Yi jemi la
1 I to ye tsui si kɛ hyɛ blɔ kaa Yawɛ ma ba piɛ ye he lo. Niinɛ, e bu mi tue, nɛ e nu ye kue fami ɔ.
2 E gbla mi kɛ je muɔ nɛ mi ngɛ gbeye ɔ mi; e je mi kɛ je mɔsɔ nɛ mi ti ɔ mi. E ngɔ mi kɛ ma tɛ sa nɔ, nɛ e ha nɛ ye nane ma si ekohu.
3 E tsɔɔ mi la he nɛ ma la kɛ je wa Mawu ɔ yi. Nihi babauu maa na nɔ́ nɛ ɔ; a maa ye gbeye, nɛ a maa ngɔ a hɛ kɛ fɔ Yawɛ nɔ.
4 A gbaa nɔ nɛ ngɔɔ e hɛ kɛ fɔɔ Yawɛ nɔ, nɔ nɛ ya nyɛɛ we he nɔ woli a se, nɔ nɛ ya piɛ we amaga jali a he kɛ ja we lakpa mawuhi.
5 Yawɛ, ye Mawu! O tsu nyakpɛ ní babauu ha wɔ; o to yi mi kpakpa babauu ngɛ wa he; mɛnɔ po kɛ mo sɔ? Ke i ke ma tu ní nɛ ɔmɛ tsuo a he munyu ɔ, i be nyɛe; ejakaa a he hiɛ tsɔ.
6 ⓝ O hla we bɔ, nɛ o hla we nike ní hulɔ. O bi we ke a sã sami bɔ, loo yayami pami bɔ ha mo. Mohu ɔ, o bli ye tue, konɛ ma nu o gbi.
7 Kɛkɛ nɛ i de ke, “O nɛ mi; i ba; a ngma ye he sane ngɛ womi kpo ɔ mi.
8 Ye Mawu, i suɔ kaa ma pee o suɔmi nya ní; o mlaa a, a ngma ngɛ ye tsui mi.”
9 Yawɛ, i gba kɛ tsɔɔ o ma a tsuo kaa o he wa yi wami. O le kaa i be ye nya mae kɔkɔɔkɔ.
10 Kikɛmɛ a yi wami hemi munyu nɛ ɔ, i ngɔɛ kɛ to we imi nɔ kake too ye yi mi. Daa nɛ ɔ, i jajeɔ ke o yeɔ anɔkuale; i deɔ ke o heɔ nɔ yi wami. O suɔmi, kɛ o we anɔkuale yemi ɔ, i ngɔɛ kɛ laa we o ma kpekpemi ɔ.
11 Yawɛ, naa mi mɔbɔ daa; o kɛ o suɔmi ɔ, kɛ o we anɔkuale ɔ nɛ bu ye he.
Kue fami kɛ ha yemi kɛ buami
(<x>230 70:1</x>)
12 Haomi babauu nɛ hí kaiemi bɔle mi kɛ kpe. Ye yayami ɔmɛ ba pe mi, nɛ i pa hyɛ we nɔ́ hu. Ye yayami ɔmɛ hiɛ kulaa pe ye yi bwɔmi; ye mumi nya ta!
13 Yawɛ, mo he ye yi wami koo! Yawɛ, ba piɛ ye he esɔ!
14 Nihi nɛ hlaa kaa a maa gbe mi ɔ, ha nɛ zo nɛ gbe mɛ nɛ a hɛ mi nɛ pee mɛ yaa. Ni nɛmɛ nɛ nyaa be mi nɛ i ngɛ nɔ́ nae ɔ, ha nɛ a kpale a se kɛ zo.
15 Nihi hu nɛ yeɔ ye he fɛu, nɛ a deɔ ke, “Yiɛ, yiɛ” ɔ, ha nɛ zo nɛ gbe mɛ nɛ a hɛ mi nɛ pee mɛ yaa.
16 Se nihi tsuo nɛ hlaa o se blɔ ɔ, ha nɛ a nya, nɛ a na bua jɔmi. Ni nɛmɛ nɛ suɔ kaa o he a yi wami ɔ, ha nɛ a de daa ke, “Yawɛ kle!”
17 E fi mi, nɛ ye ní ngɛ mɔbɔ; se Nyɔmtsɛ ɔ hɛ ngɛ ye nɔ. Ye Mawu, mo ji ye he piɛlɔ; mo ji ye kpɔlɔ. Moo ba ye ngɔ esɔ, koo to tsle!