Ezekiel 40

YAWƐ WE HE Ɔ HE NINA

(40.1—48.35)

A ngɔ Ezekiel kɛ ba Yerusalem

1 Benɛ a nuu wɔ kɛ ho ma se ya a we jeha nyingmi enyɔ kɛ enuɔne ɔ ji jeha nyɔngma kɛ eywiɛ pɛpɛɛpɛ nɛ a kpata Yerusalem ma a hɛ mi. Jeha he ɔ we ligbi nyɔngma a, Yawɛ he wami ba ye nɔ wawɛɛ, nɛ e ngɔ mi kɛ je.

2 ⓡ I na ngɛ nina a mi nɛ Mawu mumi ɔ ngɔ mi kɛ ba Israel zugba a nɔ; nɛ e ngɔ mi ya fɔ yo gagaa ko yi mi. I na nɔ́ ko kaa ma ngɛ yo ɔ nɔ ngɛ ye hɛ mi.

3 ⓢ Mumi ɔ ngɔ mi kɛ ya su ma a he haa; nɛ i na nyumu ko nɛ e he ngɛ kpɛe kaa akɔblee. E hɛɛ nɔ́ susumi kpa, kɛ nɔ́ susumi tso ngɛ e dɛ mi kɛ daa si ngɛ agbo ko nya.

4 E de mi ke, “Nɔmlɔ adesa, bli o hɛngmɛ nɛ o hyɛ nɔ́ saminya; ta tue nɛ o nu nɔ́ tsuaa nɔ́ pɛpɛɛpɛ, nɛ o ngɔ o juɛmi kɛ fɔ nɔ́ tsuaa nɔ́ nɛ ma tsɔɔ mo ɔ nɔ; ejakaa a ngɔ mo kɛ ba hiɛmɛ nɛ ɔ, bɔ nɛ pee nɛ ma ngɔ ní nɛ ɔmɛ kɛ tsɔɔ mo. Nɔ́ tsuaa nɔ́ nɛ o maa na a, yaa nɛ o ya de Israel ma a.”

Agbo nɛ ngɛ beleku je ɔ

5 ⓣ I na Yawɛ we ɔ nɛ a fia gbogbo kɛ bɔle lɛ. Nyumu ɔ ngɔ nɔ́ susumi tso ɔ kɛ susu gbogbo ɔ. Susumi tso ɔ kami maa pee gugue kake kɛ fa. Gbogbo ɔ hiɔwe yami ji susumi tso ɔ kake, nɛ e timi hu ja nɔuu.

6 Jehanɛ e ya agbo nɛ nya blɔ ngɛ beleku je ɔ he. E kuɔ kpoku ɔmɛ kɛ ya su a nyagbe, nɛ e susu agbo ɔ; kɛ je e yi mi kɛ ba sisi ɔ peeɔ susumi tso ɔ kake.

7 Blɔ ngɛ lejɛ ɔ, nɛ tsu etɛ ngɛ hiɔ nɔ, nɛ etɛ hu ngɛ muɔ nɔ. Tsu nɛ ɔmɛ a kami kɛ a blimi tsuo sɔ; eko tsuaa eko ngɛ gugue kake kɛ fa; nɛ gbogbo nɛ e timi ji gugue kake kɛ nine mi blimi enyɔ tsa tsu kɛ tsu. Tsu wawi nɛ ɔmɛ a se ɔ, blɔ ngɛ lejɛ ɔ; blɔ ɔ kami ji gugue kake kɛ fa. Blɔ nɛ ɔ ya sɛ asa agbo ko mi.

8 Nyumu ɔ susu tsu nɛ ɔ hulɔ; e ná gugue enyɔ. Agbo nɛ a guu mi kɛ yaa Yawɛ we ɔ mi ɔ ngɛ hiɛmɛ nɛ ɔ; nɛ agbo ɔ timi ngɛ nyagbe ɔ ji gugue fa.

9

10 (Tsu wayowayo etɛ ɔmɛ nɛ ngɛ muɔ nɔ, kɛ etɛ ɔmɛ nɛ ngɛ hiɔ nɔ ɔ, mɛ tsuo a kami sɔ, nɛ gbogbo nɛ po a kpɛti ɔ hu e timi ngɛ ja nɔuu.)

11 Jehanɛ, nyumu ɔ susu agbo ɔ blimi; e ná gugue etɛ kɛ nine mi blimi enyɔ; nɛ ke a bli agbo ɔ, e peeɔ gugue enyɔ kɛ fa.

12 Kpoku ngɛ tsu wayo tsuaa tsu wayo nya. Kpoku ɔ hiɔwe yami ji nine mi blimi enyɔ, nɛ e nɔ blimi hu nine mi blimi enyɔ. Tsu wawi ɔmɛ a kami kɛ a blimi sɔ; eko tsuaa eko peeɔ gugue kake kɛ fa ngɛ hiɛ, kɛ gugue kake kɛ fa ngɛ hiɛ.

