Ezekiel 23

Nyɛmiyi enyɔ ɔmɛ

1 Yawɛ kɛ mi tu munyu ekohu.

2 E de mi ke, “Nɔmlɔ adesa, be ko ɔ, yi enyɔ komɛ hi si; nɔ kɛ e senɔ, nɛ ji yo kake bimɛ.

3 A puɛ kulaa kɛ ajuama bɔmi kɛ je a yihe mi tɔɔ ngɛ Egipt. Lejɛ ɔ nɛ nyumuhi fiɛ a nyɔhi a he, nɛ a puɛ mɛ ngɛ.

4 Nɔkɔtɔma a biɛ ji Ohola, nɛ e senɔ ɔ biɛ ji Oholiba. I ngɔ mɛ ngɔ pee ye yihi, nɛ a fɔ bimɛ nyumuhi kɛ yihi ha mi. Biɛ Ohola a daa si ha Samaria, nɛ Oholiba hu daa si ha Yerusalem.

5 Ohola je ye se ya puɛ gba. E kɛ ni nɛmɛ nɛ je Asiria mohu ya pee e suɔli.

6 Ta buli nɛ wo tade he jua wawɛ nɛ hɛɛ alamua tu su, amlaalohi, kɛ asafoatsɛmɛ, mɛ tsuo nihewi okpɔngɔ ta buli nɛ a he ngɛ fɛu nɛ e ya su.

7 Ohola kɛ Asiria nyumuhi nɛ ngɛ biɛ bɔ ajuama, nɛ e ja a we amagahi kɛ ble e he.

8 Yahomi nɛ e je sisi kɛ je e yihe mi ngɛ Egipt, he nɛ a fiɛ e nyɔ he, nɛ a kɛ lɛ bɔ ajuama nɛ a puɛ lɛ ngɛ ɔ, e kpa we.

9 Lɔ ɔ he ɔ, imi hu i ngɔ lɛ ngɔ wo Asiria bi ɔmɛ nɛ mɛ e suɔ wawɛɛ ɔ a dɛ mi.

10 Ni nɛ ɔmɛ kpa e he bo, nɛ a ngɔ e bimɛ nyumu ɔmɛ kɛ yi ɔmɛ tsuo kɛ ho, nɛ lɛ nitsɛ lɛɛ, a kɛ klaate gbe lɛ. E tue gblami nɛ ɔ ba pee fɛu yemi nɔ́ ha yihi tsuo.

11 “Oholiba na nɔ́ nɛ ba awenyɛ ɔ nɔ ɔ, se e ya nɔ nɛ e bɔ ajuama kulaa pe lɛ.

12 Lɛ hu e ya nyɛɛ Asiria nyumu ɔmɛ a se, nɛ e kɛ mɛ pee e suɔli. Ta buli nɛ mia saminyayoo kɛ ta hwumi ní, amlaalohi kɛ asafoatsɛmɛ, mɛ tsuo nihewi nɛ a he ngɛ fɛu nɛ a hii okpɔngɔhi a nɔ nɛ e ya su.

13 I na kaa e puɛ kulaa; nyɛmimɛ yihi enyɔ nɛ ɔmɛ ɔ, slɔɔto ko be a kpɛti.

14 “Oholiba yahomi ɔ nya wa nɛ e hí nɔ́ ko nɔ́ ko peemi. Benɛ e na Babilonia ma ní tsuli a foni nɛ a tɛni ngɛ gbogbo he, bɔ nɛ a ngɔ nɔ́ tsu kɛ pee, nɛ mlɛ mi fimi níhi ngɛ a mlɛ mi, kɛ yi fimi duku gagaaga saminyawiiwi ngɛ a yi mi ɔ, e pee lɛ fɛu tsɔ.

15

16 Amlɔ nɔuu nɛ e na a foni ɔmɛ ɔ, a he pee lɛ akɔnɔ, nɛ e tsɔ kɛ ya tsɛ mɛ ngɛ Babilonia tɔɔ.

17 Babilonia nyumu ɔmɛ ba e ngɔ, nɛ a kɛ lɛ ba hwɔ bɔ nɛ a ma nyɛ. A pee lɛ basabasa, nɛ a ble lɛ kɛ ya si a he pee lɛ tai.

18 Benɛ e ngɛ ajuama bɔe wawɛɛ, nɛ e ha nɔ tsuaa nɔ na le kaa yaholɔ nitsɛnitsɛ ji lɛ ɔ, imi hu e sane ba gbe ye nya jehanɛ; i sume lɛ hu, kaa bɔ nɛ i sume e nyɛmiyo nɔkɔtɔma a.

