Fiɛlɔ 12

1 Lɔ ɔ he ɔ, mo kai o bɔlɔ ɔ ngɛ o nihe mi, be mi nɛ ligbi yayami ɔmɛ, kɛ jeha yayami ɔmɛ na we nɛ a ba, nɛ o ma de ke, “I be bua jɔmi ngɛ je mi.”

2 Jamɛ a be ɔ, pu, nyɔhiɔ, kɛ dodoehi maa pee sulii ngɛ o hɛngmɛ mi. Daa nɛ ɔ, bɔku ɔmɛ maa pee kaa nɔ́ nɛ hiɔmi yaa nɛ.

3 O ninehi nɛ o kɛ buɔ o he ɔ ma bɔni kpokpomi, nɛ o nane kpakpataa amɛ a mi maa jɔ. O lunguhi be nyɛe maa ta nɔ́ hu, ejakaa a he pi. O hɛngmɛ ɔmɛ a nɔ maa ha, nɛ o be nɔ́ hyɛe saminya hu.

4 Jamɛ a be ɔ, huhui nɛ ngɛ pɛe ngɛ blɔ mi ɔ, o tue be nue hu. Ke o ngɛ nɔ́ tae ɔ, o tsitsa be pɛe hu. Ke la ngɛ pɛe ɔ, pe o maa nu fã kɛ fã kɛkɛ. Makɛ, loko kungwɔ ma kpa nɔ́ ɔ, moo o te si momo.

5 Nɔ́ kuɔmi maa wo o he gbeye, nɛ nyɛɛmi maa pee mo ahuto. O yi bwɔmi ma hiɛ futafuta. O maa nyɛɛ blɛuu blɛuu kaa angmɛɛtɛ nɛ ngɛ si sãe, nɛ o he mi akɔnɔ tsuo se maa po. Wa yaa wa nyagbe he jɔɔmi he ɔ, nɛ a maa wo yana ngɛ blɔ ɔmɛ a mi.

6 Jamɛ a be ɔ, sika hiɔ kpa a ma tsɔ. Sika tsu kplu ɔ maa ywia. Buɛ ɔ maa ywia ngɛ pa a nya, nɛ nyu yɛmi klama a maa ku ngɛ vu ɔ he.

7 Wa nɔmlɔ tso ɔ maa kpale kɛ ya tabo zu mi he nɛ e je ɔ, nɛ mumi ɔ maa ya Mawu ngɔ. Mawu lɛ ha mumi ɔ nɛ.

8 Ye juɛmi deɔ mi ke wami nɛ ɔ, se nami ko be he; lɛ tsuo peeɔ yaka.

Nyagbe

9 Fiɛlɔ ɔ, pi kaa e juɛmi mi kuɔ kɛkɛ; e tsɔɔ ma a nile hulɔ. E bua abɛhi a nya. E kase abɛ ɔmɛ saminya, nɛ e hla a mi.

10 E bɔ mɔde kaa e maa ngma munyuhi nɛ ngɔɔ. Nɛ níhi nɛ e ngma a, anɔkuale sɔuu.

11 Ní leli a munyuhi ngɛ kaa tso kɛ e nya piɔpiɔ nɛ lohwe hyɛli kɛ tsɔ́ɔ́ a lohwehi. Abɛhi nɛ a bua nya a, a he ngɛ se nami wawɛɛ kaa plɛɛkohi nɛ a je blɔ ka kɛ wo tso mi. Wɔ tsuo wa hyɛlɔ kake too nɛ ji Mawu ɔ, lɛ nɛ e ha wɔ kikɛmɛ a abɛ nɛ ɔmɛ.

12 Ye bi, ha nɛ ma wo mo ga nɛ ɔ hulɔ. Womi ngmami be nyagbe; ni kasemi fuu haa nɛ pɔ tɔɔ nɔmlɔ tso ɔ.

13 Nyagbe ɔ, nɔ́ nɛ ma de kɛkɛ ji kaa moo ye Mawu gbeye, nɛ o ye e mlaa amɛ a nɔ. Ní tsumi nɛ ngɛ kɛ ha nimli adesahi tsuo ji nɛ ɔ nɛ.

14 Mawu maa kojo wɔ ngɛ níhi tsuo nɛ wa pee ɔ a he. Níhi nɛ wa pee ngɛ laami mi po, e maa kojo wɔ ngɛ a he; kpakpa jio, yaya jio.