13 Jehanɛ, e susu tsu ɔ kami kɛ gu gbogbo ɔ se; blɔ nɛ ngɛ tsu kake kɛ kake a kpɛti kami ji gugue ekpa kɛ nine mi blimi enyɔ kɛ je tsu kake sinya nya kɛ ya na tsu nɛ tsa nɔ ɔ sinya.

14 A guu tsu nɛ ngɛ nyagbe ɔ mi kɛ ya jee kpo ngɛ kue kpa mi. E susu jamɛ a tsu ɔ hulɔ; e blimi ji gugue enuɔ.

15 Kɛ je gbogbo ɔ he ngɛ agbo ɔ nya kɛ ya su nyagbe tsu ɔ se tsuo peeɔ gugue nyɔngma kɛ enyɔ kɛ fa.

16 Saflɛ puɔ tsɔwitsɔwi ngɛ kpo nɔ je gbogbo ɔmɛ tsuo a mi; ekomɛ hu ngɛ gbogbo ɔmɛ tsuo nɛ po tsu ɔmɛ a mi ɔ a mi; nɛ tãhi nɛ a tɛni ngɛ sinya tso ɔmɛ a si mami ní ɔmɛ tsuo a he.

Kue nɛ ngɛ kpo nɔ je ɔ

17 Nyumu ɔ kɛ mi ya su kue ɔ nɛ ngɛ kpo nɔ je ɔ mi. Tsu nyingmi etɛ tsa a sibi a nɔ ngɛ gbogbo ɔ he. A ka tɛ ngɛ lejɛ ɔ zugba a tsuo

18 kɛ bɔle kue ɔ mi kɛ kpe. Kpɛti kue ɔ ya hiɔwe pe kpo nɔ je nɔ́ ɔ.

19 A guu agbo nɛ ya hiɔwe ko mi ngɛ lejɛ ɔ kɛ yaa kpɛti kue ɔ mi. Nyumu ɔ susu blɔ nɛ ngɛ agbo enyɔ nɛ ɔmɛ a kpɛti, kɛ je yiti je nɔ́ ɔ he kɛ ya su sisi je nɔ́ ɔ he; nɛ e ná gugue nyingmi enyɔ kɛ enuɔ.

Agbo nɛ ngɛ omleyi je ɔ

20 Jehanɛ e nyɛɛ ye hɛ mi kɛ ya omleyi je kɛ ya su kue ɔ nɛ ngɛ kpo nɔ je ɔ we agbo ɔ he. E susu e kami kɛ e blimi.

21 Tsu wayowayo etɛ nɛ ngɛ muɔ nɔ kɛ etɛ nɛ ngɛ hiɔ nɔ ɔ, a klemi sɔ kaa bɔ nɛ kekle agbo ɔ ngɛ ɔ. E kami ji gugue nyɔngma kɛ enyɔ kɛ fa, nɛ e blimi ji gugue ekpa kɛ nine mi blimi enyɔ.

22 Tsu agbo ɔ saflɛ ɔmɛ, e kue ɔ, kɛ tã amɛ ɔ, ke a susu mɛ ɔ, a ngɛ kaa agbo ɔ nɛ hɛ mi kpee beleku je ɔ ní ɔmɛ pɛpɛɛpɛ. A kuɔɔ kpoku kpaago kɛ yaa he; nɛ e kue ɔ ngɛ mi mi je.

23 Kue ɔ nɛ ngɛ mi mi je ɔ we agbo ɔ, kɛ omleyi je nɔ́ ɔ ngɛ hanɔ kaa bɔ nɛ e kɛ leneyi je nɔ ɔ ngɛ ɔ pɛpɛɛpɛ. Nyumu ɔ susu kue enyɔ nɛ ɔmɛ a kpɛti kami, nɛ e ná gugue nyingmi enyɔ kɛ enuɔ.

Agbo nɛ ngɛ leneyi je ɔ

24 Lɔ ɔ se ɔ, nyumu ɔ kɛ mi ya leneyi je; agbo ko nya ngɛ lejɛ ɔ. E susu e sinya tso ɔmɛ, kɛ e kue ɔ. E na kaa a kɛ ekpa amɛ sɔ.

25 Saflɛhi ngɛ agbo ɔ, kɛ kue ɔ mi tsuo kɛ bɔle si kɛ kpe kaa ekpa amɛ nɔuu. Agbo ɔ mi blɔ ɔ kami ji gugue nyɔngma kɛ enyɔ kɛ fa, nɛ e blimi ji gugue ekpa kɛ nine mi blimi enyɔ.

