Yesaya 23

Sɛ gbi nɛ kɔɔ Fonisia he

1 ⓥ Sɛ gbi nɛ kɔɔ Tiro he ji nɛ ɔ nɛ. Nyɛ akua hluili ngɛ wo nɔ, nyɛ nya awe nɛ nyɛɛ ye kɔmɔ. Ejakaa nyɛ lɛsimuɔ he ngɛ Tiro ɔ, a kpata e hɛ mi pɛsɛpɛsɛ; we ɔmɛ, kɛ lɛ dami he ɔ tsuo hɛ mi kpata. Benɛ nyɛ lɛ ɔmɛ kpale kɛ je Kipro kɛ ma a nɛ nyɛ nu sane nɛ ɔ.

2 Sidon jua yeli, nyɛ ma nyɛ nya! Nyɛ nɛ nyɛ tsɔɔ nihi

3 kɛ poo wo kɛ ya heɔ blɛfo ngɛ Egipt, nɛ nyɛɛ kɛ je ma amɛ tsuo yeɔ jua a ji nɛ ɔ!

4 Sidon ma, zo gbe mo! Bɔ nɛ wo kpetekpleenyɛ ɔ ngɛ mo dee ji nɛ ɔ nɛ: “I fɔ we hyɛ, nɛ i lɛ́ binyumuwi kɛ biyiwi hyɛ.”

5 E maa pee Egipt bi po nyakpɛ, nɛ a maa hao, ke a nu kaa a kpata Tiro hɛ mi ɔ.

6 Nyɛ Fonisia bi, nyɛɛ tu fo kɛ ya Spania!

7 Tiro, ma nɛ a po blema lokoo, nɛ bua jɔmi hyi lɛ tɔ ɔ, lɛ tete ji nɛ ɔ? Ma nɛ mi bi po wo kɛ ya to mahi a sisi ngɛ wo se tɔɔ ɔ, lɛ kɛ̃ ji nɛ ɔ?

8 Mɛnɔ nɛ to ga kaa ní nɛ ɔmɛ tsuo nɛ ba Tiro nɔ ɔ? Tiro, matsɛ ma nguaa kɛ e mi jua yeli kpanakpanaa nɛ ji ganɔhi nɛ a hɛ mi ngɛ nyami saminya ngɛ je ɔ mi tsuo ɔ, mɛnɔ ha nɛ nɔ́ nɛ ɔ ba e nɔ ɔ?

9 Yawɛ Tabohiatsɛ ɔ nitsɛ lɛ pee. E pee enɛ ɔ, konɛ a he nɔ womi ɔ se nɛ po, nɛ nimli nguangua amɛ hu a he guɛ nɛ gbo.

10 Nyɛ Spania bi, nyɛɛ ho nɛ nyɛ ya hu. Ejakaa lɛsimuɔ he ko be hiɛmɛ nɛ ɔ hu.

11 Yawɛ kɛ e he wami kpata nɔ yemi ɔmɛ a hɛ mi ngɛ wo se tsitsaa lokoo. Yawɛ nɛ ku Sidon mɔ ɔmɛ.

12 Sidon ma, o bua jɔmi ɔ se po, nɛ a ngɛ o ma mi bi ɔmɛ yi mi wae. Ke a tu fo kɛ ho Kipro ya tete po, lejɛ ɔ hu, a be he jɔmi nae.

13 Tsa pi Asiria bi nɛ pee ní nɛ ɔmɛ; Babilonia bi mohu nɛ ha lohwe dikali ba tua Tiro ma a; mɛ nɛ a fia kpoku kɛ wo Tiro ma a he, nɛ a ku mɔ nguangua amɛ kɛ pee lɛ ma doku.

14 Nyɛ Spania akua hluili ngɛ wo nɔ, nyɛɛ wo yana nɛ nyɛɛ ye kɔmɔ! Ma nɛ nyɛ ngɔ nyɛ hɛ ngɔ fɔ nɔ ɔ, a kpata e hɛ mi pɛsɛpɛsɛ.

15 Be ma nɛ nihi a hɛ maa je Tiro nɔ jeha nyingmi kpaago sɔuu, nɛ ji matsɛ kake wami be tsuo. Jeha nyingmi kpaago ɔ se ɔ, Tiro maa pee kaa yo ajuama nɛ a wo lɛ la.

16 Mo, yaholɔ nɛ nihi a hɛ je o nɔ, ngɔɔ o kpa saku ɔ kɛ ya kpa ma a mi! Fiaa saku ɔ, nɛ o la kɛ to he kaa sa be ko ɔ, konɛ nyumuhi nɛ a ba o ngɔ ekohu!

17 Jeha nyingmi kpaago ɔ se ɔ, Yawɛ maa na Tiro mɔbɔ, nɛ e ma ha nɛ Tiro, kɛ je ma amɛ ma ya tsu ní ekohu kaa sa a; e kɛ ma amɛ tsuo ma ya ye jua.

18 Sika nɛ e ma na kɛ je e jua yemi ɔ mi ɔ, e maa gbaa nɔ kɛ ha Yawɛ. E be nya buae kɛ to, se mohu nihi nɛ ma ba ja Yawɛ ɔ, a maa ngɔ sika nɛ ɔ kɛ he niye ní, kɛ heha ní nɛ hia mɛ.