19 Se kɛ̃ ɔ, e ya nɔ nɛ e bɔ ajuama a; e pee e he yaholɔ kulaa. E kai e yihe mi, benɛ e bɔ ajuama basaa ngɛ Egipt ɔ.

20 E kai e suɔli nɛ a nyumu tso kle kaa tejihi a nɔ́, nɛ a he mi abua nya wa kaa okpɔngɔ kuhi a nɔ́ ɔ.”

21 (Oholiba, o yihe mi zo ní nɛ o tsu benɛ Egipt bi ɔmɛ fiɛ o nyɔ he, nɛ a puɛ mo kɛ pee yaholɔ ɔ, lɔ ɔ o ngɛ hlae nɛ o tsu ekohu nɛ ɔ nɛ.)

Mawu gbla Oholiba tue

22 “Lɔ ɔ he ɔ, Oholiba, bɔ nɛ imi Nyɔmtsɛ Yawɛ, i ngɛ mo dee ji nɛ ɔ nɛ: O suɔli ɔmɛ a sane ba gbe o nya nɛ o sume mɛ hu; se ma ha a maa te si kɛ wo mo; a ma ba sa o yi.

23 Ma ngɔ Babilonia bi ɔmɛ tsuo, kɛ Kaldea bi ɔmɛ, nihi nɛ je Pekod, Shoa, kɛ Koa kɛ ba; Asiria bi ɔmɛ tsuo maa ba. Amlaalohi, kɛ asafoatsɛmɛ, mɛ tsuo nihewi nɛ a he ngɛ fɛu, tsɔli nikɔtɔmahi, kɛ ta buli, mɛ tsuo a maa hi okpɔngɔhi a nɔ kɛ ba.

24 Ta buli kɛ a ta zugba lɛhi babauu, kɛ a tlɔɔkehi kɛ a mi tlomi maa je omleyi je kɛ ba tua mo. A kɛ tsɛ̃i agbohi, tsɛ̃i wawi, kɛ dade pɛɛ ma gba ta kɛ wo o he. Ma ha a maa kojo mo ngɛ mɛ nitsɛmɛ a mlaa nya.

25 Akɛnɛ o wo ye mi mi la he je ɔ, a kɛ abofu maa gbla o tue. A maa poo o gugwɔ, kɛ o tuehi ngɛ o he; a kɛ klaate maa gbe ni komɛ. Ee, a maa ngɔ o binyumu ɔmɛ, kɛ o biyi ɔmɛ kɛ ho, nɛ nihi nɛ maa piɛ ɔ, a maa sã mɛ.

26 A ma kplɔ o he tade, nɛ a maa ngɔ o june saminyawiiwi ɔmɛ.

27 Ma ha o yahomi, kɛ ajuama bɔmi basaa nɛ o hɛɛ mi kɛ je Egipt zugba a nɔ ɔ se maa po kulaa. O be amagahi hyɛe, nɛ o be Egipt bi ɔmɛ kaie gblegbleegble hu.”

28 Bɔ nɛ Nyɔmtsɛ Yawɛ ngɛ dee ji nɛ ɔ nɛ: “Ma ngɔ mo ngɔ wo o he nyɛli a dɛ mi, nihi nɛ a he pee mo tai, nɛ o sume mɛ hu ɔ,

29 a kɛ mo maa ye kaa a he nyɛlɔ. Níhi babauu nɛ o gbo he dengme ɔ tsuo a maa muɔ kɛ ho, nɛ a ma si mo ngɔ fɔ si kɛ o he gu saplapaa. Kɛkɛ ɔ, nihi maa na o yahomi, kɛ ajuama bɔmi basaa a tsuo paa. O pee o he yaholɔ,

30 nɛ o kɛ je ma amɛ ya bɔ ajuama; o ya ja a we amaga amɛ kɛ ble o he.

31 O ya wo o nyɛmiyo ɔ nane, lɔ ɔ he ɔ, tue gblami kplu[5] ɔ nɛ i ha o nyɛmi ɔ, lɔ ɔ nɔuu ma ha mo.”

32 Yawɛ ke, “O nyɛmiyo ɔ kplu ɔ kle; e mi kuɔ hulɔ. O maa nu nɔ́ nɛ ngɛ mi ɔ tsuo. A maa muɔ mo, a maa ye o he fɛu, ejakaa kplu ɔ hyi buɛii.

33 E ma ha o maa pee basaa kaa nɔ nɛ tɔ dã. Gbeye níhi, kɛ he hiami níhi sɔuu lɛ ngɛ o nyɛmiyo Samaria kplu ɔ mi.

34 Ma ha o maa nu, nɛ o ma lɔ kplu ɔ mi. O kɛ he hiami maa fa o yi bwɔmi, nɛ o kɛ kplu kokoe ɔmɛ maa plaa o nyɔ. Imi, Nyɔmtsɛ Yawɛ lɛ i de.”