26 A kuɔɔ kpoku kpaago kɛ ya sɛɛ tsu agbo ko mi ngɛ nyagbe ɔ; enɛ ɔ hu nya blɔ kpee kue ɔ mi je. A tɛni tãhi ngɛ agbo ɔ mi sinya tso ɔmɛ a he; kake ngɛ hiɛ, nɛ kake hu ngɛ hiɛ.

27 Agbo ko ngɛ kue ɔ mi ngɛ leneyi je. E susu kɛ je agbo kake he kɛ ya su agbo kpa nɛ ngɛ leneyi je ɔ he, nɛ e ná gugue nyingmi enyɔ kɛ enuɔ.

Kue nɛ ngɛ mi mi je ɔ: agbo nɛ ngɛ leneyi je ɔ

28 Nyumu ɔ kɛ mi ya gu agbo nɛ ngɛ leneyi je ɔ mi kɛ ya su kue nɛ ngɛ mi mi je ɔ mi. E susu agbo ɔ; enɛ ɔ hu kɛ agbo ɔmɛ nɛ ngɛ kpo nɔ je ɔ sɔ.

29 Tsu wawi ɔmɛ, tsu agbo ɔ, kɛ gbogbo nɛ po a mi ɔ tsuo ngɛ kaa agbo kpa amɛ pɛpɛɛpɛ. Saflɛhi ngɛ agbo nya tsu ɔmɛ a he. E susu enɛ ɔmɛ tsuo a kami; e pee gugue ekpa kɛ nine mi blimi enyɔ, nɛ a blimi pee gugue kake kɛ nine mi blimi enyɔ.

30

31 Tsu agbo ko nɛ hɛ mi kpee kue kaketsɛ ɔ ngɛ hiɛ ɔ. A tɛni tãhi ngɛ gbogbo ɔmɛ a he ngɛ hiɔ nɔ kɛ muɔ nɔ tsuo. A kuɔɔ kpoku kpaanyɔ kɛ yaa agbo nɛ ɔ he.

Mi mi je kue ɔ: agbo nɛ ngɛ beleku je ɔ

32 Nyumu ɔ kɛ mi ya gu agbo nɛ ngɛ beleku je ɔ mi kɛ ya sɛ kue nɛ ngɛ we ɔ mi ɔ mi. E susu agbo ɔ, nɛ e ngɛ kaa ekpa amɛ nɔuu.

33 Tsu wawi ɔmɛ, tsu agbo ɔ, kɛ gbogbo ɔmɛ tsuo ngɛ kaa kekle ní ɔmɛ nɔuu. Saflɛhi ngɛ kue ɔmɛ a he kɛ kpe, nɛ saflɛhi ngɛ tsu agbo ɔ hu he. Enɛ ɔmɛ tsuo a kami ji gugue nyɔngma kɛ enyɔ kɛ fa, nɛ a blimi ji gugue ekpa kɛ nine mi blimi enyɔ.

34 A tɛni tãhi ngɛ gbogbo ɔmɛ a he ngɛ hiɔ nɔ kɛ muɔ nɔ tsuo. A kuɔɔ kpoku kpaanyɔ kɛ yaa agbo nɛ ɔ he.

Kue nɛ ngɛ mi mi je ɔ: agbo nɛ ngɛ omleyi je ɔ

35 Jehanɛ nyumu ɔ kɛ mi ya agbo nɛ ngɛ omleyi je ɔ he. E susu enɛ ɔ hulɔ, nɛ e na kaa e kɛ ekpa amɛ sɔ pɛpɛɛpɛ.

36 E ngɛ kaa ekpa amɛ; e ngɛ tsu wawi, kɛ tsu agbo nɛ a tɛni tãhi ngɛ gbogbo ɔmɛ a he; jehanɛ hu saflɛhi ngɛ tsu ɔmɛ a he kɛ kpe. Enɛ ɔmɛ tsuo a kami ji gugue nyɔngma kɛ enyɔ kɛ fa, nɛ a blimi ji gugue ekpa kɛ nine mi blimi enyɔ.

37 Tsu agbo nɛ ɔ hɛ mi tsɔɔ agbo ɔ nya blɔ. A tɛni tãhi ngɛ gbogbo ɔmɛ a he ngɛ hiɔ nɔ kɛ muɔ nɔ tsuo. A kuɔɔ kpoku kpaanyɔ kɛ yaa agbo nɛ ɔ he.

Agbo nɛ ngɛ omleyi je ɔ kasa nya tsuhi

38 Tsu bi ko ngɛ agbo ɔ nya nɛ a kɛ sɛɛ kue ɔ mi ngɛ omleyi je. A guu hiɛ ɔ kɛ ya sɛɛ kue nguaa a nɛ hɛ mi kpee kpo nɔ je ɔ mi. Lohwehi nɛ a gbee nɛ a kɛ lohwe ɔ tsuo sãã sami bɔ ɔ, hiɛmɛ nɛ ɔ a fɔɔ a lo ɔ he ngɛ.

