Introduction
Yesaya
NYA TSƆƆMI Jeha 751-800 loko a fɔ Kristo ɔ, gbalɔ nguaa ko nɛ a tsɛɛ lɛ Yesaya hi Yerusalem. A ngɔ gbalɔ ɔ biɛ ngɔ wo womi nɛ ɔ. Sanehi nɛ ngɛ womi ɔ mi ɔ, a dla a mi etɛ. (1) Yi 1-39: Sanehi nɛ ba, be mi nɛ nɔ yemi nɛ ngɛ leneyi je nɛ a tsɛɛ Yuda a hɛ mi miɔ nɛ e kpata. Nɔ yemi kpa ko nɛ ngɛ e kasa nya nɛ biɛ ji Asiria a ngɛ lɛ haoe. Gbalɔ Yesaya na kaa tsa pi Asiria he wami ɔ nya kɛkɛ nɛ Yuda be nyɛe maa da, se mohu nɔ́ tutuutu nɛ miɔ nɛ kpata Yuda hɛ mi ji ma a nitsɛ pee yayami; a bui Mawu tue, nɛ a ngɔɛ a hɛ ngɔ fɔɛ e nɔ. Gbalɔ ɔ gu ninahi nɛ a se ti, kɛ ní peemi ní komɛ a nɔ kɛ tsɔɔ ma a, kɛ ma nimeli ɔmɛ kaa e hia kaa a pee nɔ́ nɛ da, nɛ a ye dami sane ngɛ a wami si himi mi. E bɔ mɛ kɔkɔ ke á bu Mawu tue, ke pi ja lɛɛ musu tloo mɛ, nɛ a hɛ mi ma kpata. Yesaya gba ke, be ko ma nɛ je ɔ tsuo ma na tue mi jɔmi; nɛ David nina ko ma ba pee matsɛ agbo. (2) Yi 40-55: Sanehi nɛ ba, be mi nɛ a nuu Yuda ma a mi nihi babauu kɛ ho ma se ya ngɛ Babilon, nɛ a ya ye mɛ nyɔguɛ wawɛɛ, nɛ a hɛ kɛ nɔ fɔmi tsuo ta. Gbalɔ ɔ fiɛ ke e be kɛe kulaa nɛ Mawu ma ha a maa ngmɛɛ a he kɛ je nyɔguɛ yemi mi, nɛ lɛ nitsɛ e maa ngɔ mɛ kɛ maa ya we ngɛ Yerusalem, konɛ a ya je wami he sisi ekohu. Womi ɔ mi dlami fa nɛ ɔ mi oti pɔtɛɛ ji Mawu ji je ɔ mi sanehi tsuo a Nyɔmtsɛ, nɛ e blɔ nya tomi ɔmɛ eko ji kaa e ngɛ e ma a tsɔe kɛ yaa je ma amɛ tsuo a ngɔ. Israel mi nɛ a maa je kɛ gbaa je ma amɛ. Munyuhi nɛ a le pe kulaa ngɛ Somi Momo womi ɔmɛ a mi ɔ kɔɔ “Nyɔmtsɛ Tsɔlɔ ɔ” he. (3) Yi 56-66: Munyuhi nɛ a tu kɛ tsɔɔ nihi nɛ kpale kɛ je ma se kɛ ba Yerusalem. A ha nɛ a nu sisi kaa Mawu wo e ma a si, nɛ e maa ye siwo ɔ nɔ pɛpɛɛpɛ. Se e hia kaa ma a nɛ pee nɔ́ nɛ da, nɛ a ye dami sane. E hia hu kaa a ye Hejɔɔmi ligbi ɔ, nɛ a sã bɔ, nɛ a sɔle. Munyu nɛ a ngma ngɛ yi 61.1-2 ɔ he hia saminya. Lɔ ɔ ji nɔ́ nɛ Yesu kɛ je e ní tsumi sisi kɛ tsɔɔ kaa Mawu nitsɛ nɛ tsɛ lɛ kɛ ha e ní tsumi ɔ. Bɔ nɛ a dla womi ɔ mi ha • Kɔkɔ bɔmi kɛ si womi 1.1—12.6
• Je ma amɛ a tue gblami 13.1—23.18
• Mawu maa kojo je ɔ 24.1—27.13
• Kɔkɔ bɔmi kɛ si womi nɔ tsami 28.1—35.10
• Yuda matsɛ, Hezekia kɛ Asiria bi ɔmɛ 36.1—39.8
• Sɛ gbihi nɛ tsɔɔ si womi kɛ hɛ kɛ nɔ fɔmi 40.1—55.13
• Kɔkɔ bɔmi kɛ si womi 56.1—66.24
• Je ma amɛ a tue gblami 13.1—23.18
• Mawu maa kojo je ɔ 24.1—27.13
• Kɔkɔ bɔmi kɛ si womi nɔ tsami 28.1—35.10
• Yuda matsɛ, Hezekia kɛ Asiria bi ɔmɛ 36.1—39.8
• Sɛ gbihi nɛ tsɔɔ si womi kɛ hɛ kɛ nɔ fɔmi 40.1—55.13
• Kɔkɔ bɔmi kɛ si womi 56.1—66.24