Yeremia 36

Baruk kane womi kpo ɔ ngɛ Yawɛ we ɔ

1 ⓞ Yuda matsɛ, Yehoyakim yi nɔ jeha eywiɛne ɔ mi ɔ, Yawɛ kɛ mi tu munyu nɛ e de ke,

2 “Yaa hla womi kpo nɛ o ngma níhi tsuo nɛ i de mo nɛ kɔɔ Israel, Yuda, kɛ je ma amɛ tsuo a he ɔ kɛ wo mi. Ngmaa nɔ́ tsuaa nɔ́ nɛ i de mo kɛ je be nɛ i kɛ mo tu munyu kekleekle ngɛ matsɛ, Yosia yi nɔ kɛ ba si mwɔnɛ ligbi nɛ ɔ.

3 Eko piɔ Yuda bi ɔmɛ maa nu kaa i to ye yi mi kaa ma kpata a hɛ mi, nɛ a maa kpale kɛ je a blɔ yayami ɔmɛ a nɔ. Ke a pee ja a, ma ngɔ a tɔmi ɔmɛ, kɛ a he yayami ɔmɛ kɛ pa mɛ.”

4 Kɛkɛ nɛ i tsɛ Baruk, Neria bi ɔ, nɛ munyuhi tsuo nɛ Yawɛ kɛ mi tu ɔ, i tsɛ ha lɛ, nɛ e ngma kɛ wo womi kpo ko mi.

5 Jehanɛ, i de Baruk ke, “A ha we mi blɔ kaa ma ya Yawɛ we ɔ hu.

6 Se ma suɔ nɛ moo lɛɛ o ya lejɛ ɔ be mi nɛ ni ɔmɛ ngɛ hwɔ hae. Yaa kane womi kpo ɔ, ngɛ lejɛ ɔ nɛ́ ma a tsuo nɛ nu nɔ́ tsuaa nɔ́ nɛ Yawɛ de mi, nɛ imi hu i tsɛ ha mo nɛ o ngma a. Kane womi kpo ɔ ngɛ lejɛ ɔ, konɛ Yuda bi nɛ je a ma amɛ a mi kɛ ba a, mɛ hu a nu.

7 Alini a maa fa kue ha Yawɛ nɛ a maa kpale kɛ je a blɔ yayami ɔmɛ a nɔ; ejakaa abofu nɛ Yawɛ kɛ tu munyu kɛ si ma nɛ ɔ nya wa wawɛɛ nitsɛ.”

8 Kɛkɛ nɛ Neria bi Baruk ya kane Yawɛ munyu ɔmɛ nɛ e ngma kɛ wo womi kpo ɔ mi ɔ ngɛ Yawɛ we ɔ kaa bɔ nɛ i fa lɛ ke e pee ɔ pɛpɛɛpɛ.

9 Yuda matsɛ, Yehoyakim, Yosia bi ɔ yi nɔ jeha nɛ ji enuɔ ɔ we nyɔhiɔ nɛɛne ɔ mi ɔ, Yerusalem ma mi bi ɔmɛ tsuo, kɛ nihi nɛ je Yuda ma amɛ tsuo a mi kɛ ba Yerusalem ɔ ha hwɔ ngɛ Yawɛ hɛ mi.

10 Kɛkɛ nɛ Baruk kane nɔ́ tsuaa nɔ́ nɛ i de ɔ kɛ ha ma a tsuo kaa bɔ nɛ a ngma ngɛ womi kpo ɔ mi ɔ. E kane womi kpo nɛ ɔ ngɛ Yawɛ we ɔ, ngɛ Gemaria, Shafan bi ɔ tsu ɔ mi. Gemaria nɛ ɔ ji matsɛ pɛdiyo, nɛ e tsu ɔ ngɛ yiti je kue ɔ mi, ngɛ Yawɛ we ɔ agbo he ɔ sinya a nya.