39 Okplɔɔ eywiɛ ngɛ tsu agbo nɛ ɔ mi; enyɔ ngɛ kasa hiɛ, nɛ enyɔ hu ngɛ kasa hiɛ. Okplɔɔ nɛ ɔmɛ a nɔ a gbee lohwehi nɛ a kɛ maa sã bɔ ɔmɛ ngɛ: sami bɔhi jio, yayami pami bɔhi jio, fɔ yemi bɔhi jio.

40 Tsu ɔ se hu okplɔɔ eywiɛ nɛ ngɛ kaa enɛ ɔmɛ maa si. Enyɔ ngɛ hiɔ nɔ, nɛ enyɔ hu ngɛ muɔ nɔ ngɛ omleyi je agbo ɔ nya.

41 Okplɔɔ kpaanyɔ nɛ ɔmɛ a nɔ a gbeɔ lohwe ɔmɛ ngɛ; eywiɛ ngɛ tsu ɔ mi, nɛ eywiɛ hu ngɛ kpo ɔ nɔ.

42 Okplɔɔ kpa eywiɛ ngɛ nɛ a sãã sami bɔ ngɛ a nɔ. Tɛ nɛ a kó a kɛ pee mɛ. Eko tsuaa eko kami ji nine mi blimi etɛ, e blimi hu nine mi blimi etɛ, kɛ e hiɔwe yami nine mi blimi enyɔ. Dadehi tsuo nɛ a kɛ gbee lohwe ɔmɛ nɛ a kɛ sãã bɔ ɔmɛ ɔ, okplɔɔ nɛ ɔmɛ a nɔ a kɛ pueɔ.

43 A ka gbowehi kɛ wo okplɔɔ ɔmɛ a tue kɛ kpe, eko tsuaa eko kami ji dɛ mi blimi kake. Lo ɔ tsuo nɛ a kɛ maa sã bɔ ɔmɛ ɔ, okplɔɔ nɛ ɔmɛ a nɔ a kɛ pueɔ.

44 Jehanɛ nyumu ɔ kɛ mi ba mi mi je kue ɔ mi. Tsu enyɔ ngɛ lejɛ ɔ nɛ a bliɔ a sinya amɛ kɛ baa we ɔ mi je; kake ngɛ omleyi je agbo ɔ nya, nɛ e hɛ mi kpee leneyi je; nɛ kake hu ngɛ leneyi je agbo ɔ nya, nɛ e hɛ mi kpee omleyi je.

45 Nyumu ɔ de mi ke tsu nɛ hɛ mi kpee leneyi je ɔ, osɔfo ɔmɛ nɛ sɔmɔɔ ngɛ Yawɛ we ɔ a nɔ́ ji lɔ ɔ nɛ.

46 Kake ɔ hu nɛ hɛ mi kpee omleyi je ɔ, osɔfo ɔmɛ nɛ sɔmɔɔ ngɛ bɔ sami la tɛ ɔ he ɔ, mɛ hu a nɔ́ ji lɔ ɔ nɛ. Zadok nina ji osɔfo nɛ ɔmɛ tsuo; nɛ mɛ pɛ ji Levi bi nɛ ngɛ he blɔ kaa a ba sɔmɔɔ ngɛ Yawɛ hɛ mi.

Yawɛ we ɔ kɛ kue nɛ ngɛ mi mi je ɔ

47 Nyumu ɔ susu kue nɛ ngɛ mi mi je ɔ. Kɔ nya eywiɛ ɔmɛ tsuo sɔ fiee; eko tsuaa eko kami ji gugue nyingmi enyɔ kɛ enuɔ; nɛ bɔ sami la tɛ maa si ngɛ we ɔ hɛ mi.

48 Jehanɛ e kɛ mi ba Yawɛ we ɔ kue ɔ nya. E susu kue ɔ nya titima a; e blimi ji gugue kake kɛ nine mi blimi enyɔ, nɛ e kami ji gugue etɛ kɛ fa. Gbogbo nɛ ngɛ hiɔ nɔ, kɛ nɔ́ nɛ ngɛ muɔ nɔ ɔ, a timi sɔ, gugue fa kɛ nine mi blimi enyɔ.

49 Kue ɔ kami ji gugue enuɔ, nɛ e blimi ji gugue etɛ. A kuɔɔ kpoku nyɔngma kɛ yaa sinya a nya. Titima hi maa si ngɛ lejɛ ɔ; kake ngɛ hiɔ nɔ, nɛ kake hu ngɛ muɔ nɔ.