Yesaya 29

Haomi nɛ maa ba Yerusalem nɔ

1 Musu tloo Yerusalem! Yerusalem, Mawu bɔ sami la tɛ[7] ɔ musu tloo lɛ! David ma nɛ e hi mi ɔ, musu tloo lɛ. Jeha kake, loo enyɔ komɛ kɛ a mi ní yemi, kɛ nyami ɔmɛ a se ɔ,

2 ma nɛ a tsɛɛ “Mawu bɔ sami la tɛ ɔ”, Mawu ma ha e maa na amanehlu. Ma mi bi ɔmɛ maa ye kɔmɔ, nɛ a maa wo yana. Ma a tsuo maa pee kaa bɔ sami la tɛ ko nɛ a kpa muɔ ngɔ pue nɔ.

3 Mawu ma ba tua ma a, nɛ e ma sa ma a yi; a maa fia kpoku gojogojoohi kɛ wo e he ka.

4 Yerusalem maa pee kaa kpade ko nɛ ngɛ mɔde bɔe kaa e maa tu munyu kɛ je zu mi lokoo; e gbi ɔ maa pee kaa gugwɔ mi gbi.

5 Yerusalem, o he nyɛli ɔmɛ nɛ je ma se kɛ ba tua mo ɔ, a maa bɛɛ mɛ tsuo kɛ ho kaa bunyuku, nɛ a ta buli babauu kɛ a he gbeyegbeye ɔ maa pee kaa jakati ngɛ kɔɔhiɔ nya. Tlukaa, ngɛ hɛngmɛfia mi ɔ,

6 Yawɛ Tabohiatsɛ ɔ ma he o yi wami. E ma ha hiɔmi ma si, zugba ma mimiɛ wawɛɛ, nɛ lejɛ ɔ tsuo maa pee hoo. Lasiogblee, ahumi, kɛ la gegeege maa ba;

7 kɛkɛ ɔ, je ma amɛ a tabo ɔmɛ tsuo nɛ ba ngɛ ma nɛ a tsɛɛ Mawu bɔ sami la tɛ ɔ tuae ɔ, mɛ tsuo a maa laa kaa nina ko nɛ je kpo nyɔ mi ngɛ nlami mi kɛkɛ.

8 Je ma amɛ tsuo nɛ ma ba tua Zion yo ɔ, nɔ́ nɛ maa ba a nɔ ji nɛ ɔ nɛ. A sane maa pee kaa nyumuhi enyɔ komɛ a sane pɛ. Kekleekle nɔ ɔ ya hwɔ si kɛ e mi mi hwɔ; nɛ e nla nɛ e ngɛ ní yee. Se benɛ e hɛ tsɛ ɔ, hwɔ ngɛ lɛ yee kɛ mwɔɔ. Enyɔne ɔ hu ya hwɔ si benɛ kuma miɔ nɛ e gbe lɛ. Lɛ hu e nla nɛ e ngɛ nyu nue. Se benɛ e hɛ maa tsɛ ɔ, kuma ngɛ lɛ yee kɛ mwɔɔ.

A bui munyu ɔmɛ

9 Nyɛɛ ya nɔ nɛ nyɛɛ hi biɛe, nɛ nyɛɛ pee nyɛ he nihi nɛ li nɔ́! Nyɛɛ pee nyɛ he hɛ yuyuili! Nyɛɛ pee nyɛ he dã tɔli, be mi nɛ nyɛ nui wai ko! Nyɛ tataa si kaa dã tɔli, be mi nɛ nyɛ nui dã nɛ nya wa ko!

10 ⓔ Yawɛ ha mahe vii nɔ nyɛ nɔ, nɛ nyɛ hwɔ mahe kulaa. Nyɛ gbali ɔmɛ ɔ, Mawu kɛ nɔ́ bu a hɛ mi, nɛ e ha a yi nɔ.

11 Gbali ɔmɛ nui a nina amɛ a sisi, konɛ a tsɔɔ nyɛ; nina amɛ pee kaa womi kpo ko nɛ a sɔu nya. Ke a ngɔ kɛ ya ha nɔ nɛ le womi kanemi ke e kane ha nyɛ ɔ, e ma de ke e be nyɛe, ejakaa a sɔu nya.

