Ezekiel 18

Nɔ tsuaa nɔ maa bu e ní tsumi he akɔtaa

1 Yawɛ kɛ mi tu munyu ekohu, nɛ e de mi ke,

2 ⓓ “Abɛ nɛ ɔ nɛ kɔɔ zugba a he, nɛ Israel bi ɔmɛ ngɛ bue kpamisa ke, ‘Tsɛmɛ ɔmɛ ye wai yiblii ngmlikiti, nɛ bimɛ ɔmɛ mohu a lungu fĩa’ a, kɛ a ngɛ tsɔɔe kɛɛ ɔ?”

3 Nyɔmtsɛ Yawɛ ke, “I ngɛ ye he kita kae ke, nyɛ be abɛ nɛ ɔ bue ngɛ Israel zugba a nɔ hu.

4 Ye níhi ji nimli ɔmɛ tsuo, tsɛ ɔ kɛ e bi ɔ, ye níhi ji mɛ tsuo; nɔ nɛ peeɔ yayami ɔ, lɛ nɔuu lɛ ma gbo.

5 “Ke nɔ ko ji dalɔ ɔ, e yeɔ dami sane, nɛ e peeɔ nɔ́ nɛ da.

6 E ja we Israel amaga amɛ, nɛ e yi ní nɛ a kɛ sã bɔ ha mɛ ngɛ yo ɔmɛ a nɔ. Jehanɛ hu, e nyɛɛ we e nyɛminyumu e yo se nɛ e ble lɛ; nɛ e yɛ yo nɛ ku nine ngɔ.

7 E wɛ nɔ ko yi mi. Ke nɔ ko kɛ nɔ́ ko ba to lɛ awaba a, e kpaleɔ kɛ haa lɛ. Ke hwɔ ngɛ nɔ ko yee ɔ, e haa lɛ niye ní; nɛ ke nɔ ko hɛɛ e he gu ɔ, e haa lɛ he ha nɔ́.

8 Ke e pa sika ha nɔ ko ɔ, e he we hekpa. E yɛ he nɛ a ngɛ yayami pee ngɛ, konɛ yayami ko sã lɛ. E kojoɔ nɔ kɛ e nyɛmi a kpɛti sane anɔkuale mi.

9 ⓔ Kikɛmɛ a nɔmlɔ nɛ buɔ ye gbi tue, nɛ e bɔɔ mɔde, nɛ e yeɔ ye mlaa amɛ a nɔ pɛpɛɛpɛ ɔ, dalɔ ji lɛ; niinɛ, e yi ma na wami.” Nyɔmtsɛ Yawɛ lɛ de.

10 “Jehanɛ, ke nyumu nɛ ɔ ngɛ binyumuyo ojo fialɔ nɛ pueɔ muɔ si, nɛ e

11 peeɔ ní nɛ ɔmɛ nɛ e tsɛ pee we hyɛ ɔ, e yeɔ ní nɛ a kɛ sã bɔ ha amaga amɛ ngɛ yo ɔmɛ a nɔ, nɛ e nyɛɛɔ e nyɛmi e yo se nɛ e bleɔ lɛ,

12 e waa ohiatsɛmɛ kɛ dɛgutsɛmɛ yi mi, e fiaa nihi ojo, e kpale we nɔ́ nɛ a kɛ ba to awaba kɛ ha we nɔtsɛ, e jaa amagahi, e peeɔ ní hiemi níhi,

13 nɛ e paa sika kɛ haa nɔ, nɛ e heɔ hekpa a, anɛ nɔmlɔ kaa kikɛ nɛ ɔ yi nɛ na wami lo? Dɛbi! E yi be wami nae kɔkɔɔkɔ! Ní hiemi ní nɛ ɔmɛ tsuo nɛ e pee ɔ a he ɔ, e ma gbo. E gbenɔ ɔ sa lɛ nitsɛ.

14 “Jehanɛ, waa ngɔ lɛ kaa nyumu nɛ ɔ hu ngɛ binyumu ko. Binyumu nɛ ɔ na bɔ nɛ e tsɛ ɔ ngɛ, kɛ e yayamihi nɛ e ngɛ pee ɔ tsuo; se e ye gbeye, nɛ e ya wo we e tsɛ ɔ nane.

15 E ja we Israel amaga amɛ, nɛ e yi ní nɛ a kɛ sã bɔ ha mɛ ngɛ yo ɔmɛ a nɔ, nɛ jehanɛ hu, e nyɛɛ we e nyɛminyumu e yo se nɛ e ble lɛ.

16 E wɛ nɔ ko yi mi, e fiɛ ojo. Ke nɔ ko kɛ nɔ́ ko ba to lɛ awaba a, e kpaleɔ nɔ́ nɛ a kɛ ba to awaba a kɛ haa nɔtsɛ. Jehanɛ hu, ke hwɔ ngɛ nɔ ko yee ɔ, e haa lɛ niye ní, nɛ ke nɔ ko hɛɛ e he gu ɔ, e haa lɛ heha nɔ́.

17 E yɛ he nɛ a ngɛ yayami pee ngɛ, konɛ yayami ko sã lɛ. Ke e pa sika ha nɔ ko ɔ, e he we hekpa. E yeɔ ye mlaa amɛ a nɔ pɛpɛɛpɛ. Kikɛmɛ a binyumu nɛ ɔ be gboe ngɛ e tsɛ yayami ɔmɛ a he, se mohu, niinɛ, e yi ma na wami.

