Hiob
1 Balɔ kpakpa! Mo lɛ o piɛ ye he. Imi nɛ i gbɔjɔ! Imi nɛ ye he wami ta!
2
3 Imi kuasia nɛ i li nɔ́ ko nɔ́ ko ɔ, o wo mi ga, nɛ o tu nile munyu kpakpahi kɛ tsɔɔ mi!
4 Mɛnɔ lɛ piɛ o he nɛ o kɛ tu munyu nɛ ɔmɛ? Mɛnɔ mumi lɛ je o mi ɔ?
Bildad
5 Kpade ɔmɛ a he mi ngɛ mɛ hiae ngɛ zu mi ngɛ nyu ɔ sisi.
6 Gbeje fɔɔ si paa ngɛ Mawu hɛ mi. He hami nɔ́ be he nɛ maa tsi lɛ blɔ.
7 Mawu gbla omleyi je hiɔwe ɔ mi, nɛ e ngɔ je ɔ ngɔ kpla si nɛ nɔ́ ko hɛɛ we lɛ.
8 Mawu lɛ e kɛ nyu woɔ bɔku kpii ɔmɛ a mi; lɛ nɛ e fii bɔku ɔmɛ a nya, nɛ e ha we nɛ a pɛ́.
9 Mawu lɛ e ngɔɔ nyɔhiɔ kɛ laa ngɛ bɔku ɔmɛ a se.
10 E po huzu ngɛ wo hɛ mi kɛ gba piani kɛ nyɔ a kpɛti.
11 Ke e kuɛ́ ɔ, titimahi nɛ hɛɛ hiɔwe ɔ hosoɔ, nɛ a he wami taa.
12 E kɛ e he wami jɔɔ wo ɔ he, nɛ e kɛ juɛmi kpata wo mi lohwe ɔ nɛ a tsɛɛ Rahab[2] ɔ hɛ mi.
13 E mumi ɔ lɛ ha nɛ hiɔwe tsɔ, nɛ e pee saminyayoo. E nine lɛ e kɛ tsɔtslɔɔ wo mi lohwe ngua a mi.
14 Mawu blɔ ɔmɛ a he níhi bɔɔ kɛkɛ nɛ́ wa nu kɛ wa tue ji nɛ ɔmɛ nɛ. E he wami kpetekpleenyɛ nitsɛnitsɛ ɔ lɛɛ mɛnɔ ma nyɛ maa le?