Mose II, 29

Aaron kɛ e binyumu ɔmɛ a we osɔfo womi

(<x>30 8:1-36</x>)

1 “Enɛ ɔ ji nɔ nɛ ó pee nɛ o kɛ tsukɔ Aaron kɛ e binyumu ɔmɛ a he nɛ a sɔmɔ mi kaa ye we osɔfohi. Ngɔɔ na niheyo kake, kɛ agbosu enyɔ nɛ kpa be a he.

2 Ngɔɔ ngma mamu nɛ masa be mi kɛ pee nɔ́ etɛ nɛ ɔmɛ: abolo kplolo nɛ zɔ ngɛ mi, abolo kplolo nɛ a wui mi zɔ, kɛ akpɔɔnɔɔ nɛ a kɛ nu kpa hɛ mi,

3 nɛ o ngɔ mɛ kɛ wo kusii mi nɛ o hɛɛ kɛ ba, kɛ na a, kɛ agbosu enyɔ ɔmɛ.

4 “Ngɔɔ Aaron kɛ e binyumu ɔmɛ kɛ ba kpe he bo tsu ɔ sinya a nya, nɛ o ngɔ nyu kɛ du a he ha mɛ.

5 Lɔ ɔ se ɔ, wo tade ɔmɛ ha Aaron; hiɔwe tade ɔ, tade klɔii ɔ nɛ ngɛ efɔd ɔ nɔ ɔ, efɔd ɔ nitsɛ, kɛ gugue tade ɔmɛ, konɛ o ngɔ efɔd ɔ mlɛ mi fimi nɔ́ ɔ nɛ a je blɔ lo lɛ saminyayoo ɔ kɛ fi e mlɛ mi.

6 Jehanɛ ɔ, bu lɛ pɛɛ ɔ, nɛ o fi jlasi klɔuklɔu kɛ wo pɛɛ ɔ he.

7 Lɔ ɔ se ɔ, plɛ nu nɛ a kɛ pɔɔ nɔ ɔ kɛ pue e yi mi, nɛ o kɛ pɔ lɛ nu.

8 “Enɛ ɔ se ɔ, ngɔɔ e binyumu ɔmɛ kɛ ba nɛ o ba wo mɛ hiɔwe tadehi.

9 Fi mlɛ mi fimi níhi kɛ wo a mlɛ mi, nɛ o bu mɛ pɛɛ. Bɔ nɛ o maa wo Aaron kɛ e binyumu ɔmɛ osɔfo ji nɛ ɔ nɛ. Kɛkɛ ɔ, osɔfo ní tsumi ɔ maa pee a nɔ́; nɛ enɛ ɔ maa pee mlaa nɛ fɔɔ si kɛ yaa neneene.

Osɔfo womi bɔ samihi

10 “Ngɔɔ na ku ɔ kɛ ba kpe he bo tsu ɔ hɛ mi, konɛ Aaron kɛ e binyumu ɔmɛ nɛ a ngɔ a nine kɛ pue e yi mi.

11 Lɔ ɔ se ɔ, moo gbe na ku ɔ ngɛ imi Yawɛ, ye hɛ mi, ngɛ kpe he bo tsu ɔ sinya a nya.

12 Ngɔɔ na muɔ ɔ eko nɛ o ngɔ o nine nguɛ kɛ sɔ mi nɛ o kɛ kpa bɔ sami la tɛ ɔ koli ɔmɛ a he. Lɔ ɔ se ɔ, mo plɛ muɔ ɔ nɛ piɛ ɔ tsuo kɛ pue bɔ sami la tɛ ɔ sisi.

13 Jehanɛ, mo je zɔ nɛ ha mi ní ɔmɛ a he ɔ, ko ɔ, se tso mi ngmɛ enyɔ ɔmɛ, kɛ zɔ nɛ bɔle mɛ ɔ; nɛ o sã enɛ ɔmɛ tsuo ngɛ bɔ sami la tɛ ɔ nɔ.

14 Se na lo ɔ, e he womi ɔ, kɛ e mi ní ɔmɛ lɛɛ o sã ngɛ sito he ɔ se; ejakaa bɔ nɛ a sãã kɛ jeɔ osɔfo ɔmɛ a he yayami ji lɔ ɔ nɛ.

15 “Jehanɛ, yaa nu agbosu ɔ kake, nɛ Aaron kɛ e binyumu ɔmɛ nɛ a ngɔ a nine kɛ pue e yi mi.

16 Lɔ ɔ se ɔ, moo gbe to ɔ, nɛ o tsɛ̃ e muɔ ɔ kɛ pue bɔ sami la tɛ ɔ kɔ nya eywiɛ ɔmɛ tsuo.

17 Moo po to ɔ mi kpɔ nya kpɔ nya, nɛ o fɔ e mi ní ɔmɛ, kɛ e se nane ɔmɛ a he, nɛ o kɛ pue e yi ɔ, kɛ lo kpɔ nya kpɔ nya amɛ a nɔ.

