Yi jemi la
1 Nyɛ dali tsuo, nyɛ hwɔ lele ngɛ nɔ́ nɛ Yawɛ pee ha nyɛ ɔ he. Nyɛ nihi tsuo nɛ nyɛ buɔ lɛ tue, nyɛ je e yi.
2 Nyɛɛ fia saku kɛ je Yawɛ yi. Nyɛɛ fia kpa saku, nɛ nyɛ la kɛ je Yawɛ yi.
3 Nyɛ la la he kɛ ha lɛ. Nyɛɛ fia kpa saku ɔ saminya, nɛ nyɛ hwɔ lele.
4 Ejakaa Yawɛ munyu ɔ, anɔkuale sɔuu; e peeɔ nɔ́ tsuaa nɔ́ pɛpɛɛpɛ.
5 Yawɛ suɔ nɔ́ nɛ da; e yeɔ dami sane. E suɔmi nɛ be nyagbe ɔ hyi zugba a nɔ tɔ.
6 Fami kɛkɛ lɛ Yawɛ fa nɛ e kɛ pee hiɔwe. Munyu kɛkɛ lɛ je e nya nɛ pu, kɛ nyɔhiɔ, kɛ dodoehi ba.
7 E bua wo nyu ɔ nya glekugleku; nɛ e ngɔ nyu babauu ɔ kɛ to ngɛ nito hehi.
8 Je ɔ tsuo, nyɛɛ ye Yawɛ gbeye! Nyɛ nimli adesahi tsuo, nyɛɛ wo e hɛ mi nyami!
9 Ejakaa munyu kɛkɛ lɛ e tu nɛ e kɛ bɔ je ɔ. Fami kɛkɛ lɛ e fa nɛ níhi tsuo ba.
10 Ke je ma amɛ so kikɛ nɛ ɔ, Yawɛ tsakeɔ a yi mi tomi ɔmɛ, nɛ a nyɛ we nɛ a kɛ tsuɔ ní.
11 Se Yawɛ yi mi tomi ɔmɛ ngɛ daa; e susumi ɔmɛ ngɛ kɛ yaa neneene.
12 A gbaa ma nɛ a Mawu ji Yawɛ. A gbaa ma nɛ Yawɛ hla kaa lɛ nitsɛ e ma a.
13 Yawɛ jeɔ hiɔwe kɛ hyɛɛ nimli adesahi tsuo ngɛ zugba.
14 Yawɛ hyɛɛ nɔ tsuaa nɔ ngɛ zugba a nɔ kɛ jeɔ he nɛ e kojoɔ ngɛ ɔ.
15 Lɛ nɛ haa nɛ nɔ tsuaa nɔ susuɔ e yi mi; e le nɔ́ nɛ nɔ tsuaa nɔ ngɛ pee.
16 Pi ta buli babauu nɛ haa matsɛ yeɔ kunimi; ta bulɔ be nyɛe maa ngɔ e kã kɛ he lɛ nitsɛ e yi wami.
17 Ke o ngɔ o hɛ ngɔ fɔ ta okpɔngɔ nɔ ɔ, e maa pee yaka. Ta okpɔngɔ kɛ e he wami babauu ɔ be nyɛe ma he o yi wami.
18 Nihi nɛ yeɔ Yawɛ gbeye; nihi nɛ ngɔɔ a hɛ ngɔ fɔɔ e nɔ kaa e na mɛ mɔbɔ ɔ, Yawɛ buu a he.
19 E jeɔ mɛ kɛ jeɔ gbenɔ mi; e haa a yi naa wami ngɛ hwɔ be mi.
20 Wa ngɔ wa hɛ ngɔ fɔ Yawɛ nɔ; lɛ ji wa yi baalɔ nɛ piɛɔ wa he.
21 Niinɛ, wa bua jɔ wa he, ejakaa wa ngɔ wa hɛ ngɔ fɔ e nɔ.
22 Yawɛ, o suɔmi nɛ be nyagbe ɔ kɛ wɔ nɛ hi si daa; ejakaa wa ngɔ wa hɛ ngɔ fɔ o nɔ.