Mawu, matsɛ kpetekpleenyɛ ɔ
1 ⓗ Yawɛ ngɛ matsɛ yee; je ma amɛ a he ngɛ doe blibliibli. E hii si ngɛ e sɛ ɔ nɔ ngɛ kerub ɔmɛ a nɔ, nɛ zugba ngɛ mimiɛe.
2 Yawɛ he biɛ ngɛ Zion wawɛɛ nitsɛ; e kle pe je ma amɛ tsuo.
3 Nihi tsuo ma je e biɛ kpetekpleenyɛ ɔ yi; a ma je e biɛ nɛ he ngɛ gbeye ɔ yi. E ngɛ klɔuklɔu!
4 Matsɛ kpetekpleenyɛ, mo nɛ o suɔ nɔ́ nɛ da! O to anɔkuale, kɛ dami sane yemi si ngɛ Israel.
5 Nyɛ je Yawɛ, wa Mawu ɔ yi! Nyɛ kpla si ngɛ e matsɛ sɛ ɔ hɛ mi nɛ nyɛ ja lɛ. Mawu klɔuklɔu ji lɛ!
6 E we osɔfohi ji Mose, kɛ Aaron. Nihi nɛ fa kue ha lɛ ɔ, Samuel piɛ a he. Mɛ tsuo a fa kue ha lɛ, nɛ e bu mɛ tue.
7 ⓘ E kɛ mɛ tu munyu ngɛ bɔku titima mi. A ye mlaahi nɛ e wo mɛ, kɛ famihi nɛ e fa mɛ ɔ tsuo nɔ.
8 Yawɛ, wa Mawu! O ma a fa kue ha mo, nɛ o bu mɛ tue. O kɛ mɛ hi si kaa Mawu nɛ ngɔɔ a he yayami kɛ paa mɛ; se ke a tɔ̃ ɔ, o gblaa a tue kɛ̃.
9 Nyɛ je Yawɛ, wa Mawu ɔ yi; nyɛ ja lɛ ngɛ e yo klɔuklɔu ɔ nɔ. Yawɛ, wa Mawu ɔ ngɛ klɔuklɔu.