Yesaya 59

Gbalɔ ɔ pia ma a kaa a pee yayami

1 Nyɛ ko susu kaa Yawɛ nine ngɛ kpoku nɛ e be nyɛe nɛ e kɛ he nyɛ yi wami, aloo e tue ywia nɛ e nui nyɛ kue fami ɔ!

2 Mohu nyɛ ná nyɛɛ le kaa nyɛ he yayami ɔmɛ ji níhi nɛ gba nyɛɛ kɛ nyɛ Mawu ɔ nyɛ kpɛti; nyɛ he yayami ɔmɛ tsi e hɛ mi; lɔ ɔ he nɛ ke nyɛ fa kue nɛ e nui ɔ nɛ.

3 Nyɛ yeɔ fɔ, ejakaa nyɛ pueɔ muɔ si, nɛ nyɛ peeɔ yayamihi babauu. Yi wu tso níhi a he sɔuu nyɛ susuɔ, nɛ munyuhi nɛ jeɔ nyɛ nya a, lakpa sɔuu.

4 Ke a kɛ nɔ ko ya kojomi he ɔ, nyɛ yi sane ɔ ha lɛ bɔ nɛ sa. Nyɛɛ kɛ mlaa tsu we ní, nɛ nyɛ yeɔ lakpa kɛ faa nyɛ he ngɛ sane yemi he. Ga yayahi nɛ kpataa nihi a hɛ mi sɔuu nyɛ toɔ.

5 Nyɛ ga yaya amɛ ngɛ kaa sinɔ duɔtsɛ hlui. Ke hlui ɔ ywia a, sinɔ duɔtsɛ jeɔ kpo kɛ jeɔ mi! Se nyɛ ga yaya amɛ a he be se nami ko kulaa; a ngɛ kaa bo nɛ a ngɔ anani ya kɛ lo!

6

7 ⓢ Be tsuaa be ɔ, yayami he ga sɔuu nyɛ toɔ. Nɔ nɛ ko ye bemi ɔ, nyɛ he sɔɔ kɛ pueɔ e muɔ si yaka. He tsuaa he nɛ nyɛ gu ɔ, nɔ́ puɛmi, kɛ nɔ́ hɛ mi kpatami sɔuu nyɛ siɔ ngɛ nyɛ se;

8 nɔ ko nɔ ko yi e he ngɛ he nɛ nyɛ ngɛ. Nɔ́ nɛ dɛ pɛ nyɛ peeɔ. Nyɛ blɔ ɔmɛ gɔdɔ, lɔ ɔ he ɔ, nɔ tsuaa nɔ nɛ nyɛɛɔ nyɛ se ɔ, e he mi jɔɛ lɛ gblegbleegble.

Ma a jaje a he yayami

9 Bɔ nɛ ma a ngɛ dee ji nɛ ɔ nɛ: “Jehanɛ lɛɛ wa na le nɔ́ he je nɛ Mawu je we wɔ kɛ ji nihi nɛ ngɛ wɔ yi mi wae ɔ a dɛ mi. Wa hyɛɛ blɔ kaa wa ma na la kɛ nyɛɛ, se wa ná we; diblii kpii mi mohu wa nyɛɛɔ;

10 nɛ wa tataa si kɛ yaa gbogbo he kaa hɛ yuyuili. Wa tɛɔ si piani katakata kaa nɔ nɛ nyɔ mi. Wa peeɔ kaa ni gbogboehi ngɛ hɛ ngmengmletsɛmɛ a kpɛti.

11 Wɔ tsuo wa yeɔ gbeye, nɛ wa ní peeɔ mɔbɔ. Wa hyɛɛ Mawu blɔ kaa e ma ba he wa yi wami kɛ je pimi kɛ amimi mi, se lɛ tsuo peeɔ yaka.

12 “Yawɛ, wa tɔmi ɔmɛ hiɛ babauu ngɛ o hɛ mi. Wa he yayami ɔmɛ yeɔ odase kɛ siɔ wɔ. Wɔ nitsɛmɛ wa le wa nisɛ ní a ní ɔmɛ tsuo.

13 Wa tɔ o nɔ; wa wa nihi yi mi, nɛ wa kua mo. Wa ja we mo hu. Ni yayahi a he wa susuɔ, nɛ lakpa pɛ wa yeɔ.

14 Wa yi dami sane, nɛ nɔ́ nɛ da hu wa pee we. Wa yi anɔkuale ngɛ sane yemi he; nɛ wa susuu we nɔ́ nɛ da he kulaa.

15 Nɔ ko nɔ ko yi anɔkuale hu; nɔ nɛ yuɔ e he kɛ jeɔ yayami he ɔ, a haoɔ lɛ kaa lɛ mohu ji yayami peelɔ.” Yawɛ na nɔ́ nɛ ɔ, nɛ e ngɔɛ e nya kaa a yi dami sane.

Yawɛ pee klaalo nɛ e ma kpɔ e ma a

16 ⓣ E pee lɛ nyakpɛ kaa nɔ ko nɔ ko be nɛ maa da mi ha ni nɛmɛ nɛ a ngɛ mɛ yi mi wae ɔ. Lɔ ɔ he ɔ, lɛ nitsɛ e he wami e kɛ ma he e ma a yi wami; nɛ e ma a maa ye kunimi.

17 ⓤ E maa ye dami sane be tsuaa be; dami sane yemi maa pee kaa tsɛ̃i nɛ ha e he. Yi wami hemi hu maa pee e hiami nɔ́; e maa pee kaa dade pɛɛ nɛ e bu. E kɛ abofu, kɛ hɛdɔ maa gbla he nyɛli ɔmɛ a tue kɛ fa ni nɛmɛ nɛ a ngɛ mɛ amimi yee ɔ a he.

18 E maa gbla a tue kaa bɔ nɛ a pee ɔ pɛpɛɛpɛ kɛ to nane mi; nɛ ni nɛmɛ nɛ ngɛ ma se tsitsaa po be a he yee.

19 Kɛ je beleku je kɛ yaa su bonyoku je ɔ, nɔ tsuaa nɔ maa ye Yawɛ gbeye. E maa ba kaa pa nɛ hia; e maa ba kaa ahumi nɛ hia kɛ ma.

20 ⓥ Bɔ nɛ Yawɛ ngɛ e ma a dee ji nɛ ɔ nɛ, “Ma ba Yerusalem, nɛ nyɛ nihi tsuo nɛ nyɛ kpa yayami peemi ɔ, ma ba he nyɛ yi wami.

21 I kɛ nyɛ maa so somi. I ngɔ ye he wami ɔ ngɔ ha nyɛ, nɛ ye mlaa amɛ hu maa pee nyɛ nɔ́ kɛ maa ya neneene. Kɛ je mwɔnɛ ɔ kɛ yaa a, nyɛ maa bu mi tue, nɛ nyɛ maa tsɔɔ nyɛ bimɛ, kɛ nyɛ nina tsuo, konɛ a bu mi tue kɛ ya neneene.”