A kane womi kpo ɔ kɛ ha ma nimeli ɔmɛ

11 Benɛ Mikaya, Shafan bi Gemaria bi ɔ nu níhi tsuo nɛ Yawɛ de, kaa bɔ nɛ a kane kɛ je womi kpo ɔ mi ɔ,

12 e pue nɔ kɛ ho matsɛ we ɔ mi ya, nɛ e ya na ma nimeli ɔmɛ tsuo nɛ a bua a he nya ngɛ matsɛ pɛdiyo ɔ tsu ɔ mi. Nihi nɛ hii si ngɛ lejɛ ɔ ji Elishama, matsɛ pɛdiyo; Delaya, Shemaya bi ɔ; Elnatan, Akbor bi ɔ; Gemaria, Shafan bi ɔ; Zedekia, Hanania bi ɔ, kɛ ma nimeli kpa amɛ tsuo.

13 Mikaya bɔ mɛ níhi tsuo nɛ e nu nɛ Baruk kane kɛ je womi kpo ɔ mi kɛ ha ma a.

14 Kɛkɛ nɛ ma nimeli ɔmɛ tsuo tsɔ Yehudi ke e ya de Baruk nɛ e ngɔ womi kpo ɔ nɛ e kane kɛ ha ma a kɛ ba. Nɛ Neria bi Baruk hɛɛ womi ɔ kɛ ba. (Yehudi nɛ ɔ, Kushi bi Shelemia lɛɛ e bi Netania bi ji lɛ).

15 Benɛ Baruk ba a, a de lɛ ke, “Hii si, nɛ o kane womi ɔ nɛ waa nu.” Nɛ Baruk pee ja.

16 Benɛ a nu munyu ɔmɛ tsuo ɔ, a tsui po. Mɛ tsuo a plɛ hyɛ a sibi a hɛ mi, nɛ a de Baruk ke, “E hia kaa wa ya sɛɛ ní nɛ ɔ ha matsɛ ɔ.”

17 A bi Baruk ekohu ke, “Kɛ o pee kɛ ngma munyu nɛ ɔmɛ tsuo kɛɛ? Anɛ Yeremia lɛ tsɛ munyu ɔmɛ kɛ ha mo lo? De wɔ koo!”

18 Baruk he nɔ ke, “Yeremia nitsɛ lɛ e tsɛ munyu ɔmɛ tsuo kɛ ha mi, nɛ i kɛ ni ngmami nyu ngma kɛ wo womi kpo ɔ mi.”

19 Kɛkɛ nɛ ma nimeli ɔmɛ de Baruk ke, “Yaa nɛ o ya laa o he, o kɛ Yeremia tsuo. Nyɛ ko ha nɛ nɔ ko nɛ le he nɛ nyɛ ngɛ.”

Matsɛ ɔ sã womi kpo ɔ

20 Ma nimeli ɔmɛ ngɔ womi kpo ɔ kɛ to Elishama, matsɛ pɛdiyo ɔ tsu ɔ mi, nɛ a ho ya na matsɛ ɔ ngɛ e kue ɔ mi, nɛ a bɔ lɛ nɔ́ tsuaa nɔ́.

21 Matsɛ ɔ tsɔ Yehudi ke e ya nɛ e ya ngɔ womi kpo ɔ kɛ ba. Yehudi ya ngɔ womi kpo ɔ ngɛ Elishama tsu ɔ mi kɛ ba, nɛ e ba kane ha matsɛ ɔ, kɛ ma nimeli ɔmɛ tsuo nɛ daa si ngɛ matsɛ ɔ kasa nya a.

22 Nyɔhiɔ nɛɛne, loo fĩɛ be ji jamɛ a be ɔ nɛ; nɛ matsɛ ɔ hii si ngɛ tsu nɛ e yeɔ fĩɛ be ngɛ mi ɔ mi, nɛ ngɛyu kɛ e mi la nɛ tsɛ̃ maa si ngɛ e hɛ mi.

23 Ke Yehudi kane womi ba fa etɛ, loo eywiɛ gbe nya pɛ matsɛ ɔ kɛ ha bi ko po mɛ, kɛkɛ e sake kɛ wo la mi ngɛ ngɛyu ɔ mi. Matsɛ ɔ ya nɔ nɛ e pee ja hluu kɛ ya si womi kpo ɔ tsuo pɛpɛɛpɛ sã.

24 Se matsɛ ɔ jio, ma nimeli ɔmɛ nɛ nu sane nɛ ɔ jio, nɔ ko nɔ ko yi gbeye; nɔ ko nɔ ko hu hía we e tade kɛ tsɔɔ kaa nɔ́ ɔ hao lɛ.

25 E ngɛ mi kaa Elnatan, Delaya, kɛ Gemaria kpa matsɛ ɔ pɛɛ ke e ko sã womi kpo ɔ, se e bui mɛ tue fɛɛ.

26 Kɛkɛ nɛ matsɛ ɔ fa matsɛbinyumu Yerameel, kɛ Seraya, Azriel bi ɔ, kɛ Shelemia, Abdeel bi ɔ ke a nu imi, kɛ ye womi ngmalɔ Baruk ɔ tsuo. Se Yawɛ ngɔ wɔ kɛ laa.

Yeremia ngma womi kpo ehe

27 Benɛ Matsɛ Yehoyakim sã womi kpo ɔ nɛ i tsɛ munyu ɔmɛ kɛ ha Baruk nɛ e ngma wo mi ɔ se ɔ, Yawɛ de mi ke

28 ma kɛ̃ womi kpo kpa, konɛ níhi tsuo nɛ i ngma kɛ wo kekle womi kpo ɔ mi ɔ, ma ngma kɛ wo enɛ ɔ hu mi.

29 Yawɛ de mi ke ma de Yuda matsɛ, Yehoyakim ke, “O sã womi kpo ɔ, nɛ o bi Yeremia ke mɛni he je e ngma ke Babilonia matsɛ ɔ ma ba kpata zugba nɛ ɔ hɛ mi, nɛ e maa gbe e mi nimli, kɛ lohwehi tsuo lo.

30 Lɔ ɔ he ɔ, bɔ nɛ imi Yawɛ, i ngɛ mo, Yuda matsɛ, Yehoyakim dee ji nɛ ɔ nɛ: ‘O nina ko nina ko be Matsɛ David sɛ ɔ nɔ hie gblegbleegble. Ke o gbo ɔ, a ma sake o gbogboe ɔ kɛ fɔ he; piani ɔ, pu maa tsoo lɛ, nɛ nyɔ mi ɔ, kɔɔhiɔ nɛ mi jɔ yluduu maa fia lɛ.

31 Ma gbla mo, kɛ o nina, kɛ o ma nimeli ɔmɛ a tue ngɛ nyɛ ní yayami ɔmɛ a he. Mo jio, Yerusalem ma mi bi ɔmɛ jio, Yuda bi ɔmɛ jio, nyɛ ti nɔ ko nɔ ko bui ye kɔkɔ bɔmi munyu ɔmɛ tue fɛɛ. Lɔ ɔ he ɔ, ní yayamihi nɛ i to kaa a maa ba nyɛ nɔ ɔ, jehanɛ lɛɛ ma ha nɛ jamɛ a ní ɔmɛ maa ba nyɛ tsuo nyɛ nɔ.’ ”

32 Kɛkɛ nɛ i kɛ̃ womi kpo kpa kɛ ha Baruk, womi ngmalɔ ɔ, nɛ e ngma munyuhi tsuo nɛ i tsɛ kɛ ha lɛ ɔ kɛ wo mi. Lɔ ɔmɛ ji munyuhi tsuo nɛ a ngma kɛ wo kekle womi kpo ɔ nɛ Yuda matsɛ, Yehoyakim sã a mi, kɛ munyu kpahi babauu nɛ piɛ he.