WOMI ETƐNE
(<x>230 73-89</x>)
Mawu yeɔ dami sane
1 Niinɛ, Mawu hi ha Israel; e hi ha ni nɛmɛ nɛ a tsui mi tsɔ.
2 Se imi lɛɛ, e piɛ bɔɔ jinɛ i laa blɔ; e piɛ bɔɔ nɛ ye hemi kɛ yemi ta.
3 Ejakaa ye hɛ kɔ he nɔ woli, kɛ yayami peeli a nɔ benɛ i na kaa a ngɛ nɔ yae ngɛ je mi ɔ.
4 A he ko he ko yi mɛ ɔ, a ngɛ he wami; a ngɛ kpakpataa.
5 Haomi bɛ a nɔ kaa bɔ nɛ e baa ni kpahi a nɔ ɔ. A nɛ nɔ́ kaa bɔ nɛ ni kpahi naa nɔ́ ɔ.
6 Enɛ ɔ he je ɔ, he womi ji kuɛ ní nɛ a kɛ fɔ a kuɛ. Yi mi wami ji bo nɛ mɛɛ a haa.
7 Yayami hyi a tsui mi; daa nɛ ɔ, a ngɛ ga yaya toe.
8 A yeɔ nɔ he fɛu, nɛ a tuɔ nɔ he munyu yaya. A woɔ a he nɔ, nɛ a toɔ gahi nɛ a kɛ waa nihi yi mi.
9 A tuɔ munyu kɛ siɔ Mawu ngɛ hiɔwe. A sibi nimli adesahi lɛɛ a kɛ mɛ tuɔ munyu basabasa bɔ nɛ a suɔ.
10 Lɔ ɔ he ɔ, ma a ya nyɛɛ a se, ejakaa a nɛ nɔ́ ko nɛ dɛ ngɛ a he.
11 Nɔ́ nɛ a deɔ ji, “Oo, Mawu be lee! Hiɔwe No ɔ, kɛ e maa pee kɛ le kɛɛ?”
12 Hyɛ, bɔ nɛ yayami peeli ngɛ ji nɛ ɔ nɛ. Mɛɛ lɛɛ daa nɛ ɔ, a ngɛ he jɔmi mi, nɛ a ngɛ ní nae kɛ ngɛ he bɔe.
13 Hyɛ kaa i tsu ye he nɛ mu ko be ye he! Hyɛ kaa i pee ye he klɔuklɔu! Lɛɛ tse enɛ ɔ tsuo peeɔ yaka?
14 Mawu, o haa nɛ i naa nɔ́ ligbi ɔ tsuo; o gblaa ye tue daa mɔtu.
15 Se ke i de nɔ́ ko kaa kikɛ nɛ ɔ, lɛɛ i tɔ, nɛ i pee we ye ní kaa o ma mi no.
16 I hla bɔ nɛ ma pee nɛ ma kɛ nu nɔ́ nɛ ɔ sisi, se ye juɛmi sui he.
17 Kɛkɛ nɛ i ya mo Mawu ɔ, o we klɔuklɔu ɔ, nɛ i ya na bɔ nɛ yayami peeli a nyagbe maa ba ha ngɛ lejɛ ɔ.
18 Ee, o maa ngɔ mɛ kɛ to hehi nɛ saneɔ; o maa tsɛ̃ mɛ kɛ fia si nɛ a hɛ mi ma kpata.
19 Ee, a hɛ mi ma kpata si kake too; a nyagbe maa pee gbeye.
20 A ngɛ kaa nlami nɛ nɔ ko nla; mɔtu kɛkɛ e se po. Nyɔmtsɛ, ke o te si ɔ, a maa laa.
21 Benɛ i hao, nɛ i ngɛ tsui yee ɔ,
22 i je kuasia; i li nɔ́ ko nɔ́ ko; i pee kaa lohwe ngɛ o hɛ mi.
23 Se kɛ̃ ɔ, ma hi o kasa nya daa; o maa pɛtɛ ye he.
24 O maa wo mi ga, nɛ o maa tsɔɔ mi blɔ. Nyagbe ɔ, o ma he mi atuu, nɛ o maa wo ye hɛ mi nyami.
25 Mɛnɔ i pa ngɛ ngɛ hiɔwe pe mo? O se ɔ, nɔ́ ko nɔ́ ko hia we mi ngɛ zugba nɛ ɔ nɔ hu.
26 Ke ye nɔmlɔ tso ɔ gbɔjɔ, nɛ ye tsui ta a, Yawɛ maa wo mi he wami, ejakaa lɛ ji ye nɔ́ fɛɛ nɔ́, nɛ e kɛ mi maa hi si daa.
27 Nihi nɛ kua mo ɔ, a hɛ mi ma kpata. Ni nɛmɛ nɛ yi mo anɔkuale ɔ, o ma kpata mɛ tsuo a hɛ mi.
28 Se imi lɛɛ e hi kaa ma hɛ mi kɛ su Mawu he. Ma ya sa we ngɛ Nyɔmtsɛ Yawɛ ngɔ, nɛ ma sɛɛ níhi nɛ e pee ɔ tsuo.