Yesaya 14

Ma a maa kpale kɛ je ma se kɛ ba we

1 Yawɛ maa na e ma Israel mɔbɔ ekohu, nɛ e ma ná a he tsui kaa lɛ nitsɛ e ma. E maa to mɛ si ngɛ mɛ nitsɛmɛ a zugba nɔ. Nibwɔhi ma ba to mɛ, nɛ a kɛ mɛ maa hi si.

2 Je ma amɛ maa ngɔ Israel bi ɔmɛ kɛ ba zugba nɛ Yawɛ ha mɛ ɔ nɔ ekohu, nɛ a ma ba sɔmɔ mɛ kaa nyɔguɛhi. Nihi nɛ nuu Israel nyɔguɛ sa a, jehanɛ lɛɛ Israel hu maa ye a nɔ.

Babilonia matsɛ ɔ ngɛ gbeje

3 Be ma nɛ aywilɛho, haomi, kɛ ní tsumi kpakpataa nɛ a nyɛ o nɔ nɛ o tsu ɔ, Yawɛ ma ha lɛ tsuo se maa po.

4 Ke Yawɛ pee enɛ ɔ, nyɛ Israel bi ɔmɛ hu nyɛ maa ye Babilonia matsɛ ɔ he fɛu ke, “Matsɛ yiwutsotsɛ ɔ nɔ si! E be nɔ ko nɔ ko yi mi wae hu.

5 Yawɛ ku nɔ yeli yaya amɛ a he wami nya la.

6 Nimli nɛ ɔmɛ kɛ abofu nɛ nya wa fiaa je ma amɛ ní, nɛ a nɛ mɛ mɔbɔ kulaa; je mahi nɛ a ye a nɔ ɔ hu, a wa mɛ yi mi wawɛɛ nitsɛ nɛ he jɔɔmi ko be mi.

7 Jehanɛ lɛɛ je ɔ tsuo na he jɔmi kɛ tue mi jɔmi, nɛ nɔ tsuaa nɔ ngɛ lae kɛ bua jɔmi.

8 Tso nguaa amɛ, kɛ seda tso ɔmɛ nɛ ngɛ Lebanon ɔ po ngɛ nyae ke, ‘Matsɛ ɔ kpa sɛ; nɛ nɛ́ e be nɛ ɔ, nɔ ko be nɛ ma ha nɛ a poo wɔ hu!’

9 “Babilonia matsɛ, gbeje pee klaalo nɛ e ma he mo atuu. Ni nguahi nɛ hi je mi hyɛ ɔ a kpade ɔmɛ ngɛ si poe. Matsɛmɛ ɔmɛ a kpade ɔmɛ ngɛ si tee ngɛ a matsɛ sɛ ɔmɛ a nɔ.

10 Mɛ tsuo a ngɛ mo dee ke, ‘Jehanɛ lɛɛ mo hu o gbɔjɔ kaa wɔ! Waa kɛ mo sɔ!

11 Sa a, kpa sakuhi a kɛ laa kɛ woɔ o hɛ mi nyami; se jehanɛ lɛɛ o su gbeje. Wɔyewɔyehi ji sa nɛ o hwɔɔ si ngɛ nɔ, nɛ gɔgɔhi ji kuutu nɛ ha o nɔ.’

12 ⓙ “Babilonia matsɛ, mo nɛ́ o ngɛ kaa nɔkɔ nɛ kpɛɔ hleii makɛ ɔ, o je hiɔwe ba nɔ si bum! Be ko nɛ be ɔ, o ye mahi a nɔ kunimi, se jehanɛ lɛɛ a tsɛ̃ mo ko si.

13 ⓚ O to o yi mi kaa o maa kuɔ kɛ ya hiɔwe lokoo nɛ o kɛ o matsɛ sɛ ɔ ya ma Mawu dodoe ɔmɛ nɛ ya hiɔwe pe kulaa a a se tɔɔ. O susu kaa o maa hi si kaa matsɛ ngɛ jamɛ a yo ɔ nɔ, ngɛ omleyi je he nɛ a kpee ngɛ ɔ.

14 O de hu ke o maa kuɔ kɛ ya bɔku ɔmɛ a yi mi tɔɔ; nɛ o maa pee o he kaa Tabohiatsɛ ɔ nitsɛ.

15 Se mohu ɔ, a ba mo si kɛ ho gbeje he nɛ mi kuɔ pe kulaa a ya.

16 “Ni gbogboe ɔmɛ maa pa a nya mi hatoo maa hi mo hyɛe gaa. A ma bi ke, ‘Nɔ nɛ mimiɛ je ɔ, nɛ e ha nɛ nɔ yemihi a he do blibliibli ɔ, anɛ pi lɛ ji nɛ ɔ lo?

17 Nɔ nɛ kpata mahi a hɛ mi, nɛ e ha je ɔ he tsuaa he plɛ pee nga kplanaa nɔ ɔ, pi lɛ ji nɛ ɔ lo?’

18 Je ma amɛ a matsɛmɛ ɔmɛ tsuo hwɔɔ si kɛ hɛ mi nyami ngɛ yɔkɔ agbohi a mi,

19 se moo lɛɛ o be yɔkɔ ɔ eko kulaa; a sake o gbogboe ɔ ngɔ fɔ he, konɛ e sa. Nihi nɛ nɔ ngɛ ta mi ɔ, a gbogboe ɔmɛ ha o nɔ; a sake o kɛ mɛ tsuo kɛ pue tɛ muɔ ko mi kaa gbogboe nɛ a naa nɔ.

20 Akɛnɛ o kpata o zugba a hɛ mi, nɛ o gbe mo nitsɛ o ma mi bi ɔmɛ he je ɔ, a be mo pue kaa matsɛmɛ kpa amɛ. Nyɛ ko ha nɛ nimli, yayami peeli nɛ ɔmɛ a nina ko yi nɛ na wami.

21 Nyɛɛ hyɛ nɛ nyɛɛ gbe a bimɛ ɔmɛ; nyɛ bɔni a hɛ mi kpatami koo! Matsɛ ɔ binyumu ɔmɛ ma gbo ngɛ a nɛmɛ ɔmɛ a he yayami ɔmɛ a he. Ke pi ja a, a ma ba te si ekohu; a maa ye je ɔ nɔ, nɛ a maa po mahi ha a he.”

Mawu ma kpata Babilon hɛ mi

22 Yawɛ Tabohiatsɛ ɔ ke, “Ma ya tua Babilon ma a, nɛ ma kpata e hɛ mi. E biɛ maa laa. E ngmɛdu kɛ e nina tsuo a ti nɔ ko nɔ ko yi be wami nae. Imi, Yawɛ lɛ i de.

23 Ma ha Babilon ma plɛ pee zugba nɛ tɔ nyu, kɛ ablɛgogoehi a hi he. Ma kpata Babilon hɛ mi pɛsɛpɛsɛ. Babilon maa pee kaa ma nɛ a bɛɛ mi, nɛ nɔ ko nɔ ko be mi hie hu. Imi, Yawɛ lɛ i de.”

Mawu ma kpata Asiria bi ɔmɛ a hɛ mi

24 ⓛ Yawɛ Tabohiatsɛ ɔ ka kita ke, “Nɔ́ nɛ i to kaa ma pee ɔ maa ba mi ja. Nɔ́ nɛ i to ye yi mi kaa ma tsu ɔ, ma tsu kokooko.

25 Ma kpata Asiria bi ɔmɛ a hɛ mi ngɛ ye ma Israel zugba a nɔ, nɛ ma naa a nɔ ngɛ ye yo ɔmɛ a nɔ. Ma je ye ma a kuɛ kɛ je kuɛpã tso nɛ Asiria bi ɔmɛ kɛ wo lɛ ɔ mi; nɛ tlomi nɛ a ha ye ma a tloo ɔ hu, ma je ngɛ a nɔ.

26 Bɔ nɛ i to ye yi mi ha je ɔ ji nɛ ɔ nɛ, nɛ i wo ye kɔni nɔ konɛ ma gbla ma amɛ a tue.”

27 Yawɛ Tabohiatsɛ ɔ pee e yi mi kaa e ma tsu nɔ́ nɛ ɔ; e wo e kɔni nɔ momo ke e maa gbla a tue, nɛ nɔ ko nɔ ko be nyɛe maa tsi e nya.

Mawu ma kpata Filisti bi ɔmɛ a hɛ mi

28 ⓜ Jeha nɛ Matsɛ Ahaz gbo ɔ nɛ a fiɛ sɛ gbi nɛ ɔ.

29 ⓝ Filistia bi, nyɛ bua ko jɔ kulaa kaa tso nɛ a kɛ fiaa nyɛ ɔ mi ku. Ke sinɔ kake gbo ɔ, ekpa nɛ e duɔ nya wa pe kekle nɔ́ ɔ ba yeɔ e nane mi. Sinɔ hlui ko ma pɛ, nɛ sinɔ pɛlitsɛ maa je mi.

30 Yawɛ ma ha ohiatsɛmɛ a bimɛ ɔmɛ niye ní, nɛ e ma ha nɛ nɔ́ nali maa hi si ngɛ tue mi jɔmi mi. Se nyɛ Filisti bi ɔmɛ lɛɛ e ma ha hwɔ nɛ nya wa maa ye nyɛ; hwɔ nɛ ɔ maa gbe nyɛ tsuo pɛpɛɛpɛ nɛ e be nɔ kake ngmelu po piɛe.

31 Nyɛ Filisti ma amɛ tsuo, nyɛ kpa ngmlaa! Nyɛ tsuo nyɛ tsui nɛ po! Ejakaa la su ku ko je omleyi je kɛ ma. Tabo ko nɛ fɔ̃lɔ ko fɔ̃lɔ ko be mi nɛ ma a nɛ.

32 Mɛni heto wa ma ha tsɔli ɔmɛ nɛ je Filistia kɛ ba a? Wa ma de mɛ ke Yawɛ to Zion sisi saminya, nɛ e ma a nɛ ngɛ amanehlu nae ɔ, a tue mi maa jɔ mɛ ngɛ lejɛ ɔ.