Yeremia 42

Ma a de Yeremia ke e fa kue ha mɛ

1 Jehanɛ Karea bi Yohanan, Heshaya bi Azaria, kɛ tatsɛmɛ ɔmɛ, kɛ ma a tsuo; nimli wawi kɛ nimli nguahi

2 ba, nɛ a ba de mi ke, “Wa kpa mo pɛɛ nɛ o pee nɔ́ nɛ wa ma bi mo ɔ ha wɔ! Kpa Yawɛ, wa Mawu ɔ pɛɛ ha waa kɛ nihi tsuo nɛ a yi na wami ɔ. Be ko ɔ, wa he hiɛ babauu, se piɔ lɛɛ wɔ nihi bɔɔ pɛ lɛ piɛ, kaa bɔ nɛ mo nitsɛ o ngɛ hyɛe ɔ.

3 Kpa Yawɛ, wa Mawu ɔ pɛɛ konɛ e tsɔɔ wɔ blɔ nɛ wa maa nyɛɛ nɔ, kɛ nɔ́ nɛ sa wɔ peemi.”

4 I he nɔ ke, “Saminya! Ma kpa Yawɛ, wa Mawu ɔ pɛɛ ha nyɛ, kaa bɔ nɛ nyɛ bi ɔ; nɛ nɔ́ tsuaa nɔ́ nɛ Yawɛ ma de mi ɔ, ma ba bɔ nyɛ. I be nyɛ nɔ́ ko nɔ laae.”

5 Mɛ hu a de mi ke, “Sɛ gbi tsuaa sɛ gbi nɛ Yawɛ, wa Mawu ɔ ma ha mo ke o ba de wɔ ɔ, wa maa ye nɔ. Ke wa pee we ja a, Yawɛ nitsɛ nɛ ye odase kɛ si wɔ!

6 Wa suɔ jio, wa sume jio, wa maa bu Yawɛ, wa Mawu ɔ nɛ wa tsɔ mo e ngɔ ɔ tue, bɔ nɛ pee nɛ e hi ha wɔ. Yawɛ, wa Mawu ɔ, wa maa bu lɛ tue.”

Yawɛ ha Yeremia heto

7 Ligbi nyɔngma se ɔ, Yawɛ kɛ mi tu munyu;

8 lɔ ɔ he ɔ, i kpee Karea bi Yohanan, kɛ asafoatsɛmɛ ɔmɛ tsuo nɛ piɛ e he ɔ, kɛ ma a tsuo, ni wawi kɛ ni nguahi,

9 nɛ i de mɛ ke, “Yawɛ, Israel Mawu ɔ nɛ nyɛ tsɔ mi e ngɔ ke ma ya kpa lɛ pɛɛ ha nyɛ ɔ, bɔ nɛ e de ji nɛ ɔ nɛ:

10 ‘Ke nyɛ maa hi zugba nɛ ɔ nɔ ɔ, lɛɛ ma gbaa nyɛ, nɛ i be nyɛ hɛ mi kpatae; ma to nyɛ si, nɛ i be nyɛ hiae hu. E dɔ mi babauu kaa i gbla nyɛ tue kaa kikɛ nɛ ɔ.

11 Nyɛ ko ye Babilonia matsɛ ɔ gbeye hu. I kɛ nyɛ ngɛ, nɛ ma je nyɛ kɛ je e dɛ mi.

12 Ma na nyɛ mɔbɔ, nɛ lɛ hu e maa na nyɛ mɔbɔ, nɛ e ma ha nɛ nyɛɛ kpale kɛ ya nyɛ nitsɛmɛ nyɛ zugba a nɔ. Imi, Yawɛ lɛ i de.’