18 E tsɛ ɔ lɛɛ, e waa nihi yi mi, e kpɔ̃ɔ̃ e nyɛmi nɔ́ ngɛ e dɛ, nɛ e peeɔ nɔ́ nɛ dɛ ngɛ e ma a mi; lɔ ɔ he ɔ, e ma gbo ngɛ e yayami ɔmɛ a he.

19 “Se nyɛ biɔ ke, Mɛni he je bi nɛ́ nɔ́ ngɛ e tsɛ yayamihi nɛ e pee ɔ a he ɔ? Ke bi ko yeɔ dami sane, nɛ e peeɔ nɔ́ nɛ da, nɛ e yeɔ mlaa amɛ a nɔ ɔ, niinɛ, e yi ma na wami.

20 ⓕ Nɔ nɛ peeɔ yayami ɔ, lɛ nɔuu lɛ ma gbo. Bi be nɔ́ nae ngɛ e tsɛ yayamihi a he, nɛ tsɛ hu be nɔ́ nae ngɛ yayamihi nɛ e bi pee ɔ a he. Nɔ nɛ peeɔ nɔ́ nɛ da a ma na hiɔwo kpakpa, se nɔ nɛ peeɔ yayami ɔ, a maa gbla e tue ngɛ yayamihi nɛ e pee ɔ a he!

21 “Ke yayami peelɔ kpa yayami peemi, nɛ e yeɔ ye mlaa a nɔ, nɛ e peeɔ nɔ́ nɛ da a, e be gboe; niinɛ, e yi ma na wami.

22 A kɛ e yayami ɔmɛ tsuo maa pa lɛ; e yi ma na wami, ejakaa e peeɔ nɔ́ nɛ da.”

23 Bɔ nɛ Nyɔmtsɛ Yawɛ ngɛ bie ji nɛ ɔ nɛ: “Anɛ i naa yayami peelɔ ɔ gbenɔ he bua jɔmi lo?” “Dɛbi, nɔ́ nɛ i suɔ mohu ji kaa e maa kpale kɛ je e blɔ yayami ɔ nɔ, nɛ e yi nɛ na wami.

24 “Se ke nɔ nɛ peeɔ nɔ́ nɛ da jɔɔ kpakpa peemi, nɛ e bɔni ní hiemi níhi tsuo nɛ yayami peeli peeɔ peemi ɔ, anɛ e yi ma na wami lo? Dɛbi, kpakpa nɛ e pee sa a tsuo a be ekoeko kaie hu. E ma gbo ngɛ e tɔmi nɛ e tɔ, kɛ yayamihi nɛ e pee ɔ a he.

25 “Nyɛ deɔ ke, ‘Nɔ́ nɛ Nyɔmtsɛ ɔ pee ɔ dɛ.’ Israel bi, nyɛɛ bu mi tue. Nyɛ susuɔ kaa bɔ nɛ i peeɔ níhi ɔ dɛ lo? Anɛ pi nyɛ mohu nɛ nyɛ ní peepee ɔmɛ dɛ lo?

26 Ke nɔ nɛ peeɔ nɔ́ nɛ da kpa nɔ́ nɛ da peemi, nɛ e ya pee yayami, nɛ e gbo ɔ, e gbo ngɛ e he yayami ɔ mi.

27 Jehanɛ hu, ke nɔ nɛ peeɔ yayami kpa yayami peemi, nɛ e ye dami sane, nɛ e pee nɔ́ nɛ da a, e ma he e yi wami.

28 Ejakaa jamɛatsɛ ɔ pia e he, nɛ e kpale kɛ je e tɔmi ɔmɛ a mi; niinɛ, e yi ma na wami, e be gboe.

29 Se nyɛ Israel ma a, nyɛ deɔ ke, ‘Nɔ́ nɛ Nyɔmtsɛ ɔ pee ɔ dɛ.’ Anɛ imi lɛ i pee we nɔ́ nɛ da lo? Anɛ pi nyɛ Israel ma a mohu nɛ nyɛ pee we nɔ́ nɛ da lo?

30 “Lɔ ɔ he ɔ, imi Nyɔmtsɛ Yawɛ nitsɛ ma kojo Israel ma a tsuo; nɔ tsuaa nɔ ɔ, bɔ nɛ e ba e je mi ha a nɔ ma da kɛ kojo lɛ. Nyɛ kpa yayami ɔmɛ tsuo nɛ nyɛ ngɛ pee ɔ mɔ, konɛ nyɛ yayami ɔmɛ ko kpata nyɛ hɛ mi.

31 Yayamihi tsuo nɛ nyɛ pee kɛ si mi ɔ, nyɛ sake mɛ ngɔ pue he. Nyɛ tsake, nɛ́ nyɛ na juɛmi he, kɛ tsui he. Israel ma, mɛni he je nyɛ ngɛ hlae nɛ nyɛ hɛ mi nɛ kpata a?

32 Imi lɛɛ i sume kaa nyɛ gbo. Lɔ ɔ he ɔ, nyɛ kpa yayami peemi, konɛ nyɛ yi nɛ na wami.” Nyɔmtsɛ Yawɛ lɛ de.