Yesaya 39

Tsɔli nɛ je Babilonia

(<x>120 20:12-19</x>)

1 Jamɛ a be ɔ, Babilonia matsɛ, Merodak Baladan, Baladan bi nyumu ɔ, nu kaa Matsɛ Hezekia ba na we he wami. Lɔ ɔ he ɔ, e ngma womi, nɛ e tsɔ nɛ a kɛ nike ní piɛ he ya ha lɛ.

2 Matsɛ Hezekia he tsɔli ɔmɛ atuu, nɛ e ngɔ matsɛ mɔ ɔ mi ní kpakpa nɛ ɔmɛ tsuo kɛ tsɔɔ mɛ: sika tsu, sika hiɔ, tsopa kɛ e he via, nu kpakpa, e ta níhi tsuo, kɛ níhi tsuo nɛ ngɛ nito he ɔmɛ. Nɔ́ ko nɔ́ ko be e we ɔ mi, loo e nɔ yemi he nito he tsu ɔmɛ a mi nɛ e kɛ tsɔɔ we mɛ.

3 Kɛkɛ nɛ gbalɔ Yesaya ba Matsɛ Hezekia ngɔ, nɛ e ba bi lɛ ke, “Nyumu ɔmɛ nɛ ba o ngɔ ɔ, jije a je, nɛ mɛni a ba de mo?” Hezekia he nɔ ke, “A je Babilonia zugba a nɔ, ngɛ tsitsaa lokoo.”

4 Yesaya bi lɛ ekohu ke, “Mɛni a ba na ngɛ o we ɔ mi?” Hezekia he nɔ ke, “A ba na ye we ɔ mi nɔ́ tsuaa nɔ́; nɔ́ ko nɔ́ ko be ye nito he ɔmɛ nɛ i kɛ tsɔɔ we mɛ.”

5 Jehanɛ, Yesaya de Hezekia ke, “Yawɛ Tabohiatsɛ ɔ ke

6 be ma nɛ a ma ba muɔ o we ɔ mi nɔ́ tsuaa nɔ́, kɛ níhi nɛ o nɛmɛ ɔmɛ bua nya ngɔ to kɛ ba si mwɔnɛ ligbi nɛ ɔ kɛ ho Babilonia ya; a be nɔ́ ko nɔ́ ko sie. Yawɛ lɛ de.

7 ⓟ A maa nuu mo nitsɛ o bimɛ ɔmɛ ekomɛ po kɛ ya Babilonia; a maa puɛ mɛ, nɛ a ma ya sɔmɔ ngɛ Babilonia matsɛ we ɔ mi.”

8 Se Matsɛ Hezekia susu kaa nɔ́ nɛ ɔ kɛ he jɔmi, kɛ tue mi jɔmi maa ba ngɛ lɛɛ e yi nɔ. Lɔ ɔ he ɔ, e de Yesaya ke, “Yawɛ sɛ gbi nɛ o ngɔ ba ha mi ɔ hi.”