18 ⓧ Lɔ ɔ se ɔ, moo sã to ɔ tsuo ngɛ bɔ sami la tɛ ɔ nɔ. E ji sami bɔ nɛ jee via saminya, nɛ sa imi Yawɛ, ye hɛ mi.

19 “Jehanɛ, yaa nu agbosu kaketsɛ ɔ hulɔ, nɛ Aaron kɛ e binyumu ɔmɛ nɛ a ngɔ a nine kɛ pue e yi mi.

20 Lɔ ɔ se ɔ, moo gbe to ɔ, nɛ o ngɔ e muɔ ɔ eko kɛ kpa Aaron kɛ e binyumu ɔmɛ a hiɔ nɔ tue nya lo ɔmɛ, a hiɔ nine gɔleku ɔmɛ, kɛ a hiɔ nane gɔleku ɔmɛ a he. Muɔ nɛ piɛ ɔ lɛɛ mo kpa kɛ pue bɔ sami la tɛ ɔ kɔ nya eywiɛ ɔmɛ tsuo.

21 Ngɔɔ muɔ nɛ ngɛ bɔ sami la tɛ ɔ nɔ ɔ eko, kɛ nu nɛ a kɛ pɔɔ nɔ ɔ hu eko, nɛ o fĩa kɛ pue Aaron kɛ e binyumu ɔmɛ, kɛ a tade ɔmɛ a nɔ. Enɛ ɔ maa pee Aaron kɛ e binyumu ɔmɛ, kɛ a tade ɔmɛ tsuo klɔuklɔu ha mi.

22 “Akɛnɛ osɔfo womi bɔ sami to ji agbosu ɔ he je ɔ, mo je e he zɔ ɔ, e hlemi nɛ wo zɔ ɔ, kɛ zɔ nɛ ha e mi ní ɔmɛ a he ɔ, nɔ́ nɛ ha e ko ɔ he ɔ, se tso mi ngmɛ enyɔ ɔmɛ kɛ a he zɔ ɔ, kɛ e hiɔ fiɔ ɔ.

23 Yaa ngɔ abolo mamɛ kake nɛ a futu mi nu, abolo mamɛ kake nɛ a futuu we mi nu, kɛ akpɔɔnɔɔ kake ngɛ kusii ɔ nɛ a kɛ abolo klɛdɛɛ ɔ woɔ mi kɛ maa si ngɛ imi Yawɛ, ye hɛ mi daa a mi.

24 Ngɔɔ ní nɛ ɔmɛ tsuo ngɔ wo Aaron kɛ e binyumu ɔmɛ a dɛ, nɛ a fɔ ngɛ hiɔwe kɛ ya kɛ ba ngɛ ye hɛ mi kɛ tsɔɔ kaa a tsukɔ a he kɛ ha imi Yawɛ.

25 Lɔ ɔ se ɔ, hé ní ɔmɛ ngɛ a dɛ, nɛ o sã ngɛ bɔ sami la tɛ ɔ nɔ kɛ piɛ sami bɔ ɔ he. E ji sami bɔ nɛ jee via, nɛ sa imi Yawɛ, ye hɛ mi.

26 “Jehanɛ, agbosu ɔ nɛ a kɛ sã bɔ kɛ wo Aaron osɔfo ɔ, o je e gugue, nɛ o fɔ ngɛ hiɔwe kɛ ya kɛ ba ngɛ imi Yawɛ, ye hɛ mi kɛ tsɔɔ kaa a tsukɔ he kɛ ha mi. Lohwe ɔ gugue ɔ maa pee mo hu o blɔ nya nɔ́.

27 “Ke a wo nɔ ko osɔfo ɔ, agbosu nɛ a kɛ tsu ní ɔ, a tsukɔ e gugue ɔ, kɛ e fiɔ ɔ he kaa nike ní klɛdɛɛ ha mi, nɛ a kɛ ha osɔfo ɔmɛ kaa a blɔ nya ní.

28 Ní nɛ ɔmɛ maa pee Aaron kɛ e binyumu ɔmɛ a blɔ nya ní; ejakaa e ji mlaa nɛ fɔɔ si kɛ yaa neneene kaa ke Israel bi ɔmɛ ba sã bɔ ɔ, lohwe ɔ gugue, kɛ e fiɔ ɔ nɛ pee osɔfo ɔmɛ a nɔ́. Enɛ ɔ ji nike ní nɛ ma a kɛ ba ke Yawɛ.

