Yeremia 11

Yeremia kɛ somi ɔ

1 Yawɛ de mi ke,

2 “Bu somi munyu ɔmɛ tue. De Yuda ma a, kɛ Yerusalem ma bi ɔmɛ ke,

3 nɔ tsuaa nɔ nɛ be somi munyu nɛ ɔmɛ tue bue ɔ, imi, Yawɛ Israel Mawu ɔ ma gbiɛ lɛ.

4 Benɛ i jé a nɛmɛ ɔmɛ kɛ je Egipt ɔ, somi nɛ i kɛ mɛ so ji nɛ ɔ nɛ. Egipt zugba a ngɛ kaa flɔɔnɔɔ kɛ e mi la nɛ ngɛ tsoe gegeege. I wo mɛ mlaa ke a bu mi tue, nɛ nɔ́ tsuaa nɔ́ nɛ i de mɛ ke a pee ɔ, a pee. I de mɛ ke, ke a bu mi tue ɔ, a maa pee ye ma, nɛ imi hu ma pee a Mawu.

5 Kɛkɛ ɔ, si ko nɛ i wo a nɛmɛ ɔmɛ kaa ma ha mɛ zugba kpakpa nɛ baa ní ɔ, ma ye nɔ. Jamɛ a zugba a nɔ a ngɛ amlɔ nɛ ɔ nɛ.” I he nɔ ke, “Yawɛ, ha nɛ e ba mi ja.”

6 Jehanɛ Yawɛ de mi ke, “Yaa fiɛ ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ, nɛ o de ni ɔmɛ ke a bu somi munyu ɔmɛ tue, nɛ a ye nɔ.

7 Benɛ i je a nɛmɛ ɔmɛ kɛ je Egipt zugba a nɔ ɔ, i ka a hɛ mi saminya nɛ i de mɛ ke a bu mi tue. Kikɛ nɛ ɔ nɔuu i ngɛ ma a hɛ mi kae kɛ ba si mwɔnɛ ɔ.

8 Se a bui mi tue fɛɛ; munyu nɛ i kɛ mɛ tu ɔ po, a nui. A wa tue nɛ a pee yayami kaa kekle ɔ mohu. I wo mɛ mlaa ke a ye somi ɔ nɔ, se a kua nɔ yemi. Enɛ ɔ he je ɔ, i gbla a tue wawɛɛ nitsɛ kaa bɔ nɛ somi tsɔɔ ɔ.”

9 Yawɛ de mi ekohu ke, “Yuda ma a, kɛ Yerusalem bi ɔmɛ tsɔ ye hɛ mi atuã.

10 Yayamihi nɛ a nɛmɛ ɔmɛ pee ɔ, a kpale ya pee jamɛ a yayami ɔmɛ. A nɛmɛ ɔmɛ kplɛɛ we kaa a maa bu mi tue, nɛ a ya ja mawu kpahi. Israel ma a, kɛ Yuda ma a tsuo yi somi nɛ i kɛ a nɛmɛ ɔmɛ so ɔ nɔ.

11 Lɔ ɔ he ɔ, imi Yawɛ, i ngɛ mɛ dee ke, ma ha nɛ haomi maa ba a nɔ nɛ a he be mi jee. Ke a fa kue ha mi po, i be mɛ tue bue.

12 Ke e ba mi ja a, nihi nɛ ngɛ Yuda ma amɛ a mi, kɛ Yerusalem ɔ ma ya fa kue ha mawu ɔmɛ nɛ a sãã tsopa kɛ e he via kɛ haa a. Se kikɛmɛ a mawu nɛ ɔmɛ be nyɛe ma he a yi wami ngɛ jamɛ a haomi be ɔ mi.

13 Bɔ nɛ Yuda ma amɛ hiɛ ɔ, jã kɛ̃ a mawu ɔmɛ hu hiɛ. Bɔ sami la tɛhi nɛ Yerusalem bi ɔmɛ ma, nɛ a sãã tsopa kɛ e he via ngɛ a nɔ kɛ haa yakayaka mawu ɔ nɛ a tsɛɛ Baal ɔ, jamɛ a bɔ sami la tɛ ɔmɛ a he hiɛ babauu kaa gbɛjegbɛhi nɛ ngɛ ma a mi ɔ kɛ̃.

