Mawu kɛ e ma a
1 Ye ma, nyɛɛ bu nɔ́ nɛ ma tsɔɔ nyɛ nɛ ɔ tue; nyɛɛ bu ye nya mi munyu ɔmɛ tue.
2 ⓠ Ma tu munyu ngɛ abɛ gbi mi; ma gba nyɛ blema nyakpɛ sanehi:
3 níhi nɛ wa le, nɛ wa nu, níhi nɛ wa nɛmɛ ɔmɛ de wɔ.
4 Wa be ní nɛ ɔmɛ ngɔe kɛ laa wa bimɛ. Yi nɔhi nɛ maa ba ngɛ se ɔ, ní nguanguahi nɛ Yawɛ tsu, nyakpɛ níhi nɛ e pee, kɛ he wami kpetekpleenyɛ nɛ e ngɛ ɔ, wa maa gba mɛ.
5 E ha Israel bi ɔmɛ mlaa; ee, e ngɔ e munyu ɔ kɛ ha Yakob nina a. E fa wa nɛmɛ ɔmɛ ke a tsɔɔ a bimɛ ɔmɛ mlaa a,
6 konɛ yi nɔhi nɛ maa ba ngɛ se ɔ nɛ kase, nɛ mɛ hu a tsɔɔ a bimɛ.
7 Kɛkɛ ɔ, mɛ hu a maa ngɔ a hɛ kɛ fɔ Mawu nɔ. Níhi nɛ e tsu ha mɛ ɔ, a hɛ be nɔ jee, nɛ a maa ye e mlaa amɛ a nɔ daa;
8 konɛ a ko ba wa tue, nɛ a ko ba tsɔ atuã kaa bɔ nɛ a nɛmɛ ɔmɛ pee ɔ. Mɛɛ a ngɔɛ a hɛ kɛ fɔɛ Mawu nɔ kɛ pi si; anɔkuale hu a yi lɛ bɔ nɛ sa.
9 Efraim bi ɔmɛ mia, nɛ a hɛɛ kɛ̃ɛ̃, se benɛ ta hwumi be ɔ su ɔ, a ma fo kɛ je ta a nya.
10 Somi nɛ Mawu kɛ mɛ so ɔ, a yi nɔ; e mlaa a hu a kua nɔ yemi.
11 Níhi nɛ e tsu ha mɛ, kɛ nyakpɛ níhi nɛ e pee nɛ a na a, a hɛ je lɛ tsuo nɔ.
12 ⓡ Mawu pee nyakpɛ ní babauu ngɛ a nɛmɛ ɔmɛ a hɛ mi, ngɛ Zoan nga kplanaa a nɔ, ngɛ Egipt zugba a mi.
13 ⓢ E gba wo ɔ mi, nɛ nyu ɔ da si glekugleku ngɛ hiɔ nɔ kɛ muɔ nɔ; nɛ e ha nɛ e ma a gu mi kɛ be.
14 ⓣ Piani ɔ, e kɛ bɔku tsɔɔ mɛ blɔ, nyɔ mi lɛɛ e haa mɛ la nɛ hii kpɛe.
15 ⓤ E gba tɛ sahi a mi ngɛ nga a nɔ, nɛ e ha mɛ nyu babauu nɛ a nu.
16 E ha nɛ nyu je tɛ sa mi babaaba kaa pa nɛ hia kɛ bee.
17 Se kɛ̃, a ya nɔ pee yayami kɛ si Mawu; a tsɔ atuã kɛ si Hiɔwe No ɔ ngɛ nga kplanaa a nɔ.
18 ⓥ A bi Mawu ke e ha mɛ niye ní nɛ mɛɛ a ngɛ hlae ɔ, nɛ a kɛ nɔ́ nɛ ɔ peemi ka Mawu.
19 A tu munyu kɛ si Mawu, nɛ a bi ke, “Anɛ Mawu ma nyɛ ma ha wɔ niye ní ngɛ nga a nɔ lo?
20 Niinɛ, e fia tɛ sa a nɔ́ nɛ nyu je mi kɛ be babaaba kaa pa nɛ hia. Se anɛ e ma nyɛ ma ha e ma a abolo, kɛ lo hu lo?”
21 Benɛ Yawɛ nu nɔ́ nɛ ɔ, e mi mi fu wawɛɛ nitsɛ. E ngɔ la kɛ gbla e ma a tue; e mi mi fumi ɔ nya bɛ si kulaa.
22 Ejakaa a ngɔɛ a hɛ kɛ fɔɛ Mawu nɔ; a he we yi kaa e ma he a yi wami.
23 Se kɛ̃, e fa, nɛ hiɔwe sinya amɛ bli.
24 ⓦ E ha mɛ ngma kɛ je hiɔwe; ee, e ha mɛ mana nɛ a ye.
