Yeremia 7

Yeremia ya fiɛ ngɛ Yawɛ we ɔ

1 Yawɛ tsɔ mi ke ma ya da sɔlemi we ɔ agbo ɔ mi, he nɛ Yuda bi ɔmɛ guu kɛ ya jaa Yawɛ ɔ. E de mi ke ma ya da lejɛ ɔ, konɛ ma ngɔ Yawɛ Tabohiatsɛ Israel Mawu ɔ sɛ gbi kɛ ha mɛ ke, “Nyɛ tsake nyɛ je mi babɛ, kɛ nyɛ ní peepee, konɛ ma ha nɛ nyɛɛ hi hiɛmɛ nɛ ɔ daa.

2

3

4 Munyuhi nɛ nihi tuɔ nɛ a kɛ sisiɔ nyɛ ɔ, nyɛ ko he ye. A deɔ nyɛ ke, ‘Yawɛ we ɔ ji nɛ ɔ nɛ! Yawɛ we ɔ ji nɛ ɔ nɛ! Yawɛ we ɔ ji nɛ ɔ nɛ!’

5 “Nyɛ tsake nyɛ je mi babɛ; kɛ nyɛ ní peepee. Nyɛɛ kɛ nyɛ nyɛmimɛ nɛ hi si saminya.

6 Nyɛ ko wa nibwɔhi, loo awusahi, loo yalɔyihi yi mi. Nyɛ ko pue nɔ ko muɔ si yaka gu ngɛ zugba nɛ ɔ nɔ. Nyɛ ko ya nyɛɛ mawu kpahi a se; ke nyɛ pee ja a, nyɛ hɛ mi ma kpata.

7 Ke nyɛ tsake ɔ, zugba nɛ ɔ nɛ i ngɔ kɛ ha nyɛ nɛmɛ blema ko ɔ, ma ha nɛ nyɛ maa hi nɔ, nɛ e maa pee nyɛ weto ní.

8 “Nyɛɛ hyɛ, lakpa munyuhi nɛ a he be se nami ɔ, nyɛɛ lɛɛ lɔ ɔmɛ nyɛ heɔ yeɔ.

9 Nyɛ juɔ, nyɛ pueɔ muɔ si, nyɛ puɛɔ gba, nyɛ kaa lakpa kita, nyɛ sãã tsopa kɛ e he via kɛ haa Baal, nɛ nyɛ ya nyɛɛɔ mawu kpahi nɛ nyɛ li mɛ a se.

10 Ke nyɛ pee níhi nɛ i hiee nɛ ɔ ta a, nyɛ baa nɛ nyɛ ba daa si ngɛ ye hɛ mi, ngɛ imi nitsɛ ye we nɛ ɔ mi, nɛ nyɛ deɔ ke, ‘Oo, a he wa yi wami momo!’ Konɛ nyɛ ya pee musu ní nɛ ɔmɛ tsuo ekohu lo?

11 ⓙ E peeɔ nyɛ kaa ye we ɔ, juli a laami he, pi ja? Nyɛ na nɛ nyɛɛ le kaa níhi nɛ nyɛ ngɛ pee ɔ, i na kɛ ye hɛngmɛ. Imi, Yawɛ lɛ i de.

12 ⓚ Nyɛɛ ya Shilo[2], kekleekle ma, he nɛ i hla kaa a ja mi ngɛ ɔ nɛ nyɛ ya hyɛ bɔ nɛ i pee lejɛ ɔ ngɛ ye ma Israel he yayami ɔmɛ a he.

13 Nyɛ pee yayami nɛ ɔmɛ tsuo, nɛ i tu munyu kɛ tsɔɔ nyɛ nɔtonɔto, se nyɛ bui tue fɛɛ. Ke i tsɛ nyɛ hu nyɛ he we nɔ.

14 Lɔ ɔ he ɔ, bɔ nɛ i pee Shilo ɔ, ja nɔuu ma pee imi nitsɛ ye we nɛ nyɛ ngɔ nyɛ hɛ ngɔ fɔ nɔ nɛ ɔ. Hiɛmɛ nɛ ɔ nɛ i ngɔ kɛ ha nyɛ nɛmɛ, kɛ nyɛ nitsɛmɛ ɔ, bɔ nɛ i pee Shilo ɔ, ja ma pee lɛ.

15 Ma fie nyɛ kɛ je hiɛ ɔ kaa bɔ nɛ i fie nyɛ nyɛmimɛ ɔmɛ tsuo, nɛ ji Efraim nina a. Imi, Yawɛ lɛ i de.”

Ma a gbo tue

16 Yawɛ de mi ke, “Yeremia, koo fa kue ha ma nɛ ɔ. Ko kpa mi pɛɛ ha mɛ; koo da mi ha mɛ, ejakaa i be mo tue bue.

17 Níhi nɛ a ngɛ pee ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ ɔ, o hyɛ we lo?

18 ⓛ Bimɛ lɛɔ lɛ́, nɛ tsɛmɛ slɛɔ la, nɛ nyɛmɛ pɔtɔɔ ma nɛ a kɛ sãã abolo kɛ haa yo mawu ɔ nɛ a tsɛɛ Hiɔwemanyɛ ɔ. Jehanɛ se hu, a kɛ wai sãã bɔ kɛ haa mawu kpahi, konɛ a kɛ wo ye mi mi la.

