Yeremia 33

Hɛ kɛ nɔ fɔmi he si womi ekpa

1 Benɛ i ngɛ tsu ɔ mi ngɛ kue ɔ mi kɛ mwɔɔ ɔ, i ná Yawɛ sɛ gbi ekohu.

2 Yawɛ, nɔ nɛ pee je ɔ, nɛ e ngɔ je ɔ ngɔ to e blɔ he ɔ kɛ mi tu munyu. Nɔ nɛ e biɛ ji Yawɛ ɔ, de mi ke,

3 “Tsɛ mi, nɛ ma he mo nɔ; ma sɛɛ mo ní nguanguahi a he sane, kɛ nyakpɛ níhi nɛ o li.

4 Imi Yawɛ, Israel Mawu ɔ, i ngɛ dee ke a maa ku Yerusalem we ɔmɛ, kɛ Yuda matsɛ we ɔ ngɔ pue si. E he be se nami bae ha nyɛ kaa nyɛ maa je kpo nɛ nyɛɛ kɛ Babilonia bi ɔmɛ ya hwu ta ngɛ kpoku nɛ a fia kɛ bɔle ma a he. Ke nyɛ pee ja a, nyɛ ma ha nɛ nihi nɛ i kɛ abofu maa gbe ɔ a gbogboe ma hyi ma a mi tɔ. Ní yayamihi nɛ ma nɛ ɔ mi bi ɔmɛ pee he je ɔ, i kua ma a.

5

6 Se kɛ̃ ɔ, be ma nɛ ma tsa Yerusalem hiɔ ɔ, nɛ ma ha nɛ ma mi bi ɔmɛ ma na he wami. Ma ha nɛ a ma plɔke, nɛ a ma na he jɔmi.

7 Ma ha nɛ Yuda kɛ Yerusalem ma na a he ekohu, nɛ ma to mɛ si kaa kekle ko ɔ.

8 Ma tsu a he kɛ je yayamihi tsuo nɛ a pee kɛ si mi ɔ a he; ma ngɔ a he yayami ɔmɛ, kɛ ye hɛ mi atuã nɛ a tsɔ ɔ kɛ pa mɛ.

9 Yerusalem ma ha nɛ ma na biɛ, yi jemi, kɛ hɛ mi nyami ngɛ je ma amɛ tsuo a kpɛti, ke je ma amɛ nu ní kpakpahi tsuo nɛ i pee ha ma a. Ke je ma amɛ nu ní nɛ ɔmɛ a he, nɛ a na bɔ nɛ kplɔkɔtɔ, kɛ he jɔmi ba ma a mi ɔ, a tsui maa po nɛ a he maa do blibliibli.”

10 Yawɛ ke, “Nihi deɔ ke hiɛmɛ nɛ ɔ ngɛ kaa nga kplanaa nɔ, he nɛ nimli loo lohwehi be. Niinɛ, ke a de ja a, a nɔ́ da. Yuda ma amɛ pee ma dokuhi, nɛ Yerusalem gbɛjegbɛ ɔmɛ hu a nɔ fɔɔ si gu; nɔmlɔ adesa ko, loo lohwe ko be lejɛ ɔmɛ. Se ngɛ lejɛ ɔmɛ nɔuu ɔ, nyɛ maa nu

11 ⓗ bua jɔmi, kɛ lele hwɔmi gbi ekohu. Nyɛ maa nu ayɛflo kɛ e huno a gbi, kɛ la nɛ nihi nɛ ngɔ sina bɔhi kɛ ma Yawɛ we ɔ ngɛ lae ke, ‘Nyɛɛ na Yawɛ Tabohiatsɛ ɔ si, ejakaa Yawɛ hi, nɛ e suɔmi ɔ ngɛ daa!’ Ma ha nɛ kplɔkɔtɔ, kɛ he jɔmi maa ba zugba nɛ ɔ nɔ kaa kekle ko ɔ. Imi, Yawɛ lɛ i de.”

