Mose II, 5

Mose kɛ Aaron ngɛ Egipt matsɛ ɔ hɛ mi

1 Pee se ɔ, Mose kɛ Aaron ho Farao ɔ ngɔ ya, nɛ a ya de lɛ ke, “Bɔ nɛ Yawɛ, Israel Mawu ɔ de ji nɛ ɔ nɛ: ‘Ha ye ma a nɛ ho, nɛ a ya ye nyami ligbi nɛ a kɛ ja mi ngɛ nga a nɔ.’ ”

2 Se Farao ɔ bi mɛ ke, “Mɛnɔ ji jamɛ a Yawɛ ɔ? Mɛni he je nɛ e sa kaa ma bu e gbi tue nɛ ma ha Israel nɛ ho ɔ? I li Yawɛ nɛ ɔ, nɛ pohu i be hae nɛ a ya.”

3 A ha lɛ heto ke, “Hebri bi ɔmɛ a Mawu ɔ ba je e he kpo ngɔ tsɔɔ wɔ. Lɔ ɔ he ɔ, wa kpa mo pɛɛ, mo ha nɛ waa nyɛɛ ligbi etɛ blɔ kɛ ya nga a nɔ nɛ wa ya sã bɔ ha Yawɛ, wa Mawu ɔ. Ke wa pee we ja a, e kɛ gbenɔ hiɔ maa gbe wɔ, loo e ma ha nɛ a gbe wɔ ngɛ ta mi.”

4 Se Egipt matsɛ ɔ de ke, “Mo Mose, kɛ mo Aaron, mɛni he je nɛ nyɛ ngɛ ma a jee kɛ ngɛ a ní tsumi he jee ɔ? Nyɛɛ kpale nyɛ se kɛ ho nyɛ ní tsumi ɔmɛ a he ya esɔ!”

5 Farao ɔ ya nɔ nɛ e de mɛ ke, “Nyɛɛ hyɛ, nyɛ bi ɔmɛ a he hiɛ babauu ngɛ zugba a nɔ pe zugbatsɛmɛ ɔmɛ, nɛ nyɛ ma ha a kpa ní tsumi!”

6 Jamɛ a ligbi ɔ nɔuu ɔ, Farao ɔ fa nyɔguɛhi a nɔ yeli ɔmɛ, kɛ Israel bi nɛ hyɛɛ ní tsumi ɔmɛ a nɔ ɔ ke,

7 “Nyɛ ko ha ni ɔmɛ nga nɛ a kɛ pee bliikisi ɔ hu kaa sa a; nyɛ ha nɛ mɛ nitsɛmɛ a ya nɛ a ya fa nga a.

8 Se nyɛ ha nɛ a po bliikisi ɔ nɛ hiɛ kaa sa a nɔuu; nyɛ ko je nɔ, ejakaa a ngɛ hejɔ pee. A ngɛ huhui kpae ke, ‘Nyɛ ha waa ho nɛ wa ya sã bɔ ha wa Mawu ɔ,’ ejakaa hejɔtsɛmɛ ji mɛ.

9 Nyɛ ko ha mɛ deka; nyɛ pue ní tsumi ɔ nɔ ha mɛ nɛ a tsu, konɛ a ko ya hi lakpa munyuhi tue bue hu.”

10 Lɔ ɔ he ɔ, nyɔguɛhi a nɔ yeli ɔmɛ, kɛ ní tsuli ɔmɛ a nɔ hyɛli ɔmɛ ho nɛ a ya de ma a ke, “Farao ɔ ke e be nyɛ nga hae.

11 Nyɛ nitsɛmɛ nyɛɛ ya nɛ nyɛ ya fa nga ngɛ he saisaa nɛ nyɛ ma na nga ngɛ; se nyɛ ní tsumi ɔ lɛɛ e nɔ ko gbɔ.”

12 Lɔ ɔ he ɔ, ma a gbɛ fĩa Egipt zugba a tsuo nɔ nɛ a ya ngɛ go nya buae nɛ a kɛ pee nga kɛ ha bliikisi ɔ sami.

13 Nyɔguɛhi a nɔ yeli ɔmɛ nyɛ a nɔ ke a gbe a daa ligbi ní tsumi ɔmɛ a nya kaa bɔ nɛ a peeɔ be nɛ a haa mɛ nga a.

14 Ke pee ɔ, Farao ɔ nyɔguɛhi a nɔ yeli ɔmɛ fiaa Israel ní tsuli ɔmɛ a nɔ hyɛli ɔmɛ nɛ a to ɔ ní, nɛ a biɔ mɛ ke, “Kɛ pee kɛɛ nɛ nyɛ gbi bliikisi peemi ní tsumi ɔ nya kaa bɔ nɛ a to ha nyɛ ɔ?”

15 Kɛkɛ nɛ Israel ní tsuli a mɔ hyɛli ɔmɛ ba Farao ɔ ngɔ nɛ a ba fa kue ha lɛ, nɛ a bi lɛ ke, “Mɛni he je o kɛ wɔ o tsɔli ɔmɛ ngɛ sane yee kikɛ nɛ ɔ?

16 A ha we wɔ nga, se a ke waa po bliikisi bami kaa bɔ nɛ wa poo daa ligbi ɔ. Jehanɛ hu a dɔ kpa to wa nɔ be mi nɛ tɔmi ɔ ji wɔ; se e je o ma mi bi ɔmɛ mohu.”

17 Se matsɛ ɔ de mɛ ke, “Hejɔtsɛmɛ ji nyɛ! Hejɔtsɛmɛ! Enɛ ɔ he je nɛ nyɛ ke ma ha nɛ nyɛɛ ho nɛ nyɛ ya sã bɔ ha Yawɛ ɔ nɛ.

18 Esɔ nɛ nyɛɛ ho nɛ nyɛ ya tsu ní! A be nyɛ nga hae, se nyɛ maa po bliikisi abɔ nɛ nyɛ poo daa ligbi ɔ kɛ̃!”

19 Israel ní tsuli ɔmɛ a nɔ hyɛli ɔmɛ yɔse kaa sane yobu ye mɛ benɛ a de mɛ ke daa ligbi ɔ, a po bliikisi ɔ nɛ e hiɛ kaa kekle ɔ, nɛ a ko ha e nɔ nɛ gbɔ ɔ.

20 Benɛ a si Farao ɔ, a ba na Mose kɛ Aaron nɛ a ngɛ mɛ mlɛe.

21 Nɛ a de mɛ ke, “Yawɛ maa wo nyɛ hiɔ; ejakaa nyɛ ha wa he je fu wo Farao ɔ kɛ e tsɔli ɔmɛ, nɛ nyɛ ngɔ klaate ngɔ wo a dɛ mi nɛ a kɛ gbe wɔ.”

Mose ya ye kɔmɔ ngɛ Yawɛ hɛ mi

22 Kɛkɛ nɛ Mose kpale e se kɛ ho Yawɛ ngɔ ya ekohu, nɛ e ya bi lɛ ke, “Yawɛ, mɛni he je o pee o ma a yayami kikɛ nɛ ɔ? Mɛni he je o tsɔ mi kulaa?

23 Kɛ je be nɛ i ba Farao ɔ ngɔ nɛ i kɛ lɛ ba tu munyu ngɛ o biɛ mi ɔ kɛ ba si amlɔ nɛ ɔ, yi mi sɔuu nɛ e ngɛ ma a wae. Nɛ mo hu o pee we nɔ́ ko kulaa kaa o ma kpɔ o ma a.”