19 Se anɛ imi ye mi mi la a ngɛ woe ɔ lo? Dɛbi! Mɛ nitsɛmɛ a he lɛ a ngɛ pee; a kɛ ma kpata mɛ nitsɛmɛ a hɛ mi.

20 Lɔ ɔ he ɔ, imi Nyɔmtsɛ Yawɛ, ma plɛ ye mi mi fumi nɛ nya wa kaa la nɛ ngɛ tsoe plamplam nɛ hí gbemi ɔ kɛ pue we nɛ ɔ nɔ. Ye mi mi ma fu nimli, lohwehi, tsohi, kɛ ngmɔ niba ní tsuo.

21 “Ye ma, nyɛ sãã bɔ ɔmɛ ekomɛ ngɛ bɔ sami la tɛ ɔ nɔ kɛ ya siɔ a nglaa, nɛ ekomɛ lɛɛ nyɛ ngɛ he blɔ nɛ nyɛ yeɔ. Se nɔ́ nɛ imi Tabohiatsɛ Israel Mawu ɔ, i ngɛ nyɛ dee ji kaa nyɛ ma nyɛ maa ye lɛ tsuo faa.

22 Benɛ i je nyɛ nɛmɛ ɔmɛ kɛ je Egipt zugba a nɔ ɔ, i wui mɛ mlaa ko mlaa ko ngɛ sami bɔ, loo bɔ kpa komɛ a he.

23 Mlaa nɛ i wo mɛ ji a bu mi, konɛ ma pee a Mawu, nɛ a pee ye ma. I de mɛ ke mlaa nɛ i wo mɛ ɔ, a ye nɔ, konɛ e hi ha mɛ.

24 Se nɔ́ nɛ i de mɛ ɔ, a bui tue fɛɛ; nɔ́ nɛ i ke a pee ɔ hu a pee we. Mohu, nɔ́ tsuaa nɔ́ nɛ a juɛmi de mɛ ke a pee ɔ, lɔ ɔ a kpliiɔ a tsui nɛ hyi kɛ yayami ɔ nɛ a peeɔ. Enɛ ɔ he je ɔ, a ya se, se pi hɛ mi.

25 Kɛ je ligbi ɔ nɛ nyɛ nɛmɛ ɔmɛ je Egipt hluu kɛ ba si mwɔnɛ ligbi nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ daa be tsuaa be.

26 Se nɔ ko nɔ ko bui mɛ tue; sɛ gbi ɔ hu nyɛ ngɔɛ. Nyɛ wa tue mohu, nɛ nyɛ ya nɔ pee yayami kulaa pe nyɛ nɛmɛ ɔmɛ.

27 “Lɔ ɔ he ɔ, Yeremia, o maa tu munyu nɛ ɔmɛ tsuo kɛ tsɔɔ ye ma a, se a be mo tue bue; o ma tsɛ mɛ, se a be nɔ hee.

28 De mɛ ke ma nɛ ɔ bui imi Yawɛ, a Mawu ɔ; a tue nɛ i gbla a hu a kase we ní kɛ ji mi. Anɔkuale laa pɛsɛpɛsɛ; munyu ‘anɔkuale’ ɔ po nɔ ko pa wui nɔ ta hu.

Yakayaka níhi ngɛ Hinom kɔ̃ ɔ mi

29 “Nyɛ sã nyɛ yi nɔ nɛ nyɛ sake bwɔmi ɔ pue he; nyɛɛ wo yana nɛ nyɛɛ ye kɔmɔ ngɛ yoku kpataa amɛ a nɔ, ejakaa imi Yawɛ ɔ, ye mi mi fu ye ma a, nɛ i kua mɛ.

30 “Yuda bi ɔmɛ pee yayami. A ngɔ a we amagahi nɛ i hiee ɔ ba to ye we ɔ nɛ a kɛ ble we ɔ.

31 ⓜ A ya ma bɔ sami la tɛ ko ngɛ Hinom kɔ̃ ɔ mi, konɛ a sã a binyumu ɔmɛ, kɛ a biyi ɔmɛ ngɛ nɔ. A wo bɔ sami la tɛ ɔ biɛ ke Tofet. I wui mɛ mlaa ke a pee nɔ́ ko kaa kikɛ nɛ ɔ; nɔ́ nɛ ɔ bɛ ye yi mi po hyɛ.

32 Lɔ ɔ he ɔ, be ma nɛ a be lejɛ ɔ tsɛe ke Tofet, loo Hinom kɔ̃ hu, se mohu Awiyemi kɔ̃. A maa pu nihi ngɛ lejɛ ɔ, ejakaa a be he kpa ko nae hu.

33 Ni gbogboe ɔmɛ maa pee lohwe pɛlitsɛmɛ, kɛ nga mi lohwehi a niye ní, nɛ nɔ ko nɔ ko be mɛ fiee.

34 ⓝ Zugba a ma plɛ pee nga kplanaa. Ma ha nɛ nyami, bua jɔmi, kɛ ayɛflo he ní peemi hoo ɔ se maa po ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ.