Introduction
Hiob
NYA TSƆƆMI Sane nɛ ngɛ womi nɛ ɔ mi ɔ tsɔɔ wɔ bɔ nɛ nyumu ko nɛ peeɔ nɔ́ nɛ da ngɛ Mawu hɛ mi na amanehlu babauu. Nyumu nɛ ɔ bimɛ tsuo ba gbo si kake too; e weto ní tsuo pɛpɛɛpɛ hɛ mi kpata, nɛ lɛ nitsɛ hu e ba nu hiɔ yaya ko. Nɔ nɛ ngma womi ɔ tsɔɔ bɔ nɛ Hiob kɛ e huɛmɛ etɛ komɛ sɛɛ Hiob haomi ɔ he ní si etɛ sɔuu. (A ngma ní sɛɛmi nɛ ɔ ngɛ asilɛ gbi mi). Ní sɛɛmi ɔ nyagbe ɔ, Mawu nitsɛ ba je e he kpo kɛ tsɔɔ Hiob. Hiob kɛ e huɛmɛ ɔmɛ a ní sɛɛmi ɔ mi oti pɔtɛɛ ji bɔ nɛ Mawu kɛ nɔmlɔ adesa si himi ngɛ. Hiob huɛmɛ ɔmɛ tsɔɔ kaa yayami nɛ Hiob pee, nɛ lɔ ɔ he nɔ́ lɛ e ngɛ nae ɔ nɛ. A ngɔ jami nɛ ngɛ jamɛ a be ɔ mi ɔ kɛ tsɔɔ nya kaa Mawu gblaa yayami peelɔ tue, se nɔmlɔ kpakpa lɛɛ e woɔ lɛ nguɔ. Hiob kplɛɛ we nɔ kaa yayami ko nɛ e pee ɔ he nɛ a ngɛ e tue gblae. E susu kaa e da kɛ pi si, nɛ sé ko be e he. E nui sisi kaa lɛ nɛ e peeɔ nɔ́ nɛ da a, Mawu maa ngmɛ blɔ nɛ tue gblami kaa kikɛ nɛ ɔ nɛ ba e nɔ. Nɔ́ nɛ ɔ ha Hiob kɛ hɛdɔ bi Mawu munyuhi babauu. Pi kaa Hiob hemi kɛ yemi ta, se pe e suɔ kaa a wo lɛ nguɔ ngɛ Mawu hɛ mi kaa nɔmlɔ nɛ peeɔ nɔ́ nɛ da, konɛ e kpale na e hɛ mi nyami ɔ ekohu. Munyuhi nɛ Hiob bi Mawu ɔ, Mawu ha we lɛ heto, se e buaa he ha lɛ. Nɔ́ nɛ Mawu pee ji kaa e je e he kpo tsɔɔ Hiob kaa lɛ Mawu ɔ, e he wami kle, nɛ e nile hu mi kuɔ. Hiob ba kpa si kaa niinɛ, Mawu kle, nɛ e nile hu mi kuɔ. E kɛ he si bami pia e he; e ye pɔpu kaa abofu ha nɛ e kɛ Mawu tu munyu basabasa. Nyagbe ɔ, womi nɛ ɔ deɔ wɔ ke Hiob kpale na e he ekohu; a gbaa lɛ kɛ níhi babauu pe kekle ɔ po. Mawu ka Hiob huɛmɛ ɔmɛ a hɛ mi wawɛɛ nitsɛ kaa a nyɛ we nɛ a nu Hiob we amanehlu ɔ sisi. Hiob pɛ lɛ nu sisi saminya kaa Mawu kle pe bɔ nɛ jami nɛ ngɛ jamɛ a be ɔ mi ɔ tsɔɔ ɔ. Bɔ nɛ a dla womi ɔ mi ha • Sisije munyuhi 1.1—2.13
• Hiob kɛ e huɛmɛ ɔmɛ 3.1—31.40
a. Hiob po Mawu nya 3.1-26
b. Kekleekle ní sɛɛmi 4.1—14.22
d. Ní sɛɛmi enyɔne 15.1—21.34
e. Ní sɛɛmi etɛne 22.1—27.23
ɛ. Nile yi jemi la 28.1-28
f. Hiob nyagbe munyuhi 29.1—31.40
• Elihu tu munyu 32.1—37.24
• Nyɔmtsɛ ɔ ha Hiob heto 38.1—42.6
• Nyagbe munyuhi 42.7-17
• Hiob kɛ e huɛmɛ ɔmɛ 3.1—31.40
a. Hiob po Mawu nya 3.1-26
b. Kekleekle ní sɛɛmi 4.1—14.22
d. Ní sɛɛmi enyɔne 15.1—21.34
e. Ní sɛɛmi etɛne 22.1—27.23
ɛ. Nile yi jemi la 28.1-28
f. Hiob nyagbe munyuhi 29.1—31.40
• Elihu tu munyu 32.1—37.24
• Nyɔmtsɛ ɔ ha Hiob heto 38.1—42.6
• Nyagbe munyuhi 42.7-17