29 “Ke Aaron gbo ɔ, a pɔ e binyumu ɔmɛ nu nɛ a wo mɛ osɔfo, nɛ a ngɔ e tade klɔuklɔu ɔmɛ ngɔ ha mɛ nɛ a wo.

30 Aaron binyumu nɛ maa ye osɔfo ngɛ e tsɛ se, nɔ nɛ maa sɛ kpe he bo tsu ɔ mi nɛ e ya sɔmɔ ngɛ he klɔuklɔu ɔ, e wo tade ɔmɛ ligbi kpaago.

31 “Osɔfo womi bɔ sami agbosu ɔ, moo hoo lo ɔ ngɛ he ko nɛ ngɛ klɔuklɔu.

32 Aaron kɛ e binyumu ɔmɛ nɛ a ye lo ɔ, kɛ niye ní ɔ nɛ ngɛ kusii ɔ mi ɔ ngɛ kpe he bo tsu ɔ sinya a nya a.

33 Mɛ pɛ lɛ á ye osɔfo womi kusumi kpatami ní nɛ ɔ; nɔ ko nɛ pi osɔfo ji lɛ ɔ, e ko ye eko, ejakaa e ji ní klɔuklɔu.

34 Ke osɔfo womi bɔ sami lo ɔ, aloo abolo ɔ eko piɛ nɛ je na yi ɔ, sãã; a ko ye ejakaa e ji nɔ́ klɔuklɔu.

35 “Aaron kɛ e binyumu ɔmɛ a osɔfo womi kusumi ɔ, moo pee lɛ ligbi kpaago kaa bɔ nɛ i fa mo ɔ pɛpɛɛpɛ.

36 Daa ligbi ɔ, o maa ngɔ na ku kake kɛ sã bɔ kɛ ha yayami pami. Enɛ ɔ maa tsukɔ bɔ sami la tɛ ɔ he, nɛ́ e pee klɔuklɔu.

37 Moo pee enɛ ɔ daa ligbi kɛ yaa su ligbi nɛ ji kpaago ɔ. Kɛkɛ ɔ, bɔ sami la tɛ ɔ maa pee klɔuklɔu, nɛ nɔ tsuaa nɔ, aloo nɔ́ tsuaa nɔ́ nɛ he maa sa he ɔ hɛ mi ma kpata.

Daa ligbi bɔ sami

(<x>40 28:1-8</x>)

38 “Jehanɛ ɔ, daa ligbi ɔ, o maa ngɔ jijɔ enyɔ nɛ ye jeha kakaaka kɛ sã bɔ ngɛ bɔ sami la tɛ ɔ nɔ.

39 Ngɔɔ jijɔ kake kɛ sã bɔ mɔtu, nɛ o kɛ kake hu nɛ sã bɔ gbɔkuɛ.

40 Ngɔɔ ngma mamu tsimi kake nɛ o kɛ nu nɛ a si tɔ kake futu mi ɔ kɛ piɛ kekleekle jijɔ ɔ he nɛ o kɛ sã bɔ ɔ, konɛ o ngɔ wai tɔ kake kɛ sã wai bɔ.

41 Gbɔkuɛ ɔ, ngɔɔ jijɔ enyɔne ɔ kɛ sã bɔ, konɛ o ngɔ mamu kɛ wai nɛ a kɛ maa sã wai bɔ ɔ hu kɛ piɛ he kaa mɔtu nɔ́ ɔ kɛ̃. E ji sami bɔ nɛ jee via saminya nɛ sa imi Yawɛ, ye hɛ mi.

42 Kikɛmɛ a sami bɔ nɛ ɔ nɛ pee bɔ ko nɛ nyɛɛ kɛ nyɛ nina maa sã daa ngɛ kpe he bo tsu ɔ sinya a nya, ngɛ imi Yawɛ, ye hɛ mi. Lejɛ ɔ i kɛ nyɛ maa kpe ngɛ, nɛ lejɛ ɔ i kɛ nyɛ maa tu munyu ngɛ.

43 Lejɛ ɔ ji he nɛ i kɛ Israel ma a maa kpe ngɛ, nɛ ye hɛ mi nyami kpɛmi maa pee lejɛ ɔ klɔuklɔu.

44 Ma tsukɔ kpe he bo tsu ɔ, kɛ bɔ sami la tɛ ɔ he. Aaron kɛ e binyumu ɔmɛ hu ma tsukɔ a he, konɛ a sɔmɔ mi kaa osɔfohi.

45 Ma hi Israel bi ɔmɛ a kpɛti, nɛ ma pee a Mawu.

46 A ma na maa le kaa imi ji Yawɛ, a Mawu ɔ, nɔ nɛ je mɛ kɛ je Egipt zugba a nɔ ɔ, konɛ ma hi a kpɛti. Imi ji Yawɛ, a Mawu ɔ nɛ.