25 Mawu ha mɛ niye ní babauu; ee, adesahi na Mawu bɔfohi a niye ní lɛ a ye.
26 E ha nɛ beleku kɔɔhiɔ fia ngɛ hiɔwe, nɛ e kɛ e he wami kpaka leneyi kɔɔhiɔ kɛ ba.
27 E ha nɛ lohwe pɛlitsɛmɛ je hiɔwe ba, lohwe pɛlitsɛmɛ babauu kaa wo nya zia.
28 Lohwe ɔmɛ ba nɔɔ si ngɛ ma sito he ɔ, ngɛ a bo tsu ɔmɛ a he kɛ bɔle lejɛ ɔ tsuo.
29 Mawu ha ma a niye ní nɛ a tsui suɔ, nɛ a ye, nɛ a tɔ saminya.
30 Se benɛ a ngɛ ní ɔ yee kɛ mwɔɔ ɔ, nɛ a na we nɛ a gbe nya a,
31 Mawu mi mi fu mɛ wawɛɛ nitsɛ, nɛ e gbe a kpɛti katsɛmɛ ɔmɛ nɛ ji Israel nihewi kpakpa amɛ.
32 Ní nɛ ɔmɛ tsuo a se ɔ, ma a ya nɔ pee yayami. Nyakpɛ níhi tsuo nɛ e pee ɔ a se ɔ, a he we lɛ yi.
33 Enɛ ɔ he je ɔ, e po a wami be ɔ nɔ kpiti, nɛ dengme, kɛ nɔ́ nami sɔuu lɛ ngɛ mi.
34 Be tsuaa be nɛ e maa gbe a ti ni komɛ ɔ, ni nɛmɛ nɛ piɛ ɔ ma hla e se blɔ. A ma pia a he, nɛ a maa fa kue ha lɛ.
35 A ma kai kaa Mawu ji a he bulɔ; a ma kai kaa Mawu, Hiɔwe No ɔ ji nɔ nɛ heɔ a yi wami.
36 Se munyuhi nɛ jeɔ a nya a, lakpa sɔuu; a de we nɔ́ ko kɛ ji a tsui mi.
37 A yi lɛ anɔkuale ɔ, somi nɛ e kɛ mɛ so ɔ hu a yi nɔ.
38 Se akɛnɛ mɔbɔ nalɔ ji Mawu he je ɔ, e ngɔ a he yayami ɔ ngɔ pa mɛ, nɛ e kpataa we a hɛ mi. Behi fuu ke e mi mi miɔ nɛ e ma fu, kɛkɛ e tsi nya amlɔ.
39 E kaiɔ kaa adesahi kɛkɛ ji mɛ; a ngɛ kaa kɔɔhiɔ nɛ fia kɛ be nɛ kpale we e se kɛ bɛ hu.
40 Hyɛ bɔ nɛ a tsɔ e hɛ mi atuã si abɔ ngɛ nga a nɔ! Hyɛ bɔ nɛ a pee lɛ nidɔ ní si abɔ ngɛ nga kplanaa a nɔ!
41 A ka Mawu nɔtonɔto; a wo Israel nɔ klɔuklɔu ɔ mi mi la.
42 A kaii we e he wami kpetekpleenyɛ ɔ hu; ligbi ɔ nɛ e je mɛ kɛ je a he nyɛli ɔmɛ a dɛ mi ɔ hu a hɛ je nɔ.
43 Jamɛ a be ɔ, e pee nyakpɛ níhi ngɛ Zoan nga kplanaa a nɔ ngɛ Egipt.
44 ⓧ E ha nɛ pa amɛ plɛ pee muɔ, nɛ Egipt bi ɔmɛ nɛ nyu nɛ a nu.
45 ⓨ E ha nɛ pwɔlwɔɛ ba babauu, nɛ a ba hao ma mi bi ɔmɛ. Ovɔnɔhi babauu hu ba jã kɛ̃, nɛ a ba puɛ ní ngɛ zugba a nɔ.
46 ⓩ E ngɔ a ngmɔ ní ɔmɛ ngɔ ha baalɛhi; a tsu ní ha baalɛhi nɛ a ye.
47 ⓐ E kɛ gbiɛ ngo ngu gbe a wai tso ɔmɛ; a ngmɔkɔ tso ɔmɛ lɛɛ, e kɛ fiɛ nɛ nya wa gbe mɛ.
