Hiob
1 I nu munyuhi babauu kaa kikɛ nɛ ɔ hyɛ; ye bua nɛ nyɛ ke nyɛ ma womi ɔ, haomi mohu lɛ nyɛ ba ngɛ mi haoe.
2
3 Nyɛ maa hi yaka munyu nɛ ɔmɛ tue nɛ nyɛ be kpae lo? Mɛni hiɔ lɛ nyɛ ngɛ nue nɛ nyɛ maa hi munyu tue kpamisa kikɛ nɛ ɔ?
4 Níhi nɛ nyɛ ngɛ dee nɛ ɔ, imi hu i ko de ja nɔuu. I ko mimiɛ ye yi, nɛ ma ha nyɛ munyu nguahi.
5 Jinɛ ma wo nyɛ ga, nɛ ma tu munyu kɛ wo nyɛ bua.
6 Se amlɔ nɛ ɔ, i tu munyu jio, i ma ye nya jio, haomi kake too ɔ mi lɛ i ngɛ kpamisa.
7 Mawu, jehanɛ lɛɛ o ha nɛ pɔ tɔ mi; o gbe ye he nihi tsuo ta.
8 O ha nɛ ye he womi tsuo hlũɛ, nɛ i ta he lo, nɛ enɛ ɔmɛ yeɔ odase kɛ siɔ mi.
9 Mawu mi mi fu mi, nɛ e tsɔtslɔɔ ye mi. E kpɔ lungu ngɔ wo mi, nɛ e muɔ e hɛngmɛ ngɔ pue ye nɔ kaa a peeɔ nɔ he nyɛlɔ.
10 Nihi yeɔ ye he fɛu. A buaa kɛ woɔ ye he, nɛ a gbaa ye tue mi ma. Nɛ a bɔɔ mi ahlua.
11 Mawu ngɔ mi ngɔ ha nihi nɛ li Mawu; e ngɔ mi ngɔ wo yiwutsotsɛmɛ a dɛ mi.
12 Jinɛ i ngɛ he mi jɔmi, se Mawu tsɔtslɔɔ ye mi. Mawu nu ye kuɛ, nɛ e ku mi dukuduku. E je hɛ pi mi kaa nɔ́ ko nɛ e kɛ maa kase dɛ nya dami.
13 E tsɛ̃ɔ mi kɛ̃ɛ̃ kɛ jeɔ he tsuaa he. Kɛ̃ɛ̃ mi bi ɔmɛ sɛɛ ye he womi mi, nɛ a plaa mi; se Mawu nɛ mi mɔbɔ.
14 E he sɔɔ kɛ ba tuaa mi nɔtonɔto, nɛ e plaa mi kaa tatsɛ nɛ hɛ dɔ.
15 I kpɛ kpekpe ngɔ ha ye he, nɛ i hii si ngɛ zugba kɛ ngɛ kɔmɔ yee.
16 I fo ya hluu kɛ ya si ye hɛngmɛ ɔmɛ fuu nɛ a pee kɔu kaa nɔ́ nɛ nɔ́ ko ha a nɔ.
17 Se i yi nɔ ko amimi; i faa kue haa Mawu kɛ jeɔ ye tsui mi.
18 Zugba, yayamihi nɛ a pee mi ɔ, koo ha a nɔ! Ngmlaa nɛ i ngɛ kpae kaa a ye dami sane ha mi ɔ, ko ha nɛ ngmlaa a nya nɛ ba si!
19 ⓝ Amlɔ nɛ ɔ tete po, ye we odase ngɛ hiɔwe; nɔ nɛ ma fa ye he ɔ ngɛ hiɔwe lokoo.
20 Ye huɛmɛ ɔmɛ yeɔ ye he fɛu, se i faa kue haa Mawu kɛ vo nyu.
21 I na nɛ nɔ ko ma fa ye he ngɛ Mawu hɛ mi kaa bɔ nɛ nɔmlɔ adesa faa e nyɛmi he ɔ.
22 Jehahi bɔɔ komɛ a se ɔ, ma hia blɔ kɛ ya he ko nɛ i be kpalee kɛ ba hu.