmɛ a ti nihi babauu maa ba ngɛ mɛ nitsɛmɛ a se nami he.

35 A maa gbe ní leli nɛ ɔmɛ a ti ni komɛ. Se se nami mohu maa je mi kɛ ba, ejakaa a maa tsukɔ ma a he. Nɔ́ nɛ ɔ maa ya nɔ hluu kɛ yaa si nyagbe be ɔ nɛ Mawu to ɔ maa ba.

36 ⓐ “Siria matsɛ ɔ maa pee e suɔmi nya ní. E ma wo e he nɔ, nɛ e maa pee lɛ kaa e kle pe mawu ɔmɛ tsuo. Mawu Ope ɔ nitsɛ po, e maa tu musu munyuhi kɛ si lɛ hluu kɛ yaa si be nɛ Mawu maa gbla e tue. Ejakaa nɔ́ nɛ Mawu to kaa e maa pee ɔ, ja e pee.

37 Matsɛ ɔ be mawu ɔmɛ nɛ e nɛmɛ ɔmɛ ja a bue; mawu ɔ nɛ yihi suɔ ɔ hu, e be lɛ bue. Anɔkuale mi ɔ, e be mawu ko mawu ko bue fɛɛ; ejakaa e ma susu kaa e kle pe mɛ tsuo pɛpɛɛpɛ.

38 Nɔ́ nɛ e maa pee mohu ji, e maa wo mawu nɛ buu mɔhi a he ɔ hɛ mi nyami. E maa ke mawu ko nɛ e nɛmɛ ja we hyɛ ɔ sika tsu, sika hiɔ, june, kɛ nike ní kpahi nɛ a he jua wa.

39 E maa ngɔ nihi nɛ jaa ma se mawuhi kɛ bu e mɔ ɔmɛ a he. Nihi nɛ buɔ lɛ ɔ, e maa wo a hɛ mi nyami babauu; e ma ha mɛ blɔ nya nguanguahi, nɛ e maa dla zugba ngɔ ha mɛ.

40 “Ke be nɛ Siria matsɛ ɔ nyagbe be ɔ su ta a, Egipt matsɛ ɔ ma ba tua lɛ. Se Siria matsɛ ɔ maa ngɔ ta zugba lɛhi, okpɔngɔhi, kɛ lɛhi babauu kɛ ba, nɛ e kɛ Egipt matsɛ ɔ ma ba hwu ta wawɛɛ nitsɛ. Kaa bɔ nɛ pa bee ɔ, ja nɛ e maa ngɔ zugba amɛ kakaaka.

41 E ma ya tua zugba a nɛ a wo he si ɔ po, nɛ e maa gbe nihi babauu nitsɛ. Se Edom, Moab, kɛ Amon bi nɛ piɛ ɔ, mɛɛ lɛɛ e nine be a nɔ sue.

42 Ke e ba tua ma nɛ ɔmɛ tsuo ɔ, Egipt tete he be mi jee.

43 E maa ngɔ Egipt june tsuo, sika tsu, sika hiɔ, kɛ ní kpakpahi nɛ a he jua wa. Libia kɛ Sudan ma sɔmɔ lɛ.

44 Se e maa nu sane komɛ kɛ je beleku je kɛ omleyi je, nɛ e tsui maa po. Nɔ́ nɛ ɔ ma ha nɛ e ma kpata nihi babauu a hɛ mi basabasa.

45 E maa ma matsɛ bo tsu agboagbohi ngɛ wo ɔ, kɛ yo ɔ nɛ Yawɛ we ɔ maa si ngɛ nɔ ɔ a kpɛti. Se e ma gbo ngɛ lejɛ ɔ, nɛ nɔ ko be bae nɛ e ba je ngmlaa ha lɛ.”