13 “Se nyɛ nihi nɛ nyɛ piɛ ngɛ Yuda a, nyɛ ko de ke nyɛ be Yawɛ, nyɛ Mawu ɔ tue bue; nyɛ ko de ke nyɛ be zugba nɛ ɔ nɔ hie. Nyɛ ko de ke, ‘Dɛbi, wa yaa nɛ wa ya hi Egipt zugba a nɔ; ta ba be wɔ nae ngɛ lejɛ ɔ; wa be ta titimati ko hu he nue, nɛ hwɔ be wɔ yee hulɔ.’ Ke nyɛ de ja a, lɛɛ bɔ nɛ Yawɛ Tabohiatsɛ, Israel Mawu ɔ ngɛ dee ji nɛ ɔ nɛ: ‘Ke nyɛ pee nyɛ yi mi kaa nyɛ ma ya hi Egipt ɔ,

14

15

16 lɛɛ ta a nɛ nyɛ ngɛ gbeye yee ɔ ma ba na nyɛ ngɛ lejɛ ɔ; mi mi hwɔ nɛ nyɛ tsui ngɛ poe ngɛ he ɔ, lɔ ɔ hu maa nyɛɛ nyɛ se, nɛ Egipt zugba a nɔ nɔuu nyɛ ma gbo ngɛ.

17 Nyɛ ti nihi tsuo nɛ maa pee a yi mi kaa a ma ya hi Egipt ɔ, ke a nɔɛ ta a, lɛɛ mi mi hwɔ, loo gbenɔ hiɔ maa gbe mɛ. Tue gblami nɛ i kɛ maa ba jamɛatsɛmɛ ɔmɛ a nɔ ɔ, nɔ ko nɔ ko be piɛe, nɛ nɔ ko nɔ ko hu he be mi jee.’

18 “Yawɛ Tabohiatsɛ, Israel Mawu ɔ ke, ‘Bɔ nɛ i ngɔ ye mi mi la nɛ nya wa a kɛ kple Yerusalem ma mi bi ɔmɛ a nɔ ɔ, ja pɛ ma pee nyɛ ke nyɛ je kɛ ho Egipt ya. Nyɛ ma plɛ pee kita kami nɔ́, gbeye nɔ́, gbiɛmi nɔ́, kɛ ahlua nɔ́. Nyɛ be hiɛmɛ nɛ ɔ nae hu.’ ”

19 I ya nɔ nɛ i de ke, “Nyɛ ni nɛmɛ nɛ nyɛ piɛ ngɛ Yuda a, Yawɛ de nyɛ ke, ‘Nyɛ ko ya Egipt.’ Nyɛ ná nɛ nyɛɛ le kaa i bɔ nyɛ kɔkɔ mwɔnɛ ligbi nɛ ɔ,

20 kaa blɔ nɛ nyɛ hia a, blɔ ɔ dɛ, nɛ tue gblami nɛ maa nyɛɛ se ɔ, nyɛɛ kɛ nyɛ wami ma he. Nyɛ de mi ke ma kpa Yawɛ, wa Mawu ɔ pɛɛ ha nyɛ, nɛ nyɛ wo si ke nɔ́ tsuaa nɔ́ nɛ Yawɛ ma fa nyɛ ke nyɛɛ pee ɔ, nyɛ maa pee.

21 Lɔ ɔ ji nɔ́ nɛ i de nyɛ mwɔnɛ ɔ nɛ. Se níhi tsuo nɛ Yawɛ, wa Mawu ɔ tsɔ mi ke ma ba de nyɛ ɔ, nyɛ bui tue fɛɛ.

22 Lɔ ɔ he ɔ, jehanɛ lɛɛ nyɛ ná nɛ nyɛɛ le klɛdɛɛ kaa he nɛ nyɛ suɔ kaa nyɛ ma ya hi ɔ, nyɛ ma ya gbo ngɛ lejɛ ɔ. Ke nyɛ ya nɔɛ ta a, lɛɛ mi mi hwɔ, loo gbenɔ hiɔ maa gbe nyɛ ngɛ lejɛ ɔ.”