Zion, Mawu ma a
1 Yawɛ kle, nɛ e sa kaa a je e yi saminya. A je e yi ngɛ wa Mawu ɔ ma a mi ngɛ yo klɔuklɔu ɔ nɔ.
2 ⓢ Zion yo ɔ nɛ ngɛ omleyi je lokoo ɔ, lɔ ɔ ji matsɛ kpetekpleenyɛ ɔ ma. Yo klɔuklɔu ɔ nɛ maa si glouu kɛ e he fɛu ɔ, lɔ ɔ lɛ haa je ɔ tsuo bua jɔmi.
3 Mawu je e he kpo ngɛ e mɔ ɔmɛ a mi kaa wesa he nitsɛnitsɛ ji lɛ.
4 Matsɛmɛ ɔmɛ bua a he nya babauu, konɛ a ba tua Zion yo ɔ.
5 Se benɛ a ba na a, a nya kpɛ a he; sawale nu mɛ, nɛ a wo fo pulɛpulɛ kɛ je.
6 A he do blibliibli, nɛ a he hia mɛ ngɛ lejɛ ɔ kaa yo nɛ nu kɔɔmi.
7 O ha beleku kɔɔhiɔ fia huu! Nɛ e ywia Spania lɛ ɔmɛ.
8 Wa nu kaa Mawu tsu nyakpɛ níhi ba be; jehanɛ lɛɛ wa na nyakpɛ níhi nɛ e tsu ɔ ngɛ Yawɛ Tabohiatsɛ, wa Mawu ɔ ma a mi. E ma ha ma a maa ma si kpɛii kɛ maa ya neneene.
9 Mawu, ngɛ o we ɔ, wa susu o suɔmi nɛ ngɛ daa a he.
10 Mawu, dami sane pɛ o yeɔ; nɛ kaa bɔ nɛ o biɛ ngɛ pɛe ɔ, a ngɛ o yi jee ngɛ je ɔ mi tsuo.
11 Ha nɛ Zion ma a nɛ nya, nɛ Yuda ma amɛ a bua nɛ jɔ; ejakaa o kojoɔ bɔ nɛ sa pɛ.
12 Mawu ma, nyɛɛ nyɛɛ kɛ bɔle Zion kɛ kpe, nɛ nyɛɛ kane mɔhi nɛ ngɛ lejɛ ɔ;
13 nyɛɛ slaa gbogbo ɔmɛ, nɛ nyɛɛ to mɔ ɔmɛ a he hɛ saminya; bɔ nɛ pee nɛ nyɛɛ sɛɛ ha yi nɔ nɛ nyɛɛ nyɛ se ɔ ke,
14 “Mawu nɛ ɔ ji wa Mawu. Lɛ ji wa Mawu kɛ yaa neneene. Lɛ nɔuu nɛ e maa tsɔɔ wɔ blɔ kɛ maa ya neneene.”