Adebɔ níhi woɔ Mawu hɛ mi nyami
1 Mawu nibɔ níhi nɛ ngɛ hiɔwe ngɛ e yi jee, nɛ a ngɛ e nine nya ní tsumi kpo jee.
2 Daa ligbi ɔ, mɔtu jio, gbɔkuɛ jio, nibɔ ní nɛ ɔmɛ ngɛ Mawu he ní sɛɛe.
3 Munyu ko ji a nya a, nɔ ko nɔ ko nui a gbi hulɔ.
4 ⓣ Se kɛ̃ ɔ, a nuɔ a he ngɛ je ɔ mi tsuo; a munyu ɔ pɛɛ kɛ yaa je mi nyagbe he tɔɔ. Mawu pee sihi he ha pu ngɛ hiɔwe.
5 Ke pu gba hleii saminyayoo kɛ ma kikɛ nɛ ɔ, e ngɛ kaa ayɛflo huno nɛ je kpo ngɛ tsu mi kɛ ma, aloo fo tulɔ kpanaa nɛ yaa tu fo kɛ bua jɔmi.
6 Pu jeɔ ngɛ hiɔwe nyagbe he kake; e bɔleɔ si kɛ yaa hiɔwe nyagbe he kake, nɛ e la a, nɔ́ ko nɔ́ ko nyɛ we nya dami.
Yawɛ mlaa a
7 Yawɛ mlaa a hi kɛ pi si; e haa nɔ naa he wami he. Yawɛ mlaa a, anɔkuale sɔuu, e haa nɛ kuasia leɔ ní.
8 Yawɛ mlaa amɛ da pɛpɛɛpɛ; nihi nɛ yeɔ nɔ ɔ, a naa bua jɔmi. Yawɛ mlaa a he tsɔ; e haa nɛ nɔ nuɔ níhi a sisi.
9 Yawɛ gbeye yemi ɔ hi; e ngɛ kɛ yaa neneene. Ke Yawɛ kojo ɔ, anɔkuale sɔuu; niinɛ, e yeɔ dami sane be tsuaa be.
10 A he ngɛ akɔnɔ pe sika tsu ngmingmiingmi; a ngɔɔ pe hwo, hwo nɛ je hwo gbaku mi pue si.
11 Ke i ye mlaa amɛ a nɔ ɔ, imi o tsɔlɔ ɔ, i naa nile, kɛ se nami kpahi babauu.
12 Mɛnɔ ma nyɛ maa na lɛ nitsɛ e tɔmihi? Yawɛ, tɔmihi nɛ i pee ngɛ laami mi ɔ, ngɔɔ kɛ pa mi!
13 Yawɛ, moo bu ye he, nɛ ma ko jé ye hɛ mi paa kɛ pee yayami; ko ha nɛ jamɛ a yayami ɔmɛ nɛ a ye ye nɔ. Ja jã loko ye he ma tsɔ kɛ pi si, nɛ i be ye he ngɔe kɛ wo yayami nguahi a mi.
14 Yawɛ, ye wesa he, kɛ ye kpɔlɔ! Ha nɛ ye nya mi munyu, kɛ ye tsui mi susumi nɛ sa o hɛ mi.