Yi jemi kɛ sina la
1 Nyɛ je ɔ tsuo, nyɛ hwɔ lele kɛ je Mawu yi!
2 Nyɛ la kɛ je e yi. Nyɛɛ wo e hɛ mi nyami saminya!
3 Nyɛ de Mawu ke, “Bɔ nɛ o peeɔ níhi ɔ ngɛ gbeye loo! O he wami kpetekpleenyɛ ɔ nya a, o he nyɛli ɔmɛ ba a he si ha mo.
4 Nihi tsuo nɛ ngɛ je ɔ mi jaa mo, a laa kɛ jeɔ o yi, a jeɔ o biɛ ɔ yi!”
5 Nyɛɛ ba, nyɛ ba hyɛ níhi nɛ Mawu pee, nyakpɛ níhi nɛ e tsu kɛ ha nimli adesahi.
6 ⓔ E ha wo ɔ plɛ pee zugba gbigbli; nɛ nimli adesahi kɛ a nane po wo ɔ. Wa nyá ngɛ lejɛ ɔ ngɛ nɔ́ nɛ o pee ha wɔ ɔ he.
7 E ngɛ tsɛ yee kɛ he wami kɛ yaa neneene. E hɛngmɛ ngɛ je ma amɛ a he; atuã tsɔli kó wo a he nɔ.
8 Nyɛ je ma amɛ tsuo, nyɛ je wa Mawu ɔ yi! Nyɛ je e yi wawɛɛ nɛ a nu;
9 lɛ ji nɔ nɛ haa wa yi naa wami, nɛ e ha we nɛ waa sane nɔ si.
10 Mo Mawu, o ka wɔ hyɛ ha, o tsu wa he kaa bɔ nɛ a tsuɔ sika hiɔ he ɔ.
11 O ngɔ wɔ ya wo klama mi, nɛ wa du. O ngɔ tlomi nɛ jiɔ ngɔ tloo wɔ.
12 O ha wa he nyɛli ye wa nɔ; wa gu la mi, nɛ wa gu nyu mi hulɔ, se o je wɔ slɔkee kɛ ba he nɛ kplɔkɔtɔ ngɛ.
13 Ma ngɔ sami bɔ kɛ ba o we ɔ, ma ye ye siwo ɔmɛ a nɔ ha mo.
14 Níhi nɛ je ye nya nɛ i de be nɛ e fi mi ɔ, ma pee.
15 Ma ngɔ lohwe nɛ tu zɔ kɛ ba sã sami bɔ ha mo; ma sã agbosuhi ngɛ bɔ sami la tɛ ɔ nɔ. Na kuhi, kɛ apletsihi ma kɛ sã bɔ, konɛ a je la su ku kɛ ya hiɔwe.
16 Nyɛ nihi tsuo nɛ yee Mawu gbeye, nyɛɛ ba nɛ nyɛ ba bu tue, nɛ ma gba nyɛ nɔ́ nɛ e pee ha mi.
17 I kpa ngmlaa kɛ tsɛ lɛ; kɛkɛ nɛ i la kɛ je e yi.
18 Kaa pe i suɔ yayami, nɛ i ngɔ kɛ laa ngɛ ye tsui mi ɔ, Nyɔmtsɛ ɔ ko bui mi tue.
19 Se niinɛ, Mawu bu mi tue, e ta tue ha mi, nɛ e he ye kue fami ɔ nɔ.
20 Ma je Mawu yi, ejakaa e sakee we ye kue fami ɔ kɛ fɔɛ e tue se; nɛ e ha we nɛ mɔbɔ nɛ e naa mi daa a se nɛ po.