Yeremia 29

Yeremia ngma womi kɛ mane Yuda bi ɔmɛ ngɛ Babilonia

1 ⓣ I ngma womi kɛ mane osɔfo ɔmɛ, gbali ɔmɛ, ma nikɔtɔma amɛ, kɛ ma a tsuo nɛ Babilonia matsɛ, Nebukadnezar ngɔ kɛ je Yerusalem kɛ ho Babilonia ya a.

2 Benɛ i ngma womi nɛ ɔ, jamɛ a be ɔ, nimli nɛ ɔmɛ je Yerusalem momo. Mɛ ji Matsɛ Yehoyakin, e nyɛ, matsɛ we ɔ tsɔli ɔmɛ, ma nimeli ɔmɛ nɛ ngɛ Yuda kɛ Yerusalem, ga ní tsuli ɔmɛ, kɛ sɔli ɔmɛ.

3 I ngɔ womi ɔ kɛ mane Elasa, Shafan bi ɔ, kɛ Gamaria, Hilkia bi ɔ. Mɛ ji nihi nɛ Yuda matsɛ, Zedekia tsɔ mɛ Babilonia matsɛ, Nebukadnezar ngɔ ɔ nɛ. Nɔ́ nɛ ngɛ womi ɔ mi ji nɛ ɔ nɛ:

4 “Nihi tsuo nɛ Yawɛ Tabohiatsɛ, Israel Mawu ɔ ha nɛ a nuu kɛ je Yerusalem kɛ ho Babilonia ya a, bɔ nɛ Yawɛ ngɛ mɛ dee ji nɛ ɔ nɛ:

5 ‘Nyɛɛ po wehi nɛ nyɛɛ hi a mi. Nyɛɛ pee ngmɔhi nɛ nyɛɛ ye a mi ní.

6 Nyɛɛ ngɔ yihi nɛ nyɛ fɔ binyumuhi kɛ biyihi. Nyɛɛ ngɔ yihi ha nyɛ binyumu ɔmɛ, nɛ nyɛ ha nyɛ biyi ɔmɛ gba, konɛ mɛ hu a fɔ bimɛ. Nyɛɛ bɔ ngɛ lejɛ ɔ; nyɛ nɔ nɛ ko gbɔ.

7 Ma a nɛ i ha nɛ a ngɔ nyɛ kɛ ya mi ɔ, nyɛ hla jamɛ a ma a nɔ yami. Nyɛɛ fa kue ha imi Yawɛ, konɛ ma na mɛ mɔbɔ; ejakaa ke a na a he ɔ, nyɛ hu e maa hi ha nyɛ.

8 Imi Yawɛ Tabohiatsɛ, Israel Mawu ɔ, i ngɛ nyɛ dee ke, gbali, kɛ klaali nɛ ngɛ nyɛ kpɛti ɔ, nyɛ ko ha nɛ a sisi nyɛ. Nyɛ ko ha nɛ a de nyɛ níhi nɛ nyɛ nitsɛmɛ nyɛ suɔ nɛ ba mi.

9 Lakpa gbami lɛ a ngɛ gbae ha nyɛ ngɛ ye biɛ mi ɔ nɛ; i tsɔ we mɛ. Imi, Yawɛ lɛ i de.’

10 ⓤ “Yawɛ ke, ‘Babilonia jeha nyingmi kpaago ɔ se ɔ, ma kai nyɛ. Nɛ, si nɛ i wo ke ma ngɔ nyɛ kɛ ba we ekohu ɔ, ma ye jamɛ a siwo ɔ nɔ.

11 Yi mi nɛ i to ngɛ nyɛ he ɔ, imi nɔ kake too pɛ lɛ i le; i to nɛ ma ha nɛ nyɛ he mi nɛ jɔ nyɛ, se pi kaa ma hao nyɛ. Ní kpakpahi nɛ nyɛ ngɛ blɔ hyɛe ɔ, i to nɛ ma ha nyɛ.

12 Jamɛ a be ɔ, ke nyɛ tsɛ mi nɛ nyɛ fa kue ha mi ɔ, ma bu nyɛ tue.

13 ⓥ Nyɛ ma hla ye se blɔ, nɛ nyɛ maa na mi. Ke nyɛ ngɔ nyɛ tsui tsuo kɛ hla ye se blɔ ɔ,

14 nyɛ maa na mi, nɛ ma ngɔ nyɛ kɛ ba nyɛ zugba a nɔ ekohu. Je mahi, kɛ hehi tsuo nɛ i fie nyɛ kɛ ho ɔ, ma bua nyɛ nya kɛ je lejɛ ɔmɛ, nɛ ma kpale nyɛ kɛ ba hiɛmɛ nɛ ɔ nɛ i ha nɛ a nuu nyɛ kɛ je ɔ ekohu. Imi, Yawɛ lɛ i de.’

15 “Nyɛ deɔ ke Yawɛ je gbali ha nyɛ ngɛ Babilonia.

16 Se matsɛ ɔ nɛ hii si ngɛ David sɛ ɔ nɔ, kɛ ma nɛ ɔ mi bi tsuo, nɛ ji nyɛ nyɛmimɛ ɔmɛ nɛ a nuu we mɛ kɛ piɛ we nyɛ he kɛ ya a, nyɛɛ bu nɔ́ nɛ Yawɛ ngɛ dee ngɛ a he ɔ tue.

17 Yawɛ Tabohiatsɛ ɔ ke, ‘Ma ha nɛ ta, hwɔ, kɛ gbenɔ hiɔ ma ba sɛ a kpɛti; nɛ ma ha a maa pee kaa ngmɔkɔ nɛ sa, nɛ hí yemi.

18 I kɛ ta, hwɔ, kɛ gbenɔ hiɔ maa nyɛɛ a se; nɛ nɔ́ nɛ ɔ ma ha nɛ je ma amɛ tsuo maa nu sawale. A maa ye a he fɛu, nɛ a maa bɔ mɛ ahlua ngɛ he tsuaa he nɛ ma fie mɛ kɛ ya.

19 Ní nɛ ɔmɛ maa ba a nɔ, ejakaa sɛ gbi ɔ nɛ i haa mɛ be tsuaa be kɛ guu ye tsɔli gbali ɔmɛ a nɔ ɔ, a bui fɛɛ. A sume kaa a maa nu kɛ a tue po.

20 Nyɛ nihi tsuo nɛ i ha nɛ a nuu kɛ je Yerusalem kɛ ho Babilonia ya, nyɛɛ bu nɔ́ nɛ imi Yawɛ, i ngɛ dee ɔ tue.’

21 “Kolaya bi Ahab, kɛ Maaseya bi Zedekia nɛ a ngɛ lakpa gbami gbae ngɛ ye biɛ mi kɛ ngɛ nyɛ hae ɔ, bɔ nɛ Yawɛ Tabohiatsɛ, Israel Mawu ɔ de ngɛ a he ji nɛ ɔ nɛ. E ke e maa ngɔ mɛ kɛ wo Babilonia matsɛ, Nebukadnezar dɛ, nɛ Nebukadnezar maa gbe mɛ ngɛ nyɛ hɛ mi.

22 Nihi nɛ a nuu kɛ je Yerusalem kɛ ho Babilonia ya a, ke a ngɛ hlae nɛ a gbiɛ nɔ ɔ, bɔ nɛ a ma de ji, ‘Yawɛ nɛ pee mo kaa Zedekia kɛ Ahab nɛ Babilonia matsɛ ɔ sã mɛ hɛ ngmengmle ngɛ la mi ɔ!’

23 Nɔ́ nɛ maa ba a nɔ ji nɛ ɔ nɛ, ejakaa a pee ní yayamihi ngɛ Israel; a puɛ gba, nɛ a tu lakpa munyuhi ngɛ Yawɛ biɛ mi, pohu e fa we mɛ ke a tu jamɛ a munyu ko. Pi Yawɛ suɔmi nya ní ji nɛ ɔ; nɔ́ tsuaa nɔ́ nɛ a pee ɔ, e na, nɛ e ma nyɛ maa ye he odase. Yawɛ lɛ de.”

Womi ɔ nɛ Shemaya ngma a

24 Yawɛ Tabohiatsɛ, Israel Mawu ɔ ha mi sɛ gbi kɛ ha Shemaya nɛ je Nehelam ɔ. Shemaya nɛ ɔ ngma womi ngɛ lɛ nitsɛ e biɛ mi kɛ mane osɔfo Zefania, Maaseya bi ɔ, kɛ osɔfo kpa amɛ tsuo, kɛ nihi tsuo nɛ ngɛ Yerusalem ɔ. Womi ɔ nɛ Shemaya ngma kɛ mane Zefania a, nɔ́ nɛ a ngma ngɛ mi ji,

25

26 “Yawɛ wo mo osɔfo ngɛ Yehoyada nane mi konɛ o hyɛ Yawɛ we ɔ nɔ. O blɔ nya ní tsumi ji godotsɛ tsuaa godotsɛ nɛ peeɔ e he gbalɔ ɔ, o hyɛ nɛ a bɔ lɛ pã nɛ a wo e kuɛ dade kɔsɔkɔsɔ.

27 Yeremia, Anatot no ɔ nɛ ngɛ lakpa gbami gbae ha ma a, mɛni he je o ka we e hɛ mi mɔ?

28 Yeremia ngma womi ya ha nihi nɛ a nuu kɛ ho Babilonia ya a ke a se maa kɛ ngɛ ma se. Lɔ ɔ he ɔ, a po wehi nɛ a hi a mi, nɛ a pee ngmɔhi nɛ a ye a mi ní.”

29 Osɔfo Zefania kane womi nɛ ɔ ngɔ tsɔɔ mi.

30 Kɛkɛ nɛ Yawɛ de mi ke

31 ma tsɔ nɛ a ngɔ sɛ gbi nɛ ɔ nɛ kɔɔ Shemaya he ɔ ya ha nihi tsuo nɛ a nuu mɛ kɛ ho ɔ ke, “Imi Yawɛ, ma gbla Shemaya kɛ e nina tsuo a tue. I tsɔ we lɛ, se e kɛ nyɛ ba tu munyu kaa nɔ́ nɛ gbalɔ ji lɛ; nɛ e ha nɛ nyɛ he e lakpa munyu ɔmɛ ye. E nina ko nina ko be nyɛ kpɛti hie. Ní kpakpahi nɛ ma ba pee kɛ ha ye ma a hwɔɔ se ɔ, e be je mi hie kɛ yaa si jamɛ a be ɔ nɛ e ba na kɛ e hɛngmɛ; ejakaa e de ye ma a ke a tsɔ atuã kɛ wo mi. Imi, Yawɛ lɛ i de.”