1 Sharon pú mi mɔmɔ kɛkɛ ji mi; kɔ̃ mi mɔmɔ ko kɛkɛ ji mi.
Nyumu ɔ
2 Ye afɛu yo nɛ i suɔ mo saminya, bɔ nɛ nga nɔ mɔmɔ ngɛ ngɛ miohi a mi ɔ, jã o ngɛ kɛ ha mi ngɛ yihi tsuo a kpɛti.
Yo ɔ
3 Ke a ngɔ ye suɔlɔ ɔ ngɔ to nyumu kpa amɛ a he ɔ, e ngɛ kaa tso nɛ yiblii ngɔɔ saminya ngɛ pú mi tsohi a kpɛti. I suɔ nɛ ma hi e hɔ̃ ɔ mi; e yiblii ɔ ngɔɔ ye nya.
4 E kɛ mi ba e asa a nɔ niye he ɔ; lejɛ ɔ nɛ e je e suɔmi kpo ngɛ kɛ ha mi.
5 Nyɛ ha mi wai yiblii gbigbli nɛ ma ye, konɛ ma na he wami. Nyɛ ha mi tso yiblii nɛ ngɔɔ saminya nɛ ma kɛ jɔɔ ye tsui he; ejakaa suɔmi ɔ ngɛ mi gbee.
6 Ye yi fɔɔ si ngɛ e muɔ kɔni nɔ, nɛ e ngɔ e hiɔ nine kɛ fua mi.
7 Yerusalem yihi, nyɛɛ wo mi si; nyɛ ka mi kita kaa nyɛ na odabɔ nɛ he sɔɔ, kɛ batslɔɔ kaa nyɛ be ye suɔlɔ ɔ tsɛe kɛ yaa si be nɛ lɛ nitsɛ e maa te si.
La enyɔne
Yo ɔ
8 I nu ye suɔlɔ ɔ gbi. E ngɛ hiie ngɛ yo ɔmɛ a nɔ kɛ ma; e ngɛ fo tue ngɛ yoku ɔmɛ a nɔ kɛ ma ye ngɔ.
9 Ye suɔlɔ ɔ ngɛ kaa batslɔɔ; e ngɛ kaa oflote niheyo. O nɛ lɛ nɛ daa si ngɛ wa tsu ɔ se. E ngɛ saflɛ ɔ mi hyɛe; e ngɛ saflɛ puɔ ɔmɛ a mi flie.
10 Ye suɔlɔ ɔ ngɛ mi nɔ́ ko dee. Ye suɔlɔ, ye afɛu yo; ba nɛ waa ho koo!
Nyumu ɔ
11 Fĩɛ be ɔ be; hiɔmi hu kpa nɛmi.
12 Mɔmɔ ɔmɛ gba tii ngɛ nga a nɔ. Lohwe pɛlitsɛmɛ a lami be ji nɛ ɔ nɛ. Lahuɛhi a la he wa ngɛ nue ngɛ pú ɔ mi ɔ nɛ.
13 Ngmɔkɔ bɔni fumi. Kɔɔhiɔ mi hyi kɛ wai yiblii he via. Ye suɔlɔ, ye afɛu yo; ba nɛ waa ho koo!
14 O ngɛ kaa lahuɛ nɛ ya laa e he ngɛ tɛ sa puɔ mi. Ha nɛ ma na o hɛ mi. O he ngɛ fɛu loo. Ha nɛ ma nu o gbi. O gbi ngɔɔ loo!
15 Nyɛɛ nuu kɔkɔbo ɔmɛ ha wɔ. Nyɛɛ nuu kɔkɔbo tsɔwi ɔmɛ nɛ puɛɔ wai ngmɔ ɔmɛ ɔ; ejakaa wai ngmɔ ɔmɛ gba mɔmɔ.
Yo ɔ
16 I ngɔ ye he ngɔ ha ye suɔlɔ ɔ, nɛ lɛ hu e ngɔ e he ngɔ ha mi. He nɛ nga nɔ mɔmɔhi ngɛ ɔ, lejɛ ɔ e haa e to ɔmɛ ní ngɛ.
17 E haa mɛ ní hluu kɛ ya siɔ mɔtu kɔɔhiɔ bɔni fiami, nɛ je mi tsɔɔ. Kpale kɛ ba, ye suɔlɔ; kpale kɛ ba kaa batslɔɔ, kpale kɛ ba kaa oflote niheyo ngɛ Beter yo ɔmɛ a nɔ.