Yesaya 31

Mawu maa bu Yerusalem he

1 Musu tloo nihi nɛ yaa Egipt ya biɔ yemi kɛ buami ngɛ lejɛ ɔ. Musu tloo mɛ, ejakaa a ngɔɔ a hɛ kɛ fɔɔ Egipt ta zugba lɛhi, kɛ okpɔngɔ ta buli a nɔ; ejakaa a hiɛ babauu, nɛ a he wa hulɔ. Se a ngɔɛ a hɛ kɛ fɔ we Yawɛ, Israel Mawu klɔuklɔu ɔ mohu nɔ; ga womi hu a bi we lɛ.

2 Yawɛ ɔ, ní lelɔ ji lɛ, nɛ e gblaa nɔ tue. Ke e de nɔ ko ɔ, e kpale we e nya se. E gblaa yayami peeli kɛ a he piɛli tsuo a tue.

3 Egipt bi ɔmɛ ɔ, nimli adesahi kɛkɛ ji mɛ; tsa pi Mawu ji mɛ. A we okpɔngɔ ɔmɛ ɔ, lohwehi kɛkɛ ji mɛ, tsa pi Mawu mumi nɛ ngɛ a mi. Ke Yawɛ gba ta a, je ma ko je ma ko be nya nyɛe maa da; je ma nɛ he wa jio, je ma nɛ a ya je ngmlaa ha lɛ jio, mɛ tsuo a hɛ mi ma kpata.

4 Yawɛ de mi ke, “Bɔ nɛ to hyɛli kɛ a ngmlaa babauu nyɛ we nɛ a fieɔ jata kɛ jee e de lo he ɔ, ja pɛpɛɛpɛ nɛ nɔ́ ko nɔ́ ko be nyɛe maa tsi imi, Yawɛ Tabohiatsɛ ɔ ye nya kaa ma bu Zion yo ɔ he.

5 Bɔ nɛ lohwe pɛlitsɛ tee kɛ bɔleɔ e tsu kɛ buu e bimɛ a he ɔ, ja imi, Yawɛ Tabohiatsɛ ɔ ma bu Yerusalem he, nɛ ma fa e he.”

6 Yawɛ ke, “Israel ma, nyɛ pee yayami kɛ si mi, nɛ nyɛ tsɔ atuã. Se jehanɛ lɛɛ, nyɛɛ kpale kɛ ba ye ngɔ!

7 Be ma nɛ nyɛ tsuo nyɛ ma sake amaga amɛ nɛ nyɛɛ kɛ pee yayami ɔ ngɔ pue he. Amaga nɛ ɔmɛ ɔ, nyɛ nitsɛmɛ nyɛ ngɔ sika tsu, kɛ sika hiɔ kɛ pee.

8 A kɛ ta ma kpata Asiria hɛ mi; se pi nɔmlɔ adesa he wami nya. Asiria bi ɔmɛ maa tu fo ngɛ ta nya, nɛ a nihewi ɔmɛ ma plɛ pee nihi nɛ a nyɛɔ a nɔ kɛ tsuɔ ní tsumi nɛ nya wa.

9 A matsɛ ɔ kɛ sawale maa tu fo kɛ je, nɛ ma nimeli ɔmɛ hu maa ye gbeye wawɛɛ nitsɛ, nɛ a maa ma fo kɛ je a ta aflangaa amɛ a he.” Yawɛ lɛ de. Lɛ ji Yawɛ nɛ a jaa lɛ ngɛ Yerusalem, nɛ a kɛ la sãã bɔ haa lɛ ngɛ lejɛ ɔ nɛ.