48 E kɛ gbiɛ ngo ngu gbe a na amɛ; a to ɔmɛ lɛɛ e kɛ oslabai gbe mɛ.
49 E mi mi fu mɛ wawɛɛ nitsɛ; nɛ abofu nɛ ɔ ngɔ haomi babauu kɛ ba a nɔ kaa Mawu bɔfohi kpataa nɔ hɛ mi.
50 E mi mi la a nya bɛ si; e ngɔɛ a he kɛ ki mɛ hulɔ. Se mohu e kɛ gbenɔ hiɔ kpata a hɛ mi.
51 ⓑ E gbe bitɛtehi tsuo ngɛ we tsuaa we mi ngɛ Egipt zugba a nɔ.
52 ⓒ Se lɛ nitsɛ e ma a lɛɛ e nyɛɛ a hɛ mi, nɛ e kpaka mɛ kɛ gu nga kplanaa a nɔ kaa to hyɛlɔ tsɔɔ to.
53 ⓓ E hɛɛ mɛ dɔdɔɔdɔ nɛ a yi gbeye. Se a he nyɛli ɔmɛ lɛɛ wo ɔ ku kɛ pue a nɔ.
54 ⓔ E ngɔ mɛ kɛ ba e yoku klɔuklɔu ɔ nɔ. E kɛ mɛ ba yo ɔ nɛ lɛ nitsɛ e ngɔ e he wami kɛ kpɔ ɔ nɔ.
55 ⓕ E fie ma je li ɔmɛ kɛ je Israel bi ɔmɛ a blɔ mi. E dla a zugba a ngɔ ha e ma a, nɛ lejɛ ɔ ba pee a weto ní, kɛ a hi he.
56 ⓖ Se a ka Mawu, Hiɔwe No ɔ; a tsɔ e hɛ mi atuã, nɛ a yi e mlaa amɛ a nɔ.
57 A je Mawu se; a yi lɛ anɔkuale kɛ pi si kaa a nɛmɛ ɔmɛ nɔuu. A gba kɛ je e blɔ ɔ nɔ kaa kɛ̃ɛ̃ nɛ mi dɔ nɛ nyɛ we nɛ e ya e hɛ mi tɛɛ.
58 A kɛ a jami he ɔmɛ wo e mi mi la, nɛ a we amaga amɛ ha nɛ e pee kaa hunga jelɔ.
59 Benɛ Mawu na nɔ́ nɛ ɔ, e mi mi fu, nɛ e kua e ma a pɛsɛpɛsɛ.
60 ⓗ E si e sihi he ɔ nɛ ngɛ Shilo ɔ, bo tsu ɔ nɛ e hi mi ngɛ e ma a kpɛti ɔ.
61 ⓘ E ngmɛ blɔ nɛ wa he nyɛli ɔmɛ ba ngɔ somi daka a kɛ ho ma se ya. E he wami ɔ, kɛ e hɛ mi nyami ɔ we okadi ji kikɛmɛ a somi daka nɛ ɔ nɛ.
62 E mi mi fu lɛ nitsɛ e ma a wawɛɛ nitsɛ, nɛ e ngɔ mɛ ngɔ ha a he nyɛli nɛ a gbe mɛ kɛ klaate.
63 La kpata nihewi ɔmɛ a hɛ mi, nɛ yihewi ɔmɛ nɛ nyumuhi nɛ a gba.
64 Osɔfo ɔmɛ gbo ngɛ klaate nya, nɛ a yalɔyi ɔmɛ yi kɔmɔ ha mɛ.
65 Kɛkɛ nɛ Nyɔmtsɛ ɔ te si pam kaa nɔ ko nɛ je mahe mi, aloo oblai nɛ nu dã, nɛ ngɛ huhui kpae.
66 E wo e he nyɛli ɔmɛ fo kɛ ho kɛ zo; e bɔ mɛ ahlua kɛ yaa neneene.
67 E kua Yosef nina a; e hlɛ Efraim wɛtso ɔ.
68 Mohu ɔ, e hla Yuda wɛtso ɔ, kɛ Zion yo ɔ nɛ e suɔ saminya a.
69 Lejɛ ɔ lɛ e ma e we klɔuklɔu ɔ ngɛ. We nɛ ɔ ngɛ he wami, nɛ e maa hi si daa kaa bɔ nɛ hiɔwe kɛ zugba ngɛ ɔ pɛ.
70 ⓙ E hla e tsɔlɔ David hulɔ; e je lɛ kɛ je to lɛmi he ɔ.
71 E je lɛ kɛ je to yihi, kɛ a bi tsɔwitsɔwihi a se. E wo lɛ matsɛ ngɛ Israel, konɛ e hyɛ lɛ, Mawu ɔ e ma a nɔ kaa bɔ nɛ to hyɛlɔ tsɔɔ to ɔ.
72 David hyɛ ma a nɔ bɔ nɛ sa. E nyɛɛ a hɛ mi, nɛ e kpaka mɛ bɔ nɛ sa. Ga, kɛ anɔkuale yemi lɛ e kɛ tsu nɔ́ nɛ ɔ.