Mose II, 3

Mawu tsɛ Mose

1 Mose ngɛ e ngatsɛ Yetro, Midian osɔfo ɔ tohi hyɛe ngɛ nga a nɔ. Ligbi ko ɔ, e tsɔ̃ to ɔmɛ kɛ ya gu nga a nɔ, kɛ ya pã si ngɛ Mawu yo, Horeb ɔ he.

2 ⓛ Benɛ e ba lejɛ ɔ, Yawɛ bɔfo ko ba je e he kpo tsɔɔ lɛ kaa la lilɛ nɛ ngɛ tsoe ngɛ mio tso ko mi. Benɛ e ke e hyɛɛ ɔ, e na kaa mio tso ɔ ngɛ tsoe, se e sɛ̃.

3 Kɛkɛ nɛ Mose de ke, “Enɛ ɔ lɛɛ ma gba nɛ ma ya hyɛ nyakpɛ nɔ́ nɛ ɔ, nɔ he je nɛ mio tso ɔ sɛ̃ ɔ.”

4 Benɛ Yawɛ na kaa e gba kɛ ma hyɛmi ɔ, e tsɛ lɛ kɛ je mio tso ɔ mi ke, “Mose! Mose!” Nɛ Mose he nɔ ke, “Tsaatsɛ! Imi ji nɛ!”

5 Mawu de lɛ ke, “Koo hɛ mo kɛ su hiɛ ɔ! Je o tokota a, ejakaa zugba klɔuklɔu nɔ o daa si ngɛ ɔ nɛ!”

6 E ya nɔ nɛ e de lɛ ke, “Imi ji o nɛmɛ Abraham, Isak, kɛ Yakob a Mawu ɔ nɛ!” Mose ngɔ nɔ́ kɛ ha e hɛ mi, ejakaa e ngɛ gbeye yee kaa e maa na Mawu.

7 Kɛkɛ nɛ Yawɛ de ke, “Amanehlu nɛ ye ma a ngɛ nae ngɛ Egipt ɔ, i na; nɛ ya nɛ a ngɛ foe kɛ ngɛ balɔ tsɛe ɔ hu i nu. Niinɛ, i le a nɔ́ nami ɔ tsuo.

8 Lɔ ɔ he ɔ, i kple si kɛ ba, konɛ ma ba kpɔ mɛ kɛ je Egipt bi ɔmɛ a dɛ mi, nɛ ma je mɛ kɛ je zugba nɛ ɔ nɔ kɛ ya zugba kpakpa nɛ kle, nɛ baa ní nɔ. Kanaan bi, Hit bi, Amor bi, Periz bi, Hiv bi, kɛ Yebus bi a hi he ɔ i ngɛ tsɔɔe ɔ nɛ.

9 Niinɛ, i nu Israel bi ɔmɛ a ya fomi ɔ, nɛ i na bɔ nɛ Egipt bi ɔmɛ ngɛ mɛ yi mi wae ha.

10 Lɔ ɔ he ɔ, ha nɛ ma tsɔ mo Farao ɔ ngɔ nɛ o ya je ye ma, nɛ ji Israel bi ɔmɛ kɛ je Egipt.”

11 Se Mose bi Mawu ke, “Mɛnɔ ji mi, nɛ ma ya Farao ɔ ngɔ, nɛ ma ya je Israel bi ɔmɛ kɛ je Egipt ɔ?”

12 Mawu ha lɛ heto ke, “Ma piɛ o he. Ke o ya jé ma a kɛ je Egipt kɛ ba a, nyɛ ma ba ja mi ngɛ yo nɛ ɔ nɔ. Jamɛ a be ɔ loko o maa le niinɛ kaa imi nɛ i tsɔ mo.”

