Yeremia 13

Kploba bɔjuɛ ɔ

1 Yawɛ de mi ke ma ya he kploba bɔjuɛ nɛ ma tsɛ̃, se ma ko ngɔ kɛ wo nyu mi.

2 I ya he bɔjuɛ ɔ nɛ i tsɛ̃ kaa bɔ nɛ Yawɛ de ɔ.

3 Yawɛ kɛ mi tu munyu si enyɔne, nɛ e de ke,

4 “Ngɔɔ bɔjuɛ nɛ o ya he, nɛ ngɛ o mlɛ mi ɔ kɛ ya Yufrate pa a nya, nɛ o kɛ ya laa ngɛ tɛ sa amɛ a kpɛ ngɛ lejɛ ɔ.”

5 Nɛ i ngɔ bɔjuɛ ɔ ya laa ngɛ Yufrate pa a kasa nya kaa bɔ nɛ Yawɛ fa mi ɔ.

6 Be saii se ɔ, Yawɛ de mi ke ma kpale kɛ ya Yufrate pa a nya, nɛ ma ya ngɔ bɔjuɛ ɔ kɛ ba.

7 Kɛkɛ nɛ i kpale kɛ ho Yufrate pa a nya ya, nɛ i ya tsua bɔjuɛ ɔ kɛ je puɔ ɔ mi he nɛ i ngɔ ya laa ngɛ ɔ. Se i na kaa bɔjuɛ ɔ puɛ; e hí kɛ ha nɔ́ ko nɔ́ ko peemi hu.

8 Yawɛ kɛ mi tu munyu ekohu ke,

9 “Yuda he nɔ womi, kɛ Yerusalem he nɔ womi babauu ɔ, bɔ nɛ nyagbe ɔ maa ba ha ji nɛ ɔ nɛ.

10 Nimli yiwutsotsɛmɛ nɛ ɔmɛ kua mi tue bumi. A wa tue, nɛ a pee nɔ́ nɛ a suɔ; a ya ja mawu kpahi, nɛ a sɔmɔ mɛ. Enɛ ɔmɛ a he je ɔ, ma ha nɛ a maa pee kaa bɔjuɛ nɛ ɔ nɛ he be se nami ko hu ɔ.

11 Kaa bɔ nɛ bɔjuɛ mɛtɛɛ nɔ mlɛ mi kpɛii ɔ, ja i to nɛ Israel ma a, kɛ Yuda ma a tsuo nɛ a mɛtɛ ye he. I pee nɔ́ nɛ ɔ, konɛ a pee ye ma, nɛ a na biɛ, hɛ mi nyami, kɛ yi jemi kɛ ha mi. Se a bui mi fɛɛ.”

Wai tɔ ɔ

12 Yawɛ de mi ke, “Yeremia, de ma a ke imi Yawɛ, Israel Mawu ɔ ke a wo wai tɔ tsuaa wai tɔ mi wai nɛ e hyi. Ke o de mɛ ja a, a ma bi mo ke, ‘Anɛ wa li kaa e sa kaa a wo wai tɔ tsuaa wai tɔ mi wai nɛ e hyi lo?’

13 Jehanɛ, de mɛ ke imi Yawɛ, ma ha nihi tsuo nɛ ngɛ zugba nɛ ɔ nɔ, matsɛmɛ ɔmɛ nɛ ji David nina a, osɔfo ɔmɛ, gbali ɔmɛ, kɛ Yerusalem bi ɔmɛ tsuo dã nɛ a nu kɛ yaa si a maa de kpɔtɔɔ.

14 Lɔ ɔ se ɔ, ma nuu tsɛmɛ kɛ bimɛ ngɔ fia a sibi, nɛ a ma gbo ngɔ pue si kaa tɔ nɛ ywia. Ma kpata a hɛ mi; ye tsui mi be mi sãe ngɛ a he, nɛ i be mɛ mɔbɔ nae.”

Yeremia bɔ ma a kɔkɔ ngɛ he nɔ womi he

15 Israel ma, Yawɛ tu munyu! Nyɛɛ ba nyɛ he si, nɛ nyɛɛ bu lɛ tue.

16 Nyɛɛ wo Yawɛ, nyɛ Mawu ɔ hɛ mi nyami be mi nɛ e ha we nɛ diblii nɛ wo nyɛ nɛ nyɛ ba tɛ si ngɛ yoku ɔmɛ a nɔ, be mi nɛ e ha we nɛ la nɛ nyɛ ngɛ blɔ hyɛe ɔ nɛ plɛ pee diblii kpii.

17 Se ke nyɛ bui tue kɛ mwɔɔ ɔ, lɛɛ ma fo ya ngɛ laami mi ngɛ nyɛ he nɔ womi ɔ he. Ma fo ya hluu kɛ yaa si ye hɛngmɛ maa tɔ nyu, ejakaa a nuu Yawɛ ma mi bi ɔmɛ nyɔguɛ kɛ je.

18 Yawɛ de mi ke, “De matsɛ ɔ kɛ e nyɛ ɔ ke, a ba a he si, ejakaa a jlasi saminyawiiwi ɔmɛ je a yi nɔ si.

19 A sa Yuda leneyi je ma amɛ a yi; nɔ ko nɔ ko be nɛ maa je ngmlaa ha mɛ. A nuu Yuda bi ɔmɛ tsuo nyɔguɛ kɛ ho.”

20 Yerusalem, hyɛ! O he nyɛli ɔmɛ je omleyi je kɛ ma. O nimli kpakpa amɛ nɛ a ha mo ke o hyɛ a nɔ ɔ, jije a ngɛ?

21 Nihi nɛ mo nitsɛ o tsɔse mɛ nɛ o kɛ mɛ ngɛ kaa huɛmɛ ɔ, ke a wo mɛ nɔkɔtɔma ngɛ o nɔ ɔ, kɛ o ma de kɛɛ? Anɛ o he mi be mo kɔɔe kaa yo nɛ nu kɔɔmi nɛ e miɔ nɛ e ma fɔ lo?

22 Ke o bi o he ke, “Mɛni he je ní nɛ ɔmɛ tsuo ba ye nɔ” ɔ, heto ɔ ji, o he yayami babauu ɔ he je nɛ he nyɛli ba pee mo kikɛ nɛ ɔ kaa yo nɛ nyumu kpa e he bo, nɛ e bɔ lɛ ahlua a nɛ.

23 Anɛ nɔmlɔ yumu ma nyɛ ma tsake e he womi su ɔ lo? Anɛ ngatsɛ ma nyɛ ma tsake e he huatahuata a lo? Ke e maa hi peemi ja a, lɛɛ nyɛ nɛ yayami peemi pee nyɛ he nɔ́ nɛ ɔ, nyɛ hu nyɛ ma nyɛ maa pee kpakpa.

24 Yawɛ maa gbɛ nyɛ ngɔ fĩa kaa tsakati nɛ ahlabata kɔɔhiɔ muɔ kɛ yaa.

25 Yawɛ de to ke nɔ́ nɛ maa ba nyɛ nɔ ji nɛ ɔ nɛ. Bɔ nɛ e to nɛ e maa pee nyɛ ji nɛ ɔ nɛ, ejakaa nyɛ hɛ je e nɔ nɛ nyɛ ngɔ nyɛ hɛ ya fɔ lakpa níhi a nɔ.

26 Yawɛ nitsɛ ma kpa nyɛ he bo, nɛ nyɛ we ahlua maa je kpo.

27 Yawɛ na nyɛ nɛ nyɛ ngɛ níhi nɛ e sume pee. E na nyɛ nɛ nyɛ ya ngɛ mawu kpahi a se nyɛɛe ngɛ nga nɔ kɛ yokuhi a nɔ. E na nyɛ nɛ nyɛ ngɛ huhui kpae kaa okpɔngɔ kuhi kɛ okpɔngɔ yihi nɛ ngɛ bɔe. Yerusalem bi, musu tloo nyɛ! Mɛni be po nyɛ he ma tsɔ?