1 Jehanɛ Hiob, i kpa mo pɛɛ nɛ o bu nɔ́ nɛ ma de mo ɔ tue saminya.
2 I pee klaalo nɛ i kɛ mo maa tu munyu, nɛ nɔ́ nɛ ngɛ ye nya mi ɔ, ma de mo.
3 Anɔkuale ɔ nɛ i le ɔ, lɔ ɔ ma de mo kɛ je ye tsui mi faa.
4 Mawu mumi ɔ lɛ pee mi; Ope ɔ mumi ɔ lɛ ha mi wami.
5 Ke o ma nyɛ ɔ, ha mi heto. Moo pee klaalo kɛ o munyu ɔmɛ, konɛ o kɛ mi nɛ kpe.
6 Bɔ nɛ o ngɛ ɔ, ja nɔuu imi hu i ngɛ ngɛ Mawu hɛ mi. Imi hu tabo zu ɔ kɛ̃ lɛ a kɛ puɛ mi.
7 Lɔ ɔ he ɔ, koo ye mi gbeye; pi nɔmlɔ nɛ ke e daa si ngɛ o hɛ mi nɛ o tsui maa po ji mi.
8 Munyu nɛ o tu nɛ i nu kɛ ye tue ji,
9 “Ye he tsɔ; i pee we nɔ́ ko nɛ dɛ blɔ. I yeɔ nguɔ; yayami ko be ye he.
10 Se kɛ̃, Mawu bu mi kaa e he nyɛlɔ, nɛ e ngɛ tɔmihi hlae ngɛ ye he.
11 ⓡ E bɔ ye nane pã, nɛ e hɛ ngɛ ye he be tsuaa be.”
12 Hyɛ, nɔ́ nɛ i ngɛ mo dee ji o nɔ́ be mi; Mawu kle pe nɔmlɔ adesa.
13 Mɛni he je mɔ lɛ o kɛ lɛ ngɛ pɛe kaa e bui níhi nɛ e ngɛ pee ɔ ekoeko he akɔtaa kɛ tsɔɔ we nɔ ko?
14 Mawu ngɛ munyu tue daa be tsuaa be, se nɔmlɔ adesa bui nɔ́ nɛ e ngɛ dee ɔ tue.
15 ⓢ Nyɔ mi benɛ nimli adesahi hwɔ mahe vii ngɛ sa nɔ ɔ, Mawu kɛ mɛ tuɔ munyu kɛ guu nlamihi, kɛ ninahi a mi.
16 Jamɛ a be ɔ, e bliɔ nimli adesahi a tue, konɛ a nu nɔ́ nɛ e ngɛ mɛ dee ɔ. Ke e bɔ mɛ kɔkɔ ɔ, a yeɔ gbeye.
17 Mawu kɛ nimli adesahi tuɔ munyu bɔ nɛ pee nɛ a kpa yayami peemi, nɛ a ko wo a he nɔ.
18 E hla we kaa a hɛ mi nɛ kpata; e heɔ a yi wami kɛ jeɔ gbenɔ mi tete.
19 Nɔmlɔ kaseɔ ní ngɛ hiɔ sa nɔ, be mi nɛ e wuhi a mi ngɛ lɛ kpee nɛ he jɔmi be mi.
20 Ke e ba lɛ ja kɛkɛ e nya mi gbo, nɛ e pee we lɛ kaa e ye nɔ́ ko hu; niye ní ngɔngɔɛ tete po jlo we lɛ.
21 E tãã he lo kanyakanya nɛ hi hyɛmi; nɛ e wuhi nɛ a nɛ be ko nɛ be ɔ jeɔ kpo.
22 Lɔ ɔ ji e miɔ nɛ e ma gbo ɔ nɛ.
23 Alini, Mawu bɔfo akpe ɔmɛ nɛ tsɔɔ nimli adesahi nɔ́ nɛ da a, a ti nɔ kake ma ba je lɛ.
24 Mawu bɔfo ɔ maa na lɛ mɔbɔ. E ma de ke, “Nyɛɛ ngmɛɛ e he; e be gbeje yae! Nɔ́ nɛ a kɛ ma kpɔ lɛ konɛ e ye e he ji nɛ ɔ nɛ.”
25 E ma tsake maa pee niheyo ekohu, nɛ e he womi maa pee tlotlootlo kaa jokuɛyo he womi.
26 Ke e fa kue ha Mawu ɔ, Mawu ma he nɔ. E ma sɔmɔ Mawu kɛ bua jɔmi, nɛ Mawu ma ha nɛ níhi a mi maa hi ha lɛ ekohu.
27 E kɛ bua jɔmi ma de ngɛ ma hɛ mi ke, “I pee yayami. I pee we nɔ́ nɛ da blɔ, se kɛ̃ ɔ, Mawu na mi mɔbɔ.
28 Mawu kplɛɛ we nɛ ma ya gbeje, nɛ i ngɛ je mi kɛ mwɔɔ.”
29 Nɔ́ nɛ Mawu peeɔ ha nɔmlɔ si abɔ ji nɛ ɔ nɛ:
30 e heɔ nɔmlɔ yi wami, nɛ e haa lɛ bua jɔmi ngɛ je mi.
31 Hiob, jehanɛ bu nɔ́ nɛ i ngɛ mo dee ɔ tue; pee dii konɛ ma tu munyu.
32 Ke o ngɛ nɔ́ ko nɛ o ma de ɔ, de nɛ ma nu; ma suɔ kaa ma wo mo nguɔ.
33 Se ke o be nɔ́ ko nɛ o ma de ɔ, lɛɛ pee dii, nɛ o bu mi tue, nɛ ma tsɔɔ mo nile.