Yawɛ sɛ gbi nɛ kɔɔ Filistia he
1 ⓩ Loko Egipt matsɛ ɔ ya tua Filistia a, Yawɛ kɛ mi tu munyu nɛ kɔɔ Filistia he.
2 Yawɛ ke, “Hyɛ! Nyu babauu je omleyi je kɛ ma kaa pa nɛ hia lalaala. Nyu nɛ ɔ ma ba ha zugba a nɔ tsuo; e maa ha mahi, nimli, kɛ nɔ́ tsuaa nɔ́ nɔ. Ngmlaa maa je nyumuhi po a nya, nɛ nɔ tsuaa nɔ maa wo yana ngɛ zugba a nɔ.
3 A maa nu nɛ okpɔngɔhi a nane kokloto ngɛ si sie glɛi, glɛi, glɛi! A maa nu nɛ zugba lɛhi a nane ngɛ pɛe kplakatsa, kplakatsa, kplakatsa! Tsɛmɛ be plɛe nɛ a hyɛ a bimɛ; a nine mi maa je wu.
4 Be ɔ su nɛ a ma kpata Filisti bi ɔmɛ, kɛ a huɛmɛ ɔmɛ tsuo nɛ piɛ ɔ, Tiro, kɛ Sidon a hɛ mi. Imi, Yawɛ nitsɛ ma kpata Filisti bi ɔmɛ, ni nɛmɛ tsuo nɛ je Kreta wo ɔ nya kɛ ba a a hɛ mi.
5 Amanehlu agbo ba Gaza bi ɔmɛ a nɔ, nɛ Ashkelon bi ɔmɛ pee dii. Filisti bi ɔmɛ nɛ piɛ ɔ, mɛni be a maa ye kɔmɔ kɛ ya si?
6 Ngmlaa je nyɛ nya nɛ nyɛ bi ke, ‘Yawɛ klaate, mɛni be o ma kpa ní tsumi? Yaa sɛ o kpo ɔ mi, nɛ o jɔɔ o he, nɛ o pee dii!’
7 Se kɛ klaate ɔ maa jɔɔ e he kɛɛ, be mi nɛ i ha lɛ ní tsumi ke e tsu ɔ? I fa klaate ɔ ke e ya tua Ashkelon bi ɔmɛ, kɛ ni nɛmɛ nɛ ngɛ wo ɔ nya a.”