12 Yawɛ Tabohiatsɛ ɔ ke, “Zugba nɛ ɔ nɛ ngɛ kaa nga kplanaa nɔ, kɛ ma amɛ nɛ plɛ pee ma dokuhi nɛ nɔmlɔ adesa, loo lohwe be a mi ɔ, be ma nɛ hiɛmɛ nɛ ɔ ma ba pee lohwehi a lɛmi he, nɛ to hyɛli kɛ a lohwehi ma ba hi hiɛ ɔ ekohu.

13 Ngɛ yo nɔ ma amɛ, kɛ nga nɔ ma amɛ a mi, kɛ Yuda leneyi je, Benyamin zugba a nɔ, Yerusalem kɔpe ɔmɛ, kɛ Yuda ma amɛ a mi ɔ, to hyɛli maa kane a tohi ekohu. Imi, Yawɛ lɛ i de.”

14 ⓘ Yawɛ ke, “Be ma nɛ si nɛ i wo Israel bi, kɛ Yuda bi ɔ, ma ye nɔ.

15 Jamɛ a be ɔ mi ɔ, ma hla dalɔ ko kɛ je David nina a a kpɛti nɛ e ye matsɛ. Matsɛ nɛ ɔ maa ye dami sane, nɛ e maa pee nɔ́ nɛ da ngɛ zugba a nɔ tsuo.

16 E yi nɔ ɔ, a ma he Yuda yi wami, nɛ tue mi jɔmi maa ba Israel. Nɛ biɛ nɛ a kɛ ma tsɛ lɛ ji, ‘Yawɛ ji wa dami.’

17 ⓙ Imi, Yawɛ, i ngɛ si woe kaa David nina maa ye matsɛ ngɛ Israel ma a nɔ daa.

18 ⓚ Jehanɛ hu, a ma na osɔfohi kɛ maa je Levi wɛtso ɔ mi, nɛ osɔfo nɛ ɔmɛ maa sã sami bɔ, kɛ niye ní bɔ, kɛ bɔ kpahi ha mi daa be tsuaa be.”

19 Yawɛ de mi ke,

20 “I kɛ piani kɛ nyɔ so somi, nɛ enɛ ɔ he je ɔ, piani kɛ nyɔ baa ngɛ a be mi pɛpɛɛpɛ daa ligbi. Jamɛ a somi ɔ, nɔ ko nɔ ko be nyɛe maa po mi.

21 I kɛ ye tsɔlɔ David so somi kaa e nina maa ye matsɛ daa. Jehanɛ se hu, i kɛ osɔfohi nɛ je Levi wɛtso ɔ mi ɔ hu so kaa a ma sɔmɔ mi daa be tsuaa be. Kikɛmɛ a somi nɛ ɔmɛ ɔ, nɔ ko nɔ ko be nyɛe maa po a mi.

22 Ma ha nɛ ye tsɔlɔ David nina, kɛ osɔfohi nɛ je Levi wɛtso ɔ mi ɔ a he maa hiɛ babauu kaa hiɔwe dodoehi, loo wo nya zia; nɔ ko nɔ ko be nyɛe maa kane mɛ.”

23 Yawɛ de mi ke,

24 “Tse o nu kaa nihi ngɛ dee ke weku enyɔ, Israel kɛ Yuda nɛ i hla a, imi Yawɛ, i kua mɛ! Enɛ ɔ he je ɔ, a gbeɔ ye ma a he guɛ, nɛ a bui mɛ hu kaa je ma ko ji mɛ.

25 Se imi Yawɛ, i kɛ piani kɛ nyɔ so somi, nɛ i pee mlaahi nɛ yeɔ hiɔwe kɛ zugba a nɔ.

26 Ní nɛ ɔmɛ nɛ i nyɛ pee he je ɔ, somi nɛ i kɛ Yakob nina, kɛ ye tsɔlɔ David so ɔ hu ma ye nɔ sisiisi. Ma hla David nina ko nɛ e ye Abraham, Isak, kɛ Yakob a nina a nɔ. Ma na ye ma a mɔbɔ, nɛ ma ha nɛ a ma ná a he ekohu.”