Mawu suɔmi
1 Ma je Yawɛ yi! Ma je e biɛ klɔuklɔu ɔ yi kɛ ye tsui tsuo.
2 Ma je Yawɛ yi! Ní kpakpahi nɛ e peeɔ ha mi ɔ, ye hɛ be nɔ jee gblegbleegble.
3 E kɛ ye he yayamihi tsuo paa mi, nɛ e tsaa ye he hiɔhi tsuo.
4 E heɔ ye yi wami, konɛ ye hɛ mi ko kpata. E jeɔ e suɔmi ɔ kpo kɛ tsɔɔ mi, nɛ e naa mi mɔbɔ daa.
5 E haa mi ní kpakpahi babauu, nɛ daa nɛ ɔ, i naa he wami he kaa kɔle.
6 Nihi tsuo nɛ a yeɔ mɛ amimi ɔ, Yawɛ yeɔ a sane kɛ haa mɛ.
7 E tsɔɔ Mose e blɔ ɔmɛ, nɛ Israel bi ɔmɛ hu na ní nguanguahi nɛ e pee ɔ.
8 ⓛ Yawɛ naa mɔbɔ; e mi mi hi. E muklii mi fu we mla, se e mɔbɔ nami ɔ mohu hiɛ babauu.
9 E hɛɛ we pɛ munyu kake mi kpamisa. Ke e mi mi fu ɔ, e kɛ we kulaa kɛkɛ e tsui he jɔ ekohu.
10 E gbla we wa tue bɔ nɛ sa wɔ; wa yayami ɔmɛ hu e wui wɔ a he hiɔ bɔ nɛ sa wɔ.
11 Se mohu ɔ, nihi nɛ yeɔ lɛ gbeye ɔ, e naa mɛ mɔbɔ babauu nɛ hi kalemi kaa bɔ nɛ hiɔwe kɛ zugba a kpɛti blɔ ɔ hí kalemi ɔ.
12 E jeɔ wa he yayami ɔmɛ kɛ yaa tsitsaa lokoo kaa bɔ nɛ beleku kɛ bonyoku a kpɛti blɔ ɔ kɛ ɔ.
13 Bɔ nɛ tsɛ mi mi sãã lɛ ngɛ e bimɛ a he ɔ, ja lɛ Yawɛ hu mi mi sãã lɛ ngɛ nihi nɛ yeɔ lɛ gbeye ɔ a he.
14 Ejakaa e le wa bɔ su; e le kaa zu kɛkɛ ji wɔ.
15 Nɔmlɔ adesa ngɛ kaa nga pɛ; e bɔɔ saminyayoo kaa nga nɔ mɔmɔ.
16 Ke kɔɔhiɔ fia kɛ be ngɛ lejɛ ɔ, kɛkɛ e hɛ mi kpata nɛ nɔ ko pa li lɛ hu.
17 Se Yawɛ suɔmi nɛ be nyagbe ɔ ngɛ kɛ ha nihi nɛ yeɔ lɛ gbeye. A weku kɛ nina hu Yawɛ maa pee mɛ kpakpa daa,
18 kɛ jehanɛ hu nihi tsuo nɛ yeɔ e somi ɔ nɔ, kɛ ni nɛmɛ nɛ yeɔ e mlaa amɛ a nɔ sisiisi ɔ.
19 Yawɛ ngɔ e matsɛ sɛ ɔ kɛ ma si ngɛ hiɔwe, nɛ e ngɛ tsɛ yee ngɛ je ɔ tsuo nɔ.
20 Nyɛ, Yawɛ Mawu bɔfohi, nyɛ katsɛmɛ nɛ nyɛ buɔ lɛ, nɛ nyɛ yaa tsɔmi ha lɛ; nyɛ je Yawɛ yi!
21 Nyɛ, Yawɛ tabo ɔ tsuo, nyɛ, e sɔmɔli tsuo nɛ nyɛ peeɔ e suɔmi nya ní, nyɛ je Yawɛ yi!
22 Nyɛ, Yawɛ nibɔ níhi ngɛ hehi nɛ e ngɛ tsɛ yee ngɛ ɔ tsuo, nyɛ je Yawɛ yi! Imi nitsɛ hu ma je Yawɛ yi!