Hiob
1 Niinɛ, nyɛ ji ma a nɛ. Ke nyɛ gbo kɛkɛ nile hu gbo.
2
3 Se imi hu i ngɛ juɛmi kaa nyɛ nɔuu; nyɛ pi mi kɛ nɔ́ ko nɔ́ ko; níhi nɛ nyɛ ngɛ dee nɛ ɔ, mɛnɔ lɛ li?
4 I plɛ pee muɔ nɔ́ kɛ ha ye huɛmɛ; a ngɛ mi muɔe, pohu dalɔ ji mi; tɔmi be ye he. Be ko nɛ be ɔ, ke i fa kue ha Mawu ɔ, e buɔ mi tue.
5 Nyɛ ngɛ ye he fɛu yee, ejakaa nyɛɛ lɛɛ haomi ko be nyɛ nɔ. Nɔmlɔ nɛ miɔ nɛ maa nɔ si ɔ, nyɛ ngɛ lɛ nɔ́ fiae.
6 Ojo fiali, kɛ nihi nɛ woɔ Mawu mi mi la a, a ngɛ tue mi jɔmi si himi mi; mɛ po nɛ a he wami ji a mawu ɔ.
7 Nyɛɛ ya lohwe nane eywiɛɛywiɛtsɛmɛ a ngɔ; nyɛɛ ya lohwe pɛlitsɛmɛ a ngɔ, nɛ a maa tsɔɔ nyɛ ní.
8 Adebɔ níhi nɛ ngɛ wo mi kɛ zugba a nɔ ɔ, nyɛɛ ya nɛ nyɛ ya bi mɛ nile.
9 Mɛ tsuo pɛpɛɛpɛ a ti mɛnɔ lɛ li kaa Mawu lɛ pee enɛ ɔ lo?
10 Níhi nɛ ngɛ hɛ ngmengmle tsuo, Mawu lɛ ha mɛ wami; nimli adesahi tsuo a wami ngɛ Mawu dɛ mi.
11 Se kaa bɔ nɛ tue hyɛɛ munyu mi, nɛ lilɛ hu saa niye ní nya hyɛɛ ɔ,
12 nimeli ngɛ nile; nihi nɛ a wami se kɛ ɔ, a ngɛ juɛmi.
13 Se Mawu lɛɛ e nɔ́ ji nile, kɛ he wami; e ngɛ juɛmi, kɛ nɔ́ sisi numi.
14 Ke Mawu ku nɔ́ ko kɛ pue si ɔ, mɛnɔ ma nyɛ maa ma ekohu? Ke e nga nɔ ko yi kɛ wo tsu mi ɔ, mɛnɔ ma nyɛ ma bli lɛ?
15 Ke Mawu tsi hiɔmi nya, kɛkɛ zugba gbli; ke e bli nyu nya, kɛkɛ pa hia lalaala ngɛ zugba a nɔ.
16 Mawu he wa, nɛ e le ní; nɔ sisilɔ, kɛ nɔ nɛ a sisi lɛ tsuo e níhi ji mɛ.
17 E kpɔɔ nile ngɛ ga woli a dɛ, nɛ e haa kojoli plɛɔ peeɔ kuasiahi.
18 E kpaa matsɛmɛ, nɛ e haa nɛ a plɛɔ peeɔ pamitsɛmɛ.
19 E baa osɔfohi si, nɛ e butuu ni nɛmɛ nɛ he wami ngɛ a dɛ.
20 Nihi nɛ a buu ɔ, e kpɔɔ munyu tumi he wami ngɛ a dɛ; nimeli hu e kpɔɔ a nile ɔ ngɛ a dɛ.
21 E pueɔ ganɔhi a hɛ mi si, nɛ e haa a he wami ɔ se poɔ.
22 E jeɔ nyakpɛ níhi kpo kɛ jeɔ laami hehi, nɛ e haa la tsoɔ ngɛ hehi nɛ wo diblii kpii.
23 E haa je mahi he wami, nɛ e kpaleɔ kpataa a hɛ mi. E haa nɛ mahi bɔɔ, nɛ e kpaleɔ gbɛɛ mɛ ngɔ fĩaa.
24 E haa je ma amɛ a hɛ mi nyɛɛli jeɔ kuasia, nɛ a ya woɔ lalaalo ngɛ nga nɔ he nɛ blɔ ko blɔ ko be.
25 A hii dedee, nɛ a hii si tataae ngɛ diblii mi kaa nihi nɛ tɔ dã.