13 ⓜ Mose bi Mawu ke, “Ke i ya Israel bi ɔmɛ a ngɔ, nɛ i ya de mɛ ke, ‘Mawu ɔ nɛ nyɛ nɛmɛ ja lɛ ɔ tsɔ mi nyɛ ngɔ,’ nɛ a bi mi ke, ‘Kɛ a tsɛɛ lɛ kɛɛ?’ ɔ, kɛ ma de mɛ kɛɛ?”

14 ⓝ Mawu de Mose ke, “IMI JI NƆ NƐ I JI.” E ya nɔ nɛ e de lɛ ke, “Bɔ nɛ o ma de Israel bi ɔmɛ ji, ‘Nɔ nɛ a tsɛɛ lɛ IMI JI ɔ tsɔ mi nyɛ ngɔ.’ ”

15 Mawu de Mose ekohu ke, “Mo de Israel bi ɔmɛ ke, Yawɛ, nyɛ nɛmɛ Abraham, Isak, kɛ Yakob a Mawu ɔ, lɛ nɛ e tsɔ mi nyɛ ngɔ. Biɛ nɛ ɔ ji ye biɛ kɛ yaa neneene, nɛ yi nɔhi nɛ maa ba a, mɛ hu a ma tsɛ mi jã.

16 Yaa nɛ o ya bua Israel ma nimeli ɔmɛ a nya, nɛ o de mɛ ke, Yawɛ, Mawu ɔ nɛ nyɛ nɛmɛ Abraham, Isak, kɛ Yakob ja lɛ ɔ je e he kpo tsɔɔ mi, nɛ e de mi ke, ‘I na nɔ́ nɛ a ngɛ nyɛ pee ngɛ Egipt ɔ,

17 nɛ i ngɛ si woe kaa ma je nyɛ kɛ je Egipt nɔ́ nami ɔ mi, kɛ ya zugba nɛ kle, nɛ baa ní nɔ. Kanaan bi, Hit bi, Amor bi, Periz bi, Hiv bi, kɛ Yebus bi a hi he ɔ i ngɛ tsɔɔe ɔ nɛ.’

18 “A maa bu o gbi tue; nɛ o kɛ Israel ma nimeli ɔmɛ maa ya Egipt matsɛ ɔ ngɔ, nɛ nyɛ ma ya de lɛ ke, ‘Yawɛ, Hebri bi ɔmɛ a Mawu ɔ kɛ wɔ ba kpe; lɔ ɔ he ɔ, wa kpa mo pɛɛ, ha wɔ blɔ nɛ waa nyɛɛ ligbi etɛ blɔ kɛ ya nga a nɔ nɛ wa ya sã bɔ ha Yawɛ, wa Mawu ɔ ngɛ lejɛ ɔ.’

19 I le kaa ke nyɛ doo Egipt matsɛ ɔ nya wawɛɛ tete po, e be nyɛ he ngmɛɛe.

20 Lɔ ɔ he ɔ, ma ngɔ ye nyakpɛ níhi tsuo nɛ ma pee ngɛ a kpɛti ɔ kɛ fia mɛ ní kɛ tsɔɔ mɛ ye nine si wami. Enɛ ɔ se ɔ, e maa ngmɛɛ nyɛ he.

21 ⓞ “Ma ha nɛ Egipt bi ɔmɛ maa na ye ma nɛ ɔ mɔbɔ; nɛ ke e su be nɛ nyɛ maa je ɔ, nyɛ be jee kɛ nyɛ dɛ gu.

22 Se mohu Hebri yo tsuaa Hebri yo ma ya ba june ní, sika tsu, sika hiɔ, kɛ bo ngɛ e nɔle nɔ nɛ ji Egipt no, loo e we mi yo nɛ ji Egipt no ngɔ, nɛ nyɛ maa ngɔ kɛ dla nyɛ binyumuhi, kɛ nyɛ biyihi a he ha mɛ. Blɔ nɔ nɛ nyɛ maa gu kɛ kpakpaa Egipt bi ɔmɛ a he níhi kɛ je ji nɛ ɔ nɛ.”