12 Ke nyɛ ngɔ kɛ ya ha nɔ nɛ li womi mi ke e kane ha nyɛ ɔ, e ma de ke e li womi kanemi.

13 ⓕ Nyɔmtsɛ ɔ ke, “Ni nɛ ɔmɛ ke a ngɛ mi jae, se sisi numi ko be munyu ɔmɛ nɛ a ngɛ tue ɔ mi, ejakaa a tsui ngɛ he kpa kulaa. Nimli adesahi a mlaahi, kɛ blema sanehi nɛ a kase ngɔ wo a yi mi nɛ a deɔ kɛ a nya kɛkɛ ɔ ji nɔ́ nɛ a tsɛɛ ke jami.

14 ⓖ Lɔ ɔ he ɔ, ma pee nyakpɛ níhi, kɛ níhi nɛ ngɛ gbeyegbeye ngɛ nimli nɛ ɔmɛ a kpɛti ekohu. A ní leli ɔmɛ a nile ɔ, kɛ a ga a maa pee yaka.”

Hɛ kɛ nɔ fɔmi ngɛ ha hwɔɔ se

15 Musu tloo nihi nɛ hlaa kaa a maa ngɔ ga nɛ a to ngɛ a yi mi ɔ kɛ laa Yawɛ. A toɔ a ga amɛ ngɛ laami mi, nɛ a susuu kaa nɔ ko nɔ ko be mɛ nae, nɛ nɔ́ nɛ a ngɛ pee ɔ hu nɔ ko nɔ ko be lee.

16 ⓗ A plɛɔ nɔ́ tsuaa nɔ́ yi ngɔ kaa si. Te nɔ́ nɛ he hia pe e nyɛmi nɛ; buɛ puɛlɔ ɔ, loo zu ɔ? Anɛ nɔ́ ko nɛ nɔmlɔ pee ɔ ma nyɛ ma de lɛ ke, “Tsa pi mo nɛ o puɛ mi!” loo e ma nyɛ de lɛ ke, “O li nɔ́ nɛ o ngɛ pee ɔ lo?”

17 Kaa bɔ nɛ a deɔ ɔ, e be kɛe kulaa nɛ Lebanon hue tso ɔ ma plɛ pee ngmɔ kpakpa, nɛ zugba nɛ baa ní saminya a ma plɛ pee hue tso ekohu.

18 Jamɛ a be ɔ, tuekpokutsɛ maa nu nɛ a ngɛ womi kanee, nɛ hɛ yuyuili nɛ ngɛ diblii kpii mi ɔ, a hɛngmɛ maa hyɛ nɔ ekohu.

19 Nihi nɛ a he jɔ, dɛgutsɛmɛ, kɛ nihi nɛ a ní ngɛ mɔbɔ ɔ, Yawɛ Israel Mawu klɔuklɔu ɔ ma ha mɛ bua jɔmi ekohu.

20 Yiwutsotsɛmɛ, nihi nɛ bui Mawu, kɛ yayami peeli tsuo a hɛ mi ma kpata.

21 Mawu ma kpata nimli nɛ ɔmɛ hu a hɛ mi: nihi nɛ a kɛ a nya mi munyu poɔ nihi a nya kaa a tɔ mlaa, kɛ nihi nɛ tsɔɔ klama ha kojoli ngɛ kojomi he, nɛ a kɛ lakpa yemi haa nɛ a plɛɔ nɔ nɛ sane da a e sane hɛ mi kɛ buɔ si.

22 Lɔ ɔ he ɔ, jehanɛ, bɔ nɛ Yawɛ, Israel Mawu ɔ nɛ he Abraham yi wami kɛ je amanehlu mi ɔ ngɛ dee ji nɛ ɔ nɛ: “Ye ma, zo be nyɛ gbee hu; a be nyɛ hɛ mi si puee hu.

23 Ke o na bimɛ ɔmɛ nɛ ma ha mo ɔ, jamɛ a be ɔ mi o ma de ke niinɛ, imi ji Israel Mawu Klɔuklɔu ɔ nɛ.

24 Kuasiahi maa le ní, nɛ ni nɛmɛ nɛ tuɔ munyu huitihuiti ɔ maa kase ní.”