Mawu ye kunimi
1 A le Mawu ngɛ Yuda, a woɔ e biɛ ɔ hɛ mi nyami ngɛ Israel.
2 E we ngɛ Yerusalem, Zion ji he nɛ e hii.
3 Lejɛ ɔ lɛ e ku he nyɛli ɔmɛ a ta hwumi ní nɛ ɔmɛ tsuo ngɛ: kɛ̃ɛ̃ mi bi, kɛ tsɛ̃i, kɛ klaate.
4 Hyɛ bɔ nɛ o hɛ mi ba nyami; hyɛ bɔ nɛ o he ngɛ gbeye benɛ o gbe he nyɛli ɔmɛ, nɛ o je yo ɔmɛ a nɔ kɛ ma a.
5 He nyɛli ɔmɛ a ta buli katsɛmɛ ɔmɛ nyɛ we nɛ a da ta a nya kulaa. A gbo kɛ pueɔ si kaa nihi nɛ hwɔ mahe nɛ a kpakpaa a he níhi tsuo.
6 Benɛ mo Yakob Mawu ɔ wo gbi ɔ, okpɔngɔ ɔmɛ, kɛ okpɔngɔ nɔ hili ɔmɛ tsuo gbo kɛ pue si.
7 Niinɛ, o he ngɛ gbeye! Ke o mi mi fu ɔ, mɛnɔ ma nyɛ o hɛ mi maa da?
8 O kojo, nɛ a nu he kɛ je hiɔwe tɔɔ; je ɔ ye gbeye, nɛ e pee dii.
9 Mo Mawu ɔ, o gbla yayami peeli a tue, nɛ je nɛ ɔ mi ni nɛmɛ nɛ a ní ngɛ mɔbɔ ɔ, mɛɛ lɛɛ o fa a he.
10 Edom bi nɛ a mi mi fu ɔ, niinɛ, a ma je o yi kɛ̃. Nɛ ni nɛmɛ nɛ maa piɛ ngɛ Harmat ɔ maa ye o nyami be ɔmɛ.
11 Nyɛɛ wo Yawɛ, nyɛ Mawu ɔ si, nɛ nyɛɛ ye siwo ɔmɛ a nɔ. Nyɛ nihi tsuo nɛ nyɛ bɔle Nyɔmtsɛ ɔ, nɔ nɛ he ngɛ gbeye ɔ, nyɛɛ ngɔ nike ní ba ha lɛ.
12 Ganɔhi nɛ woɔ a he nɔ ɔ, e baa mɛ si; e woɔ matsɛmɛ nguanguahi hu a he gbeye.