35 Bɔ nɛ Nyɔmtsɛ Yawɛ ngɛ mo dee ji nɛ ɔ nɛ: “O hɛ je ye nɔ, nɛ o plɛ se ngɔ wo mi; lɔ ɔ he ɔ, o maa na o yahomi, kɛ o we ajuama bɔmi ɔ mi nɔ́.”

Mawu gbla nyɛmiyi enyɔ ɔmɛ tsuo a tue

36 Yawɛ de mi ke, “Nɔmlɔ adesa, anɛ o maa kojo Ohola kɛ Oholiba lo? Lɛɛ, tsɔɔ mɛ ní hiemi níhi gbegbeegbe nɛ a pee ɔ.

37 A puɛ gba kɛ a we amaga jami ɔ; a pue muɔ si, nɛ binyumuwi nɛ a fɔ ha mi ɔ po a kɛ mɛ sã bɔ ha amagahi.

38 Nɔ́ nɛ a pee kɛ si mi hu ji, ligbi ɔ nɛ a ble ye we klɔuklɔu ɔ, jamɛ a ligbi ɔ nɔuu a ble ye Hejɔɔmi ligbi ɔ.

39 Ejakaa benɛ a gbe ye bimɛ ɔmɛ ha a we amaga amɛ ɔ, a ba ye he klɔuklɔu ɔ jamɛ a ligbi ɔ nɔuu, nɛ a ba ble lejɛ ɔ!

40 “Be komɛ po ɔ, a maa tsɔ nihi kɛ ya tsitsaa ya tsɛ nyumuhi kɛ ba ha mɛ. Ke a ba a, nyɛmiyi enyɔ ɔmɛ maa du a he; a ma kpa a hɛ se tsopa, nɛ a kɛ june ma dla a he.

41 A maa hi sɛ saminyayoo nɔ; a maa ngɔ okplɔɔ kɛ e nɔ ní kpakpahi kɛ ya ma si ngɛ a hɛ mi. Tsopa kɛ e he via, kɛ oliv nu nɛ i ha mɛ ɔ hu piɛ he.

42 Kɛkɛ ɔ, hoo peemi, kɛ nyami he a nuɔ ngɛ lejɛ ɔ. A ya ngɔɔ dã tɔli kɛ jeɔ nga a nɔ kɛ ba piɛɔ nihi babauu nɛ ngɛ lejɛ ɔ momo ɔ a he. A ngɔɔ nine si gahi kɛ woɔ yi ɔmɛ a nine si, nɛ a ngɔɔ jlasi saminyawiiwi kɛ fiɔ a yi.

43 Kɛkɛ nɛ i de ye he ke, hyɛ kaa yo nɛ bwɔ kikɛ nɛ ɔ ngɛ ajuama bɔmi mi ɔ, nyumuhi kɛ lɛ pa ngɛ si hwɔe!

44 Nyumuhi ngɛ a ngɔ yae kaa bɔ nɛ a yaa yihi yaholi a ngɔ. Ee, ja pɛpɛɛpɛ a ngɛ Ohola kɛ Oholiba nɔ puee; a pee a he ajamɛatsɛmɛ!

45 Nihi nɛ peeɔ nɔ nɛ da maa bu mɛ fɔ kaa a puɛ gba, nɛ a pue muɔ si hulɔ; ejakaa a ngɔ yahomi kɛ pee a ní tsumi, nɛ a pue muɔ si.”

46 Bɔ nɛ Yawɛ ngɛ dee ji nɛ ɔ nɛ: “Ma ha yakayaka nimli babauu ma ba wo a he gbeye, nɛ a maa ha a níhi.

47 Yakayaka nimli nɛ ɔmɛ maa fia mɛ tɛ, nɛ a ma ja mɛ klaate; a maa gbe a bimɛ, nɛ a maa mɛ a we ɔmɛ a he la.

48 Ma ha yahomi se maa po ngɛ zugba a nɔ, konɛ a kɛ bɔ yihi tsuo kɔkɔ nɛ a ko tsu yahomi ní nɛ nyɛmiyi enyɔ ɔmɛ tsu ɔ gblegbleegble.

49 Nɛ nyɛ, nyɛmiyi enyɔ nɛ ɔmɛ, ma gbla nyɛ tue kaa nyɛ bɔ ajuama nɛ nyɛ ya ja amagahi. Lɔ ɔ loko nyɛ maa le kaa imi ji Yawɛ.”