14 Lɔ ɔ he ɔ, Yeremia, ko kpa pɛɛ ha kikɛmɛ a ma nɛ ɔ; koo da a nane mi nɛ o kɛ fa kue ha mi. Ke amanehlu ba a nɔ nɛ a fa kue ha mi ɔ, i be mɛ tue bue.”

15 Yawɛ ke, “Nimli nɛ i suɔ saminya a, yayami sɔuu lɛ a ngɛ pee. Anɛ a ngɛ he blɔ kaa a hii ye we ɔ mi lo? Anɛ a susu kaa ke a wo mi si babauu, nɛ a ngɔ lohwehi kɛ sã bɔ ha mi ɔ, haomi ko nɛ maa ba a nɔ ɔ, a kɛ ní nɛ ɔmɛ a peemi maa tsi jamɛ a haomi ɔ nya lo? Ke e ba mi ja a, anɛ a ma na bua jɔmi lo?

16 Sa a, bɔ nɛ i tsɛɔ mɛ ji, ‘Oliv tso kɛ e yi mi ba kusuu saminyayoo nɛ woɔ yiblii kpakpa;’ se ma mɛ e ba amɛ a he la, nɛ ma ku tso kɔni ɔmɛ kaa bɔ nɛ ahumi tsuɔ ní ɔ.

17 “Imi, Yawɛ Tabohiatsɛ ɔ, imi lɛ i to Israel kɛ Yuda si kaa bɔ nɛ a duɔ tso; se jehanɛ lɛɛ ma ha nɛ amanehlu maa ba a nɔ. Nɔ nɛ ɔ je mɛ nitsɛmɛ, ejakaa a pee yayami; a ya sã tsopa kɛ e he via kɛ ha Baal, nɛ a kɛ wo ye mi mi la.”

A so ngɔ wo Yeremia he

18 Yawɛ ha nɛ i le kaa ye he nyɛli ɔmɛ so ngɔ wo ye he.

19 I pee kaa jijɔ nɛ he jɔ, nɛ a kɛ lɛ yaa nɛ a ya gbe, nɛ i li kaa a ngɛ ye he ga yayami ko toe. Nɔ́ nɛ a ngɛ dee ji, “Nyɛ ha nɛ waa po tso ɔ kɛ e yiblii ɔ tsuo ngɔ fɔ he; nyɛ ha nɛ waa gbe lɛ, konɛ nɔ ko nɛ ko kai lɛ hu.”

20 Kɛkɛ nɛ i sɔle ke, “Yawɛ Tabohiatsɛ lee, kojolɔ nɛ yeɔ dami sane; mo nɛ o hyɛɛ nɔmlɔ adesa tsui mi kɛ e juɛmi mi fitsofitso. I to ye sane ɔ kɛ wo o dɛ; lɔ ɔ he ɔ, i ngɛ mo hyɛe konɛ o wo nimli nɛ ɔmɛ hiɔ bɔ nɛ sa mɛ.”

21 Anatot nyumu ɔmɛ hla kaa a maa gbe mi, nɛ a de mi ke, ke i ya nɔ nɛ i fiɛ ngɛ Yawɛ biɛ mi kɛ mwɔɔ ɔ, a maa gbe mi.

22 Lɔ ɔ he ɔ, Yawɛ Tabohiatsɛ ɔ de mi ke, “Ma gbla a tue kokooko! Nihewi ɔmɛ ma gbo ngɛ ta nga nɔ, nɛ a bimɛ ɔmɛ lɛɛ hwɔ maa gbe mɛ.

23 Be nɛ ma ngɔ amanehlu kɛ ba Anatot bi ɔmɛ a nɔ ɔ, i to momo. Ke jamɛ a be ɔ su ɔ, a ti nɔ ko nɔ ko he be mi jee.”