Bildad
1 O maa hi munyu nɛ ɔmɛ tue kɛ yaa si mɛni be? Munyu nɛ ngɛ kpo jee ngɛ o nya mi kaa kɔɔhiɔ nɛ ngɛ fiae vuguvugu nɛ ɔ, mɛni be o ma kpa tumi?
2
3 Anɛ Mawu plɛɔ sane hɛ mi ngɔ buɔ si lo? Mawu Ope ɔ, anɛ e tsakeɔ nɔ́ nɛ da kɛ peeɔ nɔ́ nɛ dɛ lo?
4 O bimɛ ɔmɛ pee yayami kɛ si Mawu, nɛ lɔ ɔ he nɛ e gbla a tue bɔ nɛ sa mɛ ɔ nɛ.
5 Lɛɛ mo nitsɛ mo hla Mawu Ope ɔ se blɔ nɛ o fa kue ha lɛ.
6 Ke o he tsɔ, nɛ o peeɔ nɔ́ nɛ da a, Mawu ma tsɔ e hɛ mi ha mo, nɛ e ma ha mo sihi he kpakpa.
7 Hwɔɔ se ɔ, Mawu ma ha mo ní babauu nɛ maa hiɛ kulaa pe kekle nɔ́ ɔ.
8 Lɔ ɔ he ɔ, i kpa mo pɛɛ, hla blema nile se blɔ, nɛ o hyɛ anɔkuale nɛ wa nɛmɛ ɔmɛ kase ɔ.
9 Wa wami be ɔ ngɛ kpiti; wa li nɔ́ ko nɔ́ ko; wa ngɛ kaa nini kɛkɛ nɛ bee ngɛ je ɔ mi.
10 Nyɛ ha nɛ blema ní leli nɛ tsɔɔ nyɛ ní; nyɛɛ bu a nya mi munyu ɔmɛ tue:
11 “Anɛ ngɔwu puɛɔ ngɛ he nɛ mɔsɔ be lo? Anɛ ke ngɔwu nɛ nyu ɔ, e ma nyɛ maa wa lo?
12 Ke nyu ta a he pɛ mɛ ji kekleekle tsohi nɛ a gboɔ. Jamɛ a be ɔ, a wɛ lolo nɛ a maa po mɛ kɛ pee nɔ́ ko.
13 Nimlihi nɛ a hɛ je Mawu nɔ ɔ, a ngɛ kaa ngɔwu nɛ ɔmɛ pɛ. Ke o li Mawu ɔ, o be hɛ nɔ kami ko.
14 Nimli nɛ li Mawu ɔ, a hemi kɛ yemi ngɛ kaa anani ya; a yi mi tomi ɔmɛ tsuo maa laa.
15 A maa ngɔ a hɛ kɛ fɔ weku kɛ nina nɔ, se e be hie ha mɛ. A maa ngɔ a he kɛ mɛtɛ mɛ kpɛii, se nɔ́ kpakpa ko be mi jee.”
16 Nimli yayamihi bɔɔ kaa nga ngɛ pu nɔ; a bɔɔ kaa nga nɛ ha ngmɔ nɔ.
17 A sipoku ɔmɛ ngɔɔ a he ya blaa tɛ sahi, nɛ a mɛtɛɛ tɛ sa amɛ a he.
18 Se ke a hɛ mi kpata kikɛ nɛ ɔ, nɔ ko nɔ ko be lee kaa a hi lejɛ ɔ hyɛ po.
19 Niinɛ, bua jɔmi tsuo nɛ nimli yayamihi naa ji nɛ ɔ nɛ; kɛkɛ ɔ, ni kpahi baa ba ngɔɔ a blɔ he ɔmɛ.
20 Nɔ nɛ peeɔ nɔ́ nɛ da a, Mawu be lɛ kuae. Mawu be nimli yayamihi a he piɛe kɔkɔɔkɔ.
21 Mawu ma ha nɛ o maa muɔ, nɛ o ma hwɔ lele ekohu.
22 Ni nɛmɛ nɛ nyɛɛ mo ɔ, zo maa gbe mɛ; yiwutsotsɛmɛ ɔmɛ a wehi maa laa.