Yesaya 33

A fa kue kɛ bi yemi kɛ buami

1 Musu tloo he nyɛli ɔmɛ! A fia ojo nɛ a sisi nihi; se mɛɛ lɛɛ nɔ ko fiɛ mɛ ojo, nɛ nɔ ko sisi we mɛ hulɔ. A we ojo fiami, kɛ nɔ sisimi ɔ se maa po kɛ̃, nɛ mɛ nitsɛmɛ hu a maa fia mɛ ojo, nɛ a maa sisi mɛ.

2 Yawɛ, wa kpa mo pɛɛ, naa wɔ mɔbɔ. Wa ngɔ wa hɛ ngɔ fɔ o nɔ. Buu wa he be tsuaa be; nɛ ke wa ngɛ amanehlu nae ɔ, kpɔ wɔ.

3 Ke o hia ta, nɛ o wo gbi kaa hiɔmi simi kikɛ ɔ, je ma amɛ gbɛɛ fĩaa kɛ fo.

4 A níhi plɛɔ peeɔ ta yibu ní nɛ a haa gidigidi kaa baalɛhi peeɔ a ní.

5 Yawɛ kle! E ngɛ he wami ngɛ nɔ́ tsuaa nɔ́ nɔ. E ma ha a maa ye dami sane sɔuu; anɔkuale pɛ a maa tu ngɛ Yerusalem be tsuaa be,

6 nɛ ma a maa ya nɔ saminya. E buu e ma a he be tsuaa be; nɛ e haa ma mi bi ɔmɛ juɛmi kɛ nile. Yawɛ gbeye yemi ji nɔ́ ko nɛ he jua wa saminya kaa juetli agbo ha mɛ.

7 Hyɛ bɔ nɛ katsɛmɛ ɔmɛ ngɛ ngmlaa kpae ngɛ gbɛjegbɛ ɔmɛ a nɔ ha. Hyɛ bɔ nɛ tsɔli ɔmɛ nɛ ngɛ mɔde bɔe kaa tue mi jɔmi nɛ ba a wo yana boboobo ha.

8 Gbɛjegbɛ ɔmɛ a nɔ ba gbeye, nɛ nɔ ko nɔ ko nyɛɛ we a nɔ hu. A yi somihi a nɔ hu, ma kɛ ma jio, nɔ kɛ nɔ jio. Nɔmlɔ adesa pi nɔ́ ko kulaa ngɛ a hɛ mi.

9 Zugba a pee mɔbɔmɔbɔ kɛ fɔɔ si. Lebanon hue ɔmɛ ta kulaa; Sharon zugba nɛ baa ní saminya a pee kaa nga kplanaa nɔ; tsohi nɛ ngɛ Bashan kɛ Karmel yo ɔ nɔ ɔ, a yi mi ba tsuo kplɔ kɛ pueɔ si.

Yawɛ bɔ e he nyɛli ɔmɛ kɔkɔ

10 Yawɛ ngɛ je ma amɛ dee ke, “Jehanɛ e su be nɛ ma tsu ní. Ma tsɔɔ nyɛ kaa ye he wa.

11 Nyɛ toɔ ga yayahi nɛ a he be se nami. Mumi nɛ nyɛ woɔ ɔ ngɛ kaa la nɛ ma kpata nyɛ nitsɛmɛ nyɛ hɛ mi.

12 Nyɛ ta buli babauu ɔ maa sã ngɛ ta nga nɔ. A maa pee kaa la zu, loo mio tso nɛ a po kɛ pue si nɛ a mɛ he la.

13 Nyɛ nihi nɛ ngɛ lokoo, kɛ ni nɛmɛ nɛ ngɛ kpo nya tsuo, nyɛ ta tue nɛ nyɛɛ nu nɔ́ nɛ i pee ɔ he, konɛ nyɛɛ na kaa ye he wa.”

14 Yayami peeli nɛ ngɛ Zion ɔ nu sawale, nɛ a he ngɛ doe blibliibli. Nɔ́ nɛ a ngɛ a he bie ji, “La nɛ ngɛ ní puɛe nɛ ɔ, wa ti mɛnɔ ma nyɛ nya maa da? La nɛ ngɛ tsoe nɛ gbo we gblegbleegble nɛ ɔ nɛ, wa ti mɛnɔ ma nyɛ nya maa da?”

15 Ee, nɔ nɛ peeɔ nɔ́ nɛ da, nɛ e tuɔ anɔkuale, nɔ nɛ sume kaa e maa ye nɔ ko awi nɛ e kɛ na ní, nɛ e he we nyɔ mi ní hulɔ, nɔ nɛ tsiɔ e tue nɛ e ko nu muɔ si puemi sane ko, nɛ e kɛ e hɛngmɛ hyɛ we nɔ́ yaya a, e yi ma na wami.

16 Jamɛatsɛ ɔ ma ná he jɔmi kaa nɔ ko nɛ ngɛ mɔ nɛ he wa saminya mi. E ma na ní maa ye, nɛ e ma na nyu maa nu.

Be kpakpa maa ba hwɔɔ se

17 Nyɛ ma ná matsɛ ko nɛ maa ye tsɛ saminyayoo ngɛ zugba a gbo tɛtlɛɛ ko nɔ ekohu.

18 Nyɛ ma kai gbeye nɛ nyɛ ye blema a ngɛ tó nɛ ma se nɔ yeli tsu ngɛ nyɛ dɛ ɔ he; nɛ nyɛ ma kai nihi nɛ juɔ si ba slaa ma a hulɔ.

19 Ma nɛ peeɔ nya puu, nɛ a tuɔ munyu nɛ nɔ ko nɔ ko nui sisi ɔ, nyɛ be mɛ nae hu.

20 Hyɛ, Zion, ma nɛ wa yeɔ wa nyami ligbi ɔmɛ ngɛ mi ɔ ji nɛ ɔ nɛ! Yerusalem, ma nɛ tue mi jɔmi ngɛ mi ɔ ji nɛ ɔ nɛ! Yerusalem ngɛ kaa bo tsu nɛ maa si nɛ be si nɔe gblegbleegble. Tso plɛɛkohi nɛ a ka kɛ wo zu mi ɔ ekoeko be hiae; tangme kpa amɛ hu be tsɔe.

21 Yawɛ ma je e hɛ mi nyami ɔ kpo kɛ tsɔɔ wɔ ngɛ lejɛ ɔ. Pa nguahi, kɛ pa wawihi a tue wa maa hi; se wa he nyɛli ɔmɛ a lɛ wawihi nɛ a hluiɔ kɛ akɔfa be nyɛe maa ba lejɛ ɔ, lɛ nguahi hu ja nɔuu.

22 Jamɛ a lɛ ɔmɛ a mi tso ɔmɛ a he be se nami; a be hie kɛ abalaa womi. Wa ma kpɔ he nyɛli ɔmɛ a ní kpakpa amɛ tsuo ngɛ a dɛ. Ta yibu ní babauu nɛ a ma na a, a maa dla, nɛ nɔ tsuaa nɔ ma na eko; glɔtsɛmɛ po ma na a blɔ fa mi nɔ́. Yawɛ nitsɛ maa pee wa matsɛ. E maa ye wa nɔ, nɛ e maa bu wa he.

23

24 Nihi nɛ ngɛ zugba a nɔ ɔ, a ti nɔ ko nɔ ko be dee hu ke, “I be he wami.” A maa ngɔ ma a tsuo a he yayami kɛ pa mɛ.