1 Nihi nɛ suɔ mɛ nitsɛmɛ a he ɔ, a kɛ nɔ kpa pee we nɔ́ ko. Nɔ́ ko nɛ nihi tsuo le kaa e hi ɔ, mɛɛ lɛɛ a deɔ ke e hí.
2 E he hia we kuasia kaa ke e kɛ nihi ngɛ munyu tue ɔ, e bɔ mɔde kaa e maa nu nɔ́ nɛ a ngɛ dee ɔ sisi. Kuasia lɛɛ nɔ́ kake too ɔ nɛ e ngɛ dee ɔ, lɔ ɔ pɛ ji nɔ nɛ ngɔɔ ngɛ e tue mi.
3 Yayami peemi kɛ he guɛ gbemi lɛ nyɛɛɔ; ke o hɛ mi pue si pɛ zo maa nyɛɛ se.
4 Nile ma nyɛ je nɔmlɔ nya mi munyu mi; e mi kuɔ kaa wo, nɛ e he tsɔ kaa pa nɛ hia kɛ bee.
5 Nɔ nɛ sane be mi ɔ, e sɛ kaa a hyɛɔ e hɛ mi nɛ a plɛɔ nɔ nɛ nɔ́ da mohu sane hɛ mi ngɔ buɔ si ngɛ kojomi he.
6 Kuasia nya mi munyu woɔ pɛ, kunɔ lɛ nyɛɛɔ se.
7 Kuasia nya mi munyu ngɛ kaa klama nɛ e tsɔ lɛ nitsɛ e he; lɔ ɔ nɔuu ji nɔ nɛ kpataa e hɛ mi.
8 Sieku yelɔ munyu ngɛ kaa niye ní nɛ ngɔɔ. Nimli adesahi suɔ kaa a maa mi kɛ ya a muklii mi tɔɔ.
9 Hejɔtsɛ kɛ nɔ́ puɛlɔ ɔ, nyɛmimɛ ji mɛ.
10 Yawɛ ngɛ kaa mɔ nguaa, he nɛ nimli kpakpahi tuu fo kɛ ya saa we ngɛ nɛ a yi naa wami.
11 Niatsɛmɛ susuɔ kaa ke a na ní ɔ, e haa mɛ bua jɔmi, kaa bɔ nɛ ke a fia gbogbo kɛ wo ma he nɛ ma mi bi ɔmɛ naa he jɔmi ɔ.
12 Nɔ nɛ baa e he si ɔ, a maa wo e hɛ mi nyami; ni nɛmɛ nɛ woɔ a he nɔ ɔ, mɛɛ lɛɛ hɛ mi kpatami blɔ nɔ a ngɛ.
13 Ke a ngɛ mo munyu tue ɔ, bu tue loko o ha heto. Ke o pee we ja a, a ma tsɛ mo kuasia, nɛ o hɛ mi ma pue si.
14 Ke o be he wami, nɛ o na tsui to he ɔ, e maa hi ha mo. Se ke o ngɛ o tsui yee ɔ lɛɛ nɔ́ pee mo.
15 Ní lelɔ ɔ, daa nɛ e pee e juɛmi, kɛ e tue klaalo kɛ ngɛ ní kasee.
16 Nike ní bliɔ blɔ ha nɔ kɛ ya suu nimli nguahi a hɛ mi tɔɔ.
17 Ke nɔ ko sɛ hlami kɛ jaje e sane ɔ, e peeɔ kaa nɔ́ nɛ e sane da kɛ yaa si e nyɛmi ɔ ma bɔni lɛ munyu bimi, loko anɔkuale ɔ maa je kpo.
18 Ke ni nguahi enyɔ ngɛ nɔ́ he huae ɔ, ja a fɔ sɔ kɛ buá sane ɔ he, loko pɛ ɔ maa jɔ.
19 Ke o kɛ o nyɛmi pɛ ɔ, e ma plɛ e se kɛ wo mo kaa bɔ nɛ ke a kɛ dade la agbo se ngɛ mɔ mi nɛ nɔ ko nyɛ we mi sɛmi ɔ.
20 Ke o tu munyu ko ɔ, nɔ́ tsuaa nɔ́ nɛ maa ba ngɛ se ɔ, e sa kaa o pɛtɛ he; e hi jio, e hí jio.
21 Munyu nɛ jeɔ nɔ nya mi ɔ, gbenɔ, loo wami lɛ e kɛ baa. Nihi nɛ suɔ munyu tumi ɔ, nɔ́ kpakpa, loo nɔ́ yaya ko nɛ maa je mi kɛ ba a, e sa mɛ.
22 Ke o ngɔ yo kɛkɛ o ná nɔ́ kpakpa, nɛ Yawɛ maa gbaa mo.
23 Ke ohiatsɛ maa tu munyu ɔ, e deɔ ke, “I kpa mo pɛɛ.” Se ke niatsɛ ma ha munyu heto ɔ, e kuɛɔ kɛ woɔ nɔ.
24 Huɛ bɔmi komɛ a se kɛ we kulaa. Se huɛmɛ komɛ hu mɛtɛɛ a sibi a he kpɛii pe nyɛmimɛ tete po.