Mawu sina la
1 Yawɛ, ma na mo si kɛ ye tsui tsuo; ma sɛɛ nyakpɛ níhi nɛ o pee ɔ.
2 Mawu Ope, o he ɔ, ma la kɛ bua jɔmi; ma la kɛ je o yi.
3 Benɛ ye he nyɛli ɔmɛ kpale a se ɔ, a nɔɔ si nɛ a gbo ngɛ o hɛ mi.
4 Ejakaa o kojoɔ ngɛ dami kɛ anɔkuale nya; o ye ye sane ɔ ha mi, nɛ o wo mi nguɔ.
5 O ka je ma amɛ a hɛ mi. O kpata yayami peeli a hɛ mi, nɛ a biɛ laa pɛsɛpɛsɛ.
6 Wa he nyɛli ɔmɛ a hɛ mi kpata; a ma amɛ hu a hɛ mi kpata, nɛ nɔ́ ko be nɛ a kɛ ma kai mɛ hu.
7 Se Yawɛ lɛɛ e ngɛ daa; e hii si ngɛ e kojomi sɛ ɔ nɔ.
8 Nɛ e kɛ anɔkuale, kɛ dami sane yemi maa kojo je ɔ, kɛ e mi nimli ɔmɛ.
9 Yawɛ ji wesa he kɛ ha nihi nɛ a waa mɛ yi mi. Haomi be mi ɔ, e ngɔ lɛ a naa he jɔmi ngɛ.
10 Yawɛ, nihi nɛ le mo ɔ, a ngɔɔ a hɛ kɛ fɔɔ o nɔ. Ejakaa ni nɛmɛ nɛ hla o se blɔ ɔ, mo Yawɛ, o kua we mɛ.
11 Nyɛ la kɛ je Yawɛ yi; Yawɛ nɛ ngɛ Zion ɔ, nyɛ je e yi. Nyɛɛ sɛɛ níhi nɛ e pee ɔ kɛ ha je ma amɛ tsuo.
12 Mawu kaiɔ nɔ́ nali, nɛ e yeɔ a he lue. Ke nɔ́ nali fa kue ha Mawu ɔ, e nuɔ; e hɛ ji a nɔ.
13 Yawɛ, mo nɛ o jeɔ mi kɛ jeɔ gbenɔ dɛ mi. Hyɛ bɔ nɛ ye he nyɛli ngɛ mi haoe ha nɛ o na mi mɔbɔ,
14 konɛ ma na bua jɔmi nɛ ma je o yi ngɛ Yerusalem bi ɔmɛ a hɛ mi; nɛ ma nya kɛ tsɔɔ kaa o he ye yi wami.
15 Muɔ ɔ nɛ je ma amɛ tsua a, mɛ nitsɛmɛ a nɔ mi. Klama a nɛ a tsɔ kɛ laa a, mɛ nitsɛmɛ a nane ya du lɛ.
16 Yawɛ je e he kpo; e ye dami sane, nɛ yayami peeli a nane ya du klama a nɛ mɛ nitsɛmɛ a tsɔ ɔ.
17 Nimli yayamihi, kɛ mahi tsuo nɛ a hɛ je Mawu nɔ ɔ, a nyagbe ji gbenɔ.
18 Ejakaa pi daa nɛ hɛ maa je dɛgutsɛmɛ a nɔ; ohiatsɛmɛ a hɛ kɛ nɔ fɔmi be yaka pee.
19 Yawɛ, tee si; ko ha nɛ nɔmlɔ adesa nɛ ye o nɔ! Ha nɛ a kojo je ma amɛ ngɛ o hɛ mi.
20 Yawɛ, wo je ma amɛ a he gbeye, konɛ a le kaa nimli adesahi